ఆమెకు తిక్క రేగింది.. మొగుడిని అమ్మేసింది

శుభలగ్నం సినిమా చూశారా? అందులో కథానాయిక తన భర్తను కోటి రూపాయలకు అమ్మేస్తుంది. తన భర్తను మరో యువతి ప్రేమిస్తోందని, పెళ్లి చేసుకోవాలని భావిస్తోందని తెలిసి.. కోటి రూపాయలకు బేరం కుదుర్చుకుంటుంది. డబ్బు తీసుకుని భర్తను ఆమెకు అప్పజెప్పేస్తుంది. సరిగ్గా ఇలాంటి సంఘటనే కర్ణాటకలోని మాండ్య జిల్లాలో జరిగింది.

తన భర్త మరో యువతితో వివాహేతర సంబంధం కొనసాగిస్తున్న సంగతి తెలియడంతో అతడి భార్య రహస్యంగా ఆరా తీసింది. మొగుడి కదలికలపై కన్నేసి నిఘా పెట్టింది. ఈనెల 16న రెడ్ హ్యాండెడ్ గా ఇద్దరినీ పట్టుకుని నిలదీసింది. తమ వ్యవహారం బయటకు తెలిసిపోవడంతో సదరు యువతి కూడా ఎదురు తిరిగింది. నీ భర్త నా దగ్గర రూ.5 లక్షలు అప్పు తీసుకున్నాడు. ఎంత అడిగినా ఇవ్వడంలేదు. అందుకే తీసుకొచ్చి ఇంట్లో పెట్టుకున్నా అని చెప్పింది. దీంతో అతడి భార్యకు తిక్క రేగింది.

మరో యువతితో ఉంటున్న మొగుడు ఉంటే ఎంత లేకుంటే ఎంత అనుకుంది. నా భర్తను నీకే ఇచ్చేస్తా.. అందుకు ప్రతిఫలంగా ఎంత ఇస్తావో చెప్పు అని బేరం పెట్టింది. దీంతో సదరు యువతి ఆనందంగా ఎగిరి గంతేసి మరీ ఒప్పుకుంది. రూ.5 లక్షలిస్తా.. నీ మొగుడిని నాకిచ్చేయ్ అని ప్రతిపాదించింది. ఇందుకు ఆమె అంగీకరించింది.

సరిగ్గా నెల రోజుల తర్వాత అంటే.. వచ్చే నెల 17న రూ.5 లక్షలు చెల్లిస్తానని సదరు యువతి ఒప్పందం చేసుకుంది. తనకు రూ.5 లక్షలు ఇవ్వగానే భర్తను తాళిబొట్టుతో సహా అప్పగించి వెళ్లిపోతానని ఆమె కూడా స్పష్టంచేసింది. వీరి బేరసారాలను సదరు భర్త అలా మౌనంగా చూస్తూ నిలబడిపోయాడు. అచ్చం శుభలగ్నం సినిమాలో కథానాయకుడు జగపతిబాబులా. మరి వచ్చేనెల ఈ ఒప్పందం అమలవుతుందో లేదో చూడాలి.