హెరిటేజ్‌పై చర్యలు తీసుకునే ధైర్యం జగన్‌కి వుందా.?

అసెంబ్లీ సాక్షిగా ‘హెరిటేజ్‌’ అంశం ప్రస్తావనకు వచ్చింది. రాష్ట్రంలో పెరిగిపోయిన ఉల్లి ధరలపై ప్రతిపక్ష నేత నారా చంద్రబాబునాయుడు ప్రస్తావిస్తే, ముఖ్యమంత్రి వైఎస్‌ జగన్‌ మోహన్‌రెడ్డి.. ప్రతిపక్ష నేత వ్యాఖ్యల్ని తిప్పి కొట్టారు. ఈ క్రమంలో హెరిటేజ్‌ సంస్థ అంశాన్ని తెరపైకి తెచ్చారు వైఎస్‌ జగన్‌. హెరిటేజ్‌ సంస్థలో కిలో ఉల్లిపాయలు 200 రూపాయలకు విక్రయిస్తున్నారంటూ వైఎస్‌ జగన్‌ ఆరోపించారు.

అయితే, చంద్రబాబు మాత్రం ఇప్పుడు హెరిటేజ్‌ ఫ్రెష్‌ తమ చేతుల్లో లేదని తేల్చి చెప్పారు. ‘అవునా.? అలాగైతే, బ్రాహ్మణి నుంచి హెరిటేజ్‌ తరఫున మాకు బహుమతులెలా వచ్చాయ్‌.?’ అని అధికార పక్ష నేతలు అసెంబ్లీలోనే చంద్రబాబుని ప్రశ్నించారు. పాలక – ప్రతిపక్ష నేతల మధ్య ‘సఖ్యత’ ఎలా వుందో చెప్పడానికి ఇంతకన్నా నిదర్శనం ఇంకోటి అక్కర్లేదు.

బ్రాహ్మణి ఇచ్చే బహుమతులు తీసుకోవడానికి మాత్రం అధికార పక్ష నేతలకు ఎలాంటి ఇబ్బందీ లేదన్నమాట. అయినా, ఫ్యూచర్‌ గ్రూప్‌ గతంలోనే హెరిటేజ్‌ ఫ్రెష్‌ని టేకోవర్‌ చేసిన విషయం విదితమే. ఆ లెక్కన హెరిటేజ్‌ ఫ్రెష్‌తో చంద్రబాబుకి సంబంధం లేదనే అనుకోవాలి. కానీ, హెరిటేజ్‌ పాల వ్యాపారం మాత్రం చంద్రబాబు కుటుంబ సభ్యుల చేతుల్లోనే వుంది.

రాష్ట్రంలో సిమెంట్‌ ధరలకీ వైఎస్‌ జగన్‌కి చెందిన భారతీ సిమెంట్స్‌కీ లింకు ఎలాంటిదో, హెరిటేజ్‌ సంస్థలో ఉల్లిపాయల ధరలకీ.. మార్కెట్‌లో ఉల్లిపాయల ధరలకీ లింకు అలాంటిదేనేమో. ఒక్కటి మాత్రం నిజం.. కార్పొరేట్‌ వైద్య సంస్థల్లో ఫీజులు అధికం కాబట్టి.. చిన్నా చితకా ఆసుపత్రులూ ఆ స్థాయిలో రోగుల్ని పిండేసినా తప్పేమీ లేదన్నట్టుంది ముఖ్యమంత్రి వైఎస్‌ జగన్‌ వ్యవహార శైలి.

జనానికి ఉల్లి ‘పోటు’ వచ్చి ప్రాణాలు పోతోంటే.. ముఖ్యమంత్రి వైఎస్‌ జగన్‌, మాజీ ముఖ్యమంత్రి చంద్రబాబు వ్యాపారాలపై సెటైర్లు వేయడం బాధ్యతారాహిత్యం కాక మరేమిటి.? పోనీ, అక్రమంగా.. అన్యాయంగా హెరిటేజ్‌లో ఉల్లి ధరలు వుంటే.. ఆ సంస్థపై చర్యలు తీసుకునే ధైర్యం వైఎస్‌ జగన్‌ సర్కార్‌ చేయగలరా.?