హత్య కేసులో బాలకృష్ణని రక్షించి వైఎస్సార్ మహా నేత అయ్యారా.?

వైఎస్ రాజశేఖర్ రెడ్డి మహానేత అయ్యారట.. అది కూడా హత్య కేసులో సినీ నటుడు నందమూరి బాలకృష్ణను రక్షించడం వల్లనట.! జన్మనిచ్చినందుకు స్వర్గీయ నందమూరి తారకరామారావుకీ, హత్య కేసు నుంచి రక్షించిన వైఎస్ రాజశేఖర్ రెడ్డికీ కృతజ్ఞుడై వుండాలట నందమూరి బాలకృష్ణ.

చట్టం ఏం చెబుతోంది.? భారతీయ న్యాయ శాస్త్రం ఏం చెబుతోంది.? హత్య కేసులో నిందితుడ్ని రక్షించేందుకు ప్రయత్నించేవారు సైతం శిక్షార్హులేనని కదా న్యాయ శాస్త్రం చెబుతుంటుంది. ఆ లెక్కన, నందమూరి బాలకృష్ణ హత్య కేసులో ఇరుక్కుపోతే, ఆయన్ని రక్షించిన వైఎస్ రాజశేఖర్ రెడ్డిని ఏమనాలి.?

రాజకీయాల్లో ‘ఇచ్చి పుచ్చుకోవడాల గురించి’ తరచూ వింటుంటాం. వీటినే 60-40 ఒప్పందాలంటుంటాం. రెండు ప్రధాన రాజకీయ పార్టీల మధ్య ఖచ్చితమైన అవగాహన ఎప్పుడూ వుంటుంటుంది. ఆ అవగాహన ప్రకారం, ఎవరు అవగాన వుంటే, వారు ఇంకొకరికి పరోక్షంగా సహకరిచాలి. ఒకరు అరవై రూపాయలు తినేస్తే, ఇంకొకరు నలభై రూపాయలు మింగేస్తారన్నమాట.

అప్పట్లో కాంగ్రెస్ – టీడీపీ మధ్య అలాంటి అనుబంధమే కొనసాగిందంటారు. ఇప్పుడేమో వైసీపీ – టీడీపీ మధ్య అంతటి అనుబంధం కొనసాగుతోందనే విమర్శ తరచూ వినిపిస్తోంది. ‘మేం అధికారంలోకి వచ్చాక, వైఎస్ జగన్ దోపిడీని బయటపెడతాం.. ఆ సొమ్ముని ప్రజలకు పంచుతాం..’ అని గతంలో టీడీపీ నినదించింది. అధికారంలోకి వచ్చాక, ఒక్క రూపాయి అయినా వైఎస్ జగన్ నుంచి టీడీపీ రికవరీ చేయగలిగిందా.?

చంద్రబాబు లక్షల కోట్లు దోచేశారంటూ ఏకంగా వైసీపీ పుస్తకాలే వేసింది. ఏదీ ఎక్కడ.? చంద్రబాబు ఆస్తిపాస్తుల నుంచి ఒక్క రూపాయి అయినా వైసీపీ ప్రభుత్వం రికవరీ చేయగలిగిందా.? అప్పట్లో చంద్రబాబు, ఇప్పట్లో వైఎస్ జగన్.. ఎందుకు ప్రజలకు ఇచ్చిన మాట నిలబెట్టుకోలేకపోయారు. కేవలం రాజకీయ ఆరోపణలకే ఎందుకు పరిమితమయ్యారు.? ఎందుకంటే 60-40 ఒప్పందమన్నమాట.

చంద్రబాబుకి పవన్ కళ్యాణ్ దత్త పుత్రుడట, చంద్రబాబు దగ్గర పవన్ కళ్యాణ్ ప్యాకేజీ తీసుకున్నాడట. అలాగని వైసీపీ ఆరోపిస్తుంటుంది. ఏదీ, మూడేళ్ళలో ఈ విషయమై ఏం నిరూపించగలిగినట్టు.? ఒక్క రూపాయి అయినా, ఇట్నుంచి ఇలా మారింది.. అని ఆ ప్యాకేజీ వివరాల్ని వైసీపీ బయటపెట్టగలిగిందా.? పెట్టదు.

చంద్రబాబు – వైఎస్ జగన్ కలిసి ఆడుతున్న ‘ప్యాకేజీ’ నాటకమిది. మధ్యలో జనసేనను బలిపశువుని చేసే యత్నం. గతంలో వైఎస్సార్ – చంద్రబాబు కలిసి, ప్రజారాజ్యం పార్టీని చంపేశారు. ఇప్పుడు జగన్ – చంద్రబాబు కలిసి జనసేనను చంపే ప్రయత్నం చేస్తున్నారు.

బాలకృష్ణకి వీరాభిమాని కావడం వల్ల వైఎస్ జగన్ స్వయంగా తన తండ్రి మీద ఒత్తిడి తెచ్చి, బాలయ్య మీదున్న హత్య కేసు నుంచి ఆయనకు ఉపశమనం కలిగించి వుంటారని ఎందుకు అనుకోకూడదు.?