రాపాక.. జనసేనకి దూరంగానా.? దగ్గరగానా.?

జనసేన పార్టీకి చెందిన ఏకైక ఎమ్మెల్యే రాపాక వరప్రసాద్‌, జనసేన పార్టీలో వున్నారో లేదో జనసేన అధినేత పవన్‌ కళ్యాణ్‌కే తెలియదు. ఈ విషయమై రాపాక వరప్రసాద్‌ని ప్రశ్నిస్తే, ‘నేను జనసేన పార్టీకి దూరంగానూ లేను.. అలాగని దగ్గరగానూ లేను..’ అని సెలవిచ్చారు. ‘నేనింకా జనసేన పార్టీ ఎమ్మెల్యేనే. ప్రజలకు మేలు జరిగే విషయాలకు సంబంధించి ప్రభుత్వానికి మద్దతిస్తాను.. ఓ ప్రజా ప్రతినిది¸గా అది నా బాధ్యత..’ అని చెప్పుకొచ్చారు రాపాక వరప్రసాద్‌ తాజాగా.

పార్టీలో వుంటూ, పార్టీ వ్యతిరేక కార్యకలాపాలకు పాల్పడేవారిపై కరిన చర్యలుంటాయనీ.. పార్టీ మీద బురద జల్లే వ్యక్తులపై చట్టపరమైన చర్యలు తీసుకుంటామనీ జనసేన పార్టీ తాజాగా ప్రకటించిన నేపథ్యంలో రాపాక వరప్రసాద్‌ స్పందన రాజకీయ వర్గాల్లో హాట్‌ టాపిక్‌గా మారింది. ఇటీవలి కాలంలో వైఎస్‌ జగన్‌ ప్రభుత్వం పట్ల కనిపిస్తున్న ప్రజా వ్యతిరేకత నేపథ్యంలో రాపాక మనసు మార్చుకున్నారనే ఊహాగానాలు విన్పిస్తున్నాయి.

మరోపక్క, జనసేన పార్టీకి దూరంగా జరగడం వల్ల సొంత నియోజకవర్గంలో వెల్లువెత్తుతున్న నిరసనలు రాపాక వరప్రసాద్‌ మనసు మార్చుకునేలా చేశాయేమోనని జనసేన పార్టీ వర్గాలు భావిస్తున్నాయి. వున్న ఒకే ఒక్క ఎమ్మెల్యేని వదులుకునేందుకు జనసేన పార్టీ సుముఖత వ్యక్తం చేయకపోవచ్చు. అదే సమయంలో, పార్టీకి దూరంగా వుంటోన్న ఆయన్ని బతిమాలుకునే పరిస్థితి కూడా జనసేనకు వుండదు. ఏదో ఆశించి వైఎస్‌ జగన్‌ ప్రభుత్వానికి రాపాక మద్దతిస్తున్నారనీ, అయితే ఆయన ఆశిస్తున్నది అక్కడ జరిగే పరిస్థితి లేకపోవడంతోనే ఆయన కొత్త వాదనను తెరపైకి తెచ్చారనీ రాజోలు జనసైనికులు అభిప్రాయపడుతున్నారు.

ఇప్పటికే రాజోలు నియోజకవర్గంలో జనసైనికులు పూర్తిగా రాపాకకు దూరమైపోయారు. నియోజకవర్గంలో వైసీపీ శ్రేణులు సైతం రాపాకను దూరం పెడుతుండడం గమనార్హం. ఈ నేపథ్యంలో ఇప్పటిదాకా జనసేనకు కాస్త దూరంగా వున్న రాపాక, జనసేనకు దగ్గరయ్యేందుకు ప్రయత్నిస్తున్నట్లే కన్పిస్తోంది.