ఇన్‌సైడ్‌ స్టోరీ: కరోనాని తట్టుకోవడం సాధ్యమేనా.?

ఓ యువకుడు విదేశాలకు వెళ్ళొచ్చాడు.. కరోనా మోసుకొచ్చాడు. అయితే, అతనికి కరోనా సోకిన విషయం కాస్త ఆలస్యంగా వెలుగు చూసింది. ఒక్కసారిగా ఈ ఘటన వెలుగు చూసేసరికి మొత్తంగా దేశం ‘పానిక్‌’ అవుతోంది. అందుక్కారణం, కరోనా వైరస్‌ ప్రపంచ వ్యాప్తంగా సృష్టిస్తున్న విధ్వంసమే. ఇతర వైరస్‌లకీ, కరోనా వైరస్‌కీ స్పష్టమైన తేడా వుంది. ఇది ఆయా దేశాల ఆర్థిక వ్యవస్థల్ని దెబ్బ కొడుతోంది.

భారతదేశంలో ఇంతకు ముందు వరకు కేవలం మూడు కేసులు మాత్రమే నమోదయ్యాయి. అయితే, ఆ కేసులతో దేశంలో అలజడి కన్పించలేదు. కానీ, కొంతమేర పౌల్ట్రీ రంగంపై ఎఫెక్ట్‌ పడింది. దానికి తోడు, కోళ్ళకు సీజనల్‌గా సంభవించే కొన్ని సమస్యలతో పౌల్ట్రీ రంగానికి పెద్ద దెబ్బ తగిలింది.

ఇప్పుడు దేశంలో ఒకే రోజు రెండు కేసులు నమోదయ్యేసరికి.. పూర్తిగా పౌల్ట్రీ రంగం సర్వనాశనమయ్యే పరిస్థితి ఏర్పడింది. ఒక్క పౌల్ట్రీ రంగమే కాదు.. ఇతర రంగాలకూ పెద్ద దెబ్బే తగలబోతోంది. సాధారణంగా రోగికి వైరస్‌ వస్తే, వెంటనే గుర్తించడానికి వీలుంటుంది. కరోనా వైరస్‌ పరిస్థితి అందుకు పూర్తి భిన్నం. ఒక్కో సందర్భంలో 20 రోజులవరకూ వైరస్‌ లక్షణాలు కన్పించవు. దాంతో, అనుమానితుల్ని ఎక్కువ రోజులు క్వారెంటైన్‌లో వుంచాల్సి వస్తోంది.

చైనాలో ఈ కారణంగానే అక్కడి ఆర్థిక వ్యవస్థ పూర్తిగా దెబ్బతింది. గల్ఫ్ దేశాలు వణికిపోతున్నాయి. అగ్ర రాజ్యం అమెరికా కూడా బెంబేలెత్తుతోంది కరోనా పేరు చెబితే. అలాంటిది, 130 కోట్ల జనాభా గలిగిన భారతదేశం.. కరోనా వైరస్‌ ధాటికి తట్టుకోగలదా.? అన్నదే మిలియన్‌ డాలర్ల ప్రశ్న. ఈ వైరస్‌ కారణంగా సంభవించే మరణాల రేటు తక్కువే అయినా, ఇది ఆర్థిక విధ్వంసానికి దారితీస్తోంది. అదే పెను సమస్య.

చిత్రమేంటంటే, చైనాలో కరోనా కేసులు తగ్గుముఖం పడుతున్నాయి. అదే సమయంలో, ఇతరదేశాల్లో కేసుల సంఖ్య గణనీయంగా పెరుగుతోంది. తెలంగాణలో వెలుగు చూసిన కరోనా వైరస్‌ దెబ్బకి, తెలుగు రాష్ట్రాలు విలవిల్లాడాల్సి వస్తోంది. ఎవరన్నా తుమ్మినా దగ్గినా ఇతరులు భయాందోళనలకు గురవ్వాల్సి వస్తోంది. ‘అంతగా ఆందోళన చెందాల్సిన పనిలేదు.. కాస్త జాగ్రత్తగా వుంటే చాలు..’ అని ప్రభుత్వాలు సూచిస్తున్నా, ప్రజల్లో ఆందోళన మాత్రం పెరుగుతోందే తప్ప తగ్గడంలేదు.