అమరావతిలో సరే.. పులివెందులలో ఇవ్వగలరా.?

రైతులు, రాజధాని కోసం ఇచ్చిన భూముల్ని ప్రభుత్వం, పేదల ఇళ్ళ పట్టాల పంపిణీ కార్యక్రమం కోసం వెచ్చించబోతోంది. ఈ మేరకు ఇప్పటికే అధికారికంగా జీవో కూడా జారీ అవడం కలకలం సృష్టిస్తోంది. పేదలకు ప్రభుత్వం ఇళ్ళ స్థలాలు ఇస్తామంటే దాన్ని ఎవరైనా కాదనగలరా.? కానీ, ఇక్కడ పరిస్థితి వేరు.

దేశ చరిత్రలోనే కాదు, ప్రపంచ చరిత్రలోనే ఎక్కడా లేని విధంగా రాజధాని కోసం రైతులు స్వచందంగా తమ భూములిచ్చిన మాట వాస్తవం. ఆ లెక్కన, రైతుల్ని ఏ ప్రభుత్వమైనా నెత్తిన పెట్టుకుని పూజించాలి. దురదృష్టవశాత్తూ రాష్ట్ర ప్రభుత్వం, ఆ రైతుల్ని పురుగులకంటే హీనంగా చూస్తోంది.

లాఠీలు విరుగుతున్నాయ్‌ రైతుల మీద. అధికార పార్టీ నేతలైతే ఏకంగా.. తమ వాహనాలతో రైతుల్ని ఢీకొట్టించేస్తున్నారు. సరిగ్గా ఈ సమయంలోనే అమరావతిలో పేదలకు ఇళ్ళ స్థలాలు ఇచ్చేందుకు ప్రభుత్వం సిద్ధపడటం వివాదాలకు తావిస్తోంది. ‘మేం రాజధానికి భూములిచ్చాం.. మా భూముల్ని, ఇంకెవరికో ఇచ్చే హక్కు మీకెక్కడిది.?’ అని అమరావతి రైతులు సరాసరి ముఖ్యమంత్రి వైఎస్‌ జగన్‌ మోహన్‌రెడ్డిని ప్రశ్నిస్తున్నారు.

‘ఏం, మీ పులివెందులలో.. మీకున్న భూముల్లో రైతులకు ఇళ్ళ స్థలాలు ఇవ్వొచ్చుగా.? ప్రజల్ని ఉద్ధరించడానికే రాజకీయాల్లోకి వచ్చామంటున్నారు కదా.. మీ ఆస్తుల్ని ప్రజలకు రాసిచ్చెయ్యండి.. మేం రైతులం.. మేం రాష్ట్ర ప్రయోజనాల కోసం భూములిచ్చాం.. మీరు ముఖ్యమంత్రి.. మీ ఆస్తుల్ని ప్రజలకు ఇవ్వలేరా.?’ అని సవాల్‌ విసురుతున్నారు అమరావతిలో 70 రోజులుగా ఆందోళనలు చేస్తున్న రైతులు.

నిజానికి అమరావతి రైతుల డిమాండ్‌లో లాజిక్‌ వుంది. కానీ, ఈ కుళ్ళిన రాజకీయ వ్యవస్థలో, అధికారాన్ని అడ్డంపెట్టుకుని ఆస్తుల్ని పెంచుకుంటారుగానీ.. ఎవరైనాసరే, ఆ ఆస్తుల్ని ప్రజల కోసం వినియోగించేంత పెద్ద మనసు కలిగి వుంటారా.? ఛాన్సే లేదు. ఒక్కటి మాత్రం నిజం.. అమరావతి రైతుల్ని, ఈ ఇళ్ళ స్థలాల వివాదంతో ఇంకా గట్టిగా కెలికేస్తోంది వైఎస్‌ జగన్‌ ప్రభుత్వం. ఈ తాజా పరిణామాలు ముందు ముందు ఇంకెలాంటి వివాదాలకు తావిస్తాయో వేచి చూడాల్సిందే.