రాజధానిగా విశాఖ.. ఇప్పుడెందుకీ అత్యుత్సాహం.?

జ్యుడీషియల్‌ క్యాపిటల్‌గా మారాల్సిన కర్నూలు, కరోనా క్యాపిటల్‌గా మారిపోయింది. లెజిస్లేచర్‌ క్యాపిటల్‌ అంటోన్న అమరావతి కూడా కరోనా దెబ్బకు విలవిల్లాడుతోంది. మరి, ఎగ్జిక్యూటివ్‌ క్యాపిటల్‌ కావాల్సి వున్న విశాఖ పరిస్థితేంటి.? అక్కడా కరోనా కేసులు బాగానే నమోదయ్యాయి. అయితే, రాష్ట్రంలోని మిగతా జిల్లాలతో పోల్చితే విశాఖ కాస్త బెటర్‌. ఉత్తరాంధ్రలోని శ్రీకాకుళం, విజయనగరం జిల్లాల్లో ఇప్పటిదాకా కరోనా పాజిటివ్‌ కేసులే లేకపోవడం ఆహ్వానించదగ్గ పరిణామం.

ఊరందరిదీ ఓ దారి అయితే, ఉలిపిరికట్టది ఇంకోదారి.. అన్నట్టుంది వైఎస్‌ జగన్‌ సర్కార్‌ పరిస్థితి. హడావిడిగా రాజధానిని విశాఖకు తరలించేందుకు నానా రకాల ప్రయత్నాలూ చేస్తోంది. ‘త్వరలో విశాఖకు రాజధాని వచ్చి తీరుతుంది.. దీన్ని ఎవడూ ఆపలేడు..’ అని ఈ మధ్యనే వైసీపీ ఎంపీ (రాజ్యసభ సభ్యుడు) విజయసాయిరెడ్డి మీసం మెలేసి, తొడగొట్టినంత పనిచేశారు. నిజానికి, విశాఖ రాజధాని వ్యవహారంలో విజయసాయి అత్యుత్సాహం అంతా ఇంతా కాదు. ఆయనే ఈ మొత్తం వ్యవహారానికి కథ, స్క్రీన్‌ప్లే, దర్శకత్వం.. అన్నట్లు వ్యవహరిస్తున్నారు.

కానీ, న్యాయస్థానంలో మాత్రం ప్రభుత్వం ‘అబ్బే, ఇప్పుడు అలాంటి ఆలోచనలు ఏమీ చేయడంలేదు..’ అంటూ విన్నవించుకుంది రాజధాని తరలింపుకి సంబంధించిన కేసు విచారణలో. గతంలోనే న్యాయస్థానం, ప్రభుత్వ కార్యాలయాల తరలింపుపై ‘స్టే’ విధించినా, వైఎస్‌ జగన్‌ సర్కార్‌, కోర్టు ఆదేశాల్ని పెడచెవిన పెడ్తోందన్న విమర్శలున్నాయి. రాష్ట్ర వాస్తవ పరిస్థితుల్ని పరిగణనలోకి తీసుకుంటే, కొత్త రాజధాని.. మూడు రాజధానుల ప్రతిపాదన అనేవి అర్థ రహితమైన విషయాలుగానే కన్పిస్తాయి. కానీ, ముఖ్యమంత్రి వైఎస్‌ జగన్‌ ఆలోచనలు అందుకు భిన్నంగా వున్నాయి.

అమరావతి ప్రపంచస్థాయి నగరం అయ్యే అవకాశాలెంత.? అన్నది పక్కన పెడితే, రాజధానికి అవసరమైన సౌకర్యాలు కొంతమేర అక్కడ వున్నాయన్నది నిర్వివాదాంశం. ఏడాదిగా వైఎస్‌ జగన్‌ ప్రభుత్వం అమరావతి నుంచే పరిపాలన చేస్తోంది. అలాంటప్పుడు, కొత్త రాజధాని అవసరమేంటి.? కరోనా దెబ్బకి రాష్ట్ర ఆర్థిక పరిస్థితి మరింత అధ్వాన్నంగా తయారైంది. ఈ పరిస్థితుల్లో ఇంకా రాజధాని తరలింపు ఆలోచనలు చేయడమంటే, రాష్ట్రాన్ని ఏం చేయాలనుకుంటున్నట్టు.?