ఏపీలో ఆరువారాల్లో ఎన్నికలు జరుగుతాయా?

ఆంధ్రప్రదేశ్ లో స్థానిక సంస్థల ఎన్నికలు వాయిదా పడిన సంగతి తెలిసిందే. ఎన్నికలు వాయిదా వేయడానికి ప్రధాన కారణం కరోనా ఎఫెక్ట్. కరోనా రోజు రోజుకు విస్తరిస్తున్న నేపధ్యంలో ఎన్నికలు నిర్వహించడం సాధ్యం కాదని రాష్ట్ర ఎన్నికల కమిషనర్ ఎన్నికలను వాయిదా వేశారు. ఇలా ఎన్నికలను వాయిదా వేసిన తరువాత ఎన్ని గొడవలు జరిగాయో చెప్పక్కర్లేదు.

ఎన్నికలను వాయిదా వేయడం వెనుక చంద్రబాబు హస్తం ఉందని, బాబు హయాంలో నియమించిన వ్యక్తి కావడంతో బాబు చెప్పినట్టుగా నడుచుకొని ఎన్నికలను వాయిదా వేశారని అప్పట్లో వైకాపా ప్రభుత్వం నిందలు వేసింది. అంతేకాదు, ఏకంగా సుప్రీం కోర్టుకు వెళ్ళిన సంగతి తెలిసిందే.

జగన్ పాలన విషయంలో మంచి నిర్ణయాలు తీసుకుంటున్నారు. పేదల కోసం అమలు చేస్తున్న పధకాలు చాలా బాగుంటున్నాయి. గత ముఖ్యమంత్రుల కంటే కూడా అమలు చేస్తున్న పధకాలు ప్రజలకు చేరువయ్యేలా చేయగలుగుతున్నారు. అందులో ఎలాంటి సందేహం అవసరం లేదు. అనుమానించాల్సిన అవసరం లేదు.

కానీ, కొన్ని విషయాల్లోనే జగన్ తీసుకునే నిర్ణయాలు అందరిని ఇబ్బందులు పెడుతుంటాయి. మూడు రాజధానుల నిర్ణయం అమలు చేస్తే జరిగే పరిణామాలు ఉంటాయో ముందు ముందు చూడవచ్చు. మూడు రాజధానుల నిర్ణయాన్ని చాలామంది వ్యతిరేకిస్తున్నా బయటకు చెప్పలేకపోతున్నారు.

ఉగాది తరువాత మూడు రాజధానుల అంశంపై స్పష్టమైన నిర్ణయం వెలువడాల్సి ఉన్న తరుణంలో కరోనా కారణంగా అన్ని కార్యక్రమాలు వాయిదా పడ్డాయి. ముఖ్యంగా ఎన్నికలను ఆరు వారాలపాటు ఎన్నికల కమిషన్ వాయిదా వేసింది. ఆరు వారాల తరువాత ఎన్నికలు జరుగుతాయా? లేదా? అంటే ప్రస్తుతం దేశంలో నెలకొన్న పరిస్థితుల దృష్ట్యా ఎన్నికలు ఇప్పట్లో జరిగే అవకాశం లేదని స్పష్టంగా తెలుస్తోంది.

కరోనా వైరస్ భూతం నుంచి కొలుకోవడానికి కనీసం మూడు నుంచి నాలుగు నెలల సమయం పడుతుంది. ఒకవేళ కోలుకున్న ఎన్నికలు జరిగేందుకు మరింత సమయం పట్టవచ్చు. ఎన్నికలు జరగకుండా జగన్ మూడు రాజధానులను తెరమీదకు తీసుకురాలేరు. ఎన్నికలు జరగాలి అంటే కరోనా నుంచి దేశం బయటపడాలి. మొత్తంగా చూసుకుంటే ఈ ఏడాది చివరి వరకు ఎన్నికలు జరిగే అవకాశం లేనట్టుగానే కనిపిస్తోంది.