జస్ట్ ఆస్కింగ్: ఇంటింటికీ వెళ్ళి ‘అది చూపించి’ ఓట్లడుగుతారేమో.!

రాజకీయాలు ఎంతలా దిగజారపోయాయ్.? ఈ మాట పదే పదే అనుకుంటూనే వున్నారు జనం. అయినా, ప్రతిసారీ అంతకు మించిన లోతుల్ని ‘దిగజారుడుతనం’లో వెతుక్కుంటున్నారు రాజకీయ నాయకులు. ఆ పార్టీ, ఈ పార్టీ అన్న తేడాల్లేవ్.. ప్రధాన రాజకీయ పార్టీలన్నిటిలోనూ ఇదే తీరు.!

యువజన శ్రామిక రైతు కాంగ్రెస్ పార్టీని కాస్తా, యువజన శృంగార రసిక చిల్లర పార్టీగా మార్చేసిన హిందూపూర్ ఎంపీ గోరంట్ల మాధవ్ వ్యవహారంలో, అధినేత వైఎస్ జగన్ అంత ‘చూసీ చూడనట్టు’ ఎలా వ్యవహరిస్తున్నారన్నది పెద్ద మిస్టరీ.! గోరంట్ల మాధవ్ మీడియా ముందు మాట్లాడుతున్న మాటలు సభ్య సమాజం సిగ్గుతో తలదించుకునేలా వున్నాయ్. కానీ, చిత్రంగా వైసీపీ నాయకులు, అందునా కీలక పదవుల్లో వున్నవారు ఆయన్ని సమర్థిస్తున్నారు.

‘అది ఒరిజినల్ కాదు.. ఒరిజినల్ కావాలంటే, మీ ఇంటికి వచ్చి చూపిస్తా..’ అంటూ గోరంట్ల మాధవ్ చేసిన వ్యాఖ్యల్ని తేలిగ్గా కొట్టి పారేయలేం. రేప్పొద్దున్న హిందూపురం నియోజకవర్గమంతా తిరిగి, ‘ఒరిజినల్’ చూపించి మరీ ‘నాకు ఓట్లేస్తారా.? వెయ్యరా.?’ అంటూ ఓటర్లను బూతులు తిట్టినా ఆశ్చర్యపోనక్కర్లేదన్న చర్చ సోషల్ మీడియాలో నడుస్తోంది.

ఇప్పుడంటే గోరంట్ల మాధవ్ గురించి మాట్లాడుకుంటున్నాం. మరి, నిన్న మొన్నటిదాకా టీడీపీ నేత చింతకాయల అయ్యన్నపాత్రుడు మాట్లాడిన మాటలేంటి.? ముఖ్యమంత్రిని పట్టుకుని ఎంతటి జుగుప్సాకరమైన మాటలు మాట్లాడుతున్నారాయన.? వైసీపీ నేతలు జోగు రమేష్, నారాయణ స్వామి తదితరులు మాట్లాడుతున్న మాటలేంటో చూస్తున్నాం. దానికి కౌంటర్ ఎటాక్ ఇస్తోన్న టీడీపీ నేతల వ్యవహార శైలి కూడా చూస్తున్నాం.

నవ్విపోదురుగాక మనకేటి సిగ్గు.? అన్న చందాన ప్రధాన రాజకీయ పార్టీల్లో అత్యంత కీలకమైన పదవుల్లో, బాధ్యతల్లో వున్న నాయకులు వ్యవహరిస్తోంటే, ఇదంతా చూడలేక సిగ్గుతో బిక్కచచ్చిపోతున్నారు సగటు ప్రజానీకం. అయినాగానీ, ‘డోన్ట్ కేర్..’ అన్నట్లు వ్యవహరిస్తున్నాయి రాజకీయ పార్టీలు.

ఈరోజు గోరంట్ల మాధవ్‌కి చంద్రబాబు మీదనో, లోకేష్ మీదనో మంటెక్కి.. వాళ్ళకి ‘ఒరిజినల్’ చూపిస్తానంటున్నారు. రాజకీయాల్లో నాయకులు పార్టీలు మారడం సహజం. అలా పార్టీ మారే పరిస్థితి వస్తే, వైఎస్ జగన్ మోహన్ రెడ్డికి కూడా ‘ఒరిజినల్’ చూపించరన్న గ్యారంటీ ఏంటి.? టీడీపీలో వుండి వైఎస్సార్‌ని తిట్టిన రోజా, వైసీపీలోకి వెళ్ళాక చంద్రబాబుని తిట్టడంలేదా.? ఇదీ అంతే.!