పత్రికల శానిటైజేషన్‌.. ఇలాగైనా భయం తగ్గేనా.?

కరన్సీ నోటుని తీసుకోవడానికి కూడా జనం ఒకటికి పది సార్లు ఆలోచిస్తున్నారు. కానీ, తప్పడంలేదు. వీలైనంతవరకు డిజిటల్‌ పేమెంట్స్‌ వైపు జనం మొగ్గుచూపుతున్నారంటే.. ‘కరోనా వైరస్‌’ భయం ఏ స్థాయిలో వుందో అర్థం చేసుకోవచ్చు. కానీ, వార్తా పత్రికలు చాలా సేఫ్‌.. అంటూ మీడియా సంస్థలు ప్రచారం చేస్తున్నాయి. డాక్టర్లు కూడా ఈ విషయమై వార్తా పత్రికల తరఫున మాట్లాడుతున్నారు. ‘వార్తా పత్రికల మీద గంట సేపు మాత్రమే కరోనా వైరస్‌ వుండే అవకాశముంది. ఓ గంట సేపు వార్తా పత్రికను బయట వదిలేయండి..’ అని ఓ డాక్టర్‌ చెప్పడం గమనార్హం.

కానీ, జనాల్లో వున్న భయాలు తొలగిపోవడం అంత తేలిక కాదు. ‘పేపర్‌ చూడకపోతే వచ్చే నష్టమేంటి.?’ అన్న భావనతో జనం వున్నారు. ఎలాగూ వార్తా పత్రికలకు సంబంధించి ఇ-పేపర్‌ అందుబాటులోనే వుంటోంది. సో, ఇప్పుడెంతగా మొత్తుకున్నా పత్రికల వైపు జనం చూసేందుకు అవకాశమే లేదు.

ఇదిలా వుంటే, ‘శానిటైజర్‌ వాడుతున్నాం..’ అంటూ సాక్షి మీడియా, జనాన్ని ‘ఎడ్యుకేట్‌’ చేసేందుకు ప్రయత్నిస్తోంది. నిజానికి, పత్రికల ప్రింట్‌ ఆపేద్దామనే ప్రతిపాదన వచ్చిందట.. దానికి దాదాపుగా అందరు మీడియా అధిపతులూ ‘ఓకే’ చెప్పారనీ, అయితే, ‘ఈనాడు’ గ్రూపు సంస్థల అధినేత రామోజీరావు మాత్రం ఒప్పుకోలేదనీ, ఆయనే శానిటైజేషన్‌ అనే ప్రతిపాదన తెచ్చారనీ, దానికి సాక్షి సహా మిగతా పత్రికలన్నీ ‘ఓకే’ చెప్పక తప్పలేదనీ మీడియా వర్గాల్లో చర్చ జరుగుతోంది.

జర్నలిస్టులు తమ పని తాము చేసినా, పత్రికలు బయటకు రావాలంటే మళ్ళీ అదో పెద్ద కథ. ఆ వార్తా పత్రిక, పాఠకుల ఇళ్ళకు చేరాలంటే మళ్ళీ అదో ప్రసహనం. ఇవన్నీ ఎందుకు దండగ.? పైగా, ప్రకటనలు కూడా తగ్గిపోయాయ్‌.! దాంతో, కొన్నాళ్ళు.. అంటే, లాక్‌ డౌన్‌ పూర్తయ్యేదాకా ప్రింట్‌ ఆపేయడమే శ్రేయస్కరమని మెజార్టీ మీడియా సంస్థలు ఓ నిర్ణయానికి వచ్చినా, రామోజీరావు అందుకు ససేమిరా అనడంతోనే.. వ్యవహారం మొదటికొచ్చిందని అనుకోవాలేమో.

ప్రపంచంలో అన్ని విభాగాలూ కరోనా సంక్షోభాన్ని ఎదుర్కొంటున్నాయి.. ప్రింట్‌ మీడియా కూడా అందుకు అతీతమేమీ కాదు. వెబ్‌ మీడియాకి ఇప్పుడు విపరీతమైన క్రేజ్‌ ఏర్పడుతోంది. దురదృష్టవశాత్తూ వెబ్‌ మీడియా ముసుగులో కొందరు ఫేక్‌ వార్తల్ని ఎక్కువగా ప్రచారం చేస్తున్నారనుకోండి.. అది వేరే విషయం.