అరరె.. తెలంగాణ మంత్రి కొండా సురేఖ, సినీ నటి సమంతపై వాడకూడని పదజాలంతో జుగుప్సాకరమైన వ్యాఖ్యలు చేసేశారే.! ఈ వ్యాఖ్యలకు నొచ్చుకున్న నాగార్జున, సోషల్ మీడియా వేదికగా విరుచుకుపడ్డాడే.! నాగచైతన్య, అఖిల్, అమల కూడా స్పందించేశారే.!
స్పందించాల్సిందే.. అంత దారుణమైన పదజాలాన్ని కొండా సురేఖ ఉపయోగించారు మరి.! మెగాస్టార్ చిరంజీవి కూడా ట్వీటేశారు. జూనియర్ ఎన్టీయార్, మహేష్బాబు, విశ్వక్ సేన్.. ఇలా చెప్పుకుంటూ పోతే లిస్టు పెద్దదే. దాదాపుగా సినీ ప్రముఖులంతా స్పందించేశారు. కొండా సురేఖ తీరుని తప్పు పట్టారు కూడా.
మంచిదే.! సినీ పరిశ్రమలో ఈ ఐక్యత వుండి తీరాలి. కాకపోతే, అందరి విషయంలోనూ ఇలాగే సినీ పరిశ్రమ ఒక్కతాటిపైకి వచ్చి వుంటే బావుండేది. పవన్ కళ్యాణ్ తల్లిని శ్రీరెడ్డి తూలనాడినప్పుడు ఈ సినీ పరిశ్రమ ఏమైపోయింది.? అంతకన్నా చాలాకాలం ముందర, చిరంజీవి మీద రోజా మాటలు తూలినప్పుడు, సినీ ప్రముఖులంతా ఎక్కడికి పోయారు.?
అంతెందుకు, గడచిన ఐదేళ్ళ కాలంలో అనునిత్యం, పవన్ కళ్యాణ్ వ్యక్తిగత జీవితం మీద వైఎస్ జగన్ మోహన్ రెడ్డి అత్యంత జుగుప్సాకరమైన వ్యాఖ్యలు చేస్తూ వచ్చారు. అప్పట్లో మంత్రులుగా పని చేసిన రోజా, అనిల్ కుమార్ యాదవ్, కొడాలి నాని, పేర్ని నాని.. ఇలాంటోళ్ళంతా సినీ పరిశ్రమపై దిగజారుడు వ్యాఖ్యలు చేశారు.
ఆ వ్యాఖ్యలపై కేవలం పవన్ కళ్యాణ్ మాత్రమే స్పందిస్తూ వచ్చారు. చిరంజీవి నొచ్చుకున్నారు.. ఆ విషయాన్ని పలు సందర్భాల్లో చెప్పారు. కానీ, ఇప్పుడు.. సమంత విషయంలో ట్వీట్లుస్తున్న సినీ ప్రముఖులు అప్పుడంత ఎందుకు మౌనం దాల్చినట్లు.?
నమ్రత మీద అప్పట్లో వైసీపీకి చెందిన సాక్షి మీడియా జుగుప్సాకరమైన రాతలు రాస్తే, మహేష్ స్పందించలేకపోయిన సంగతి తెలిసిందే. జూనియర్ ఎన్టీయార్ మేనత్త భువనేశ్వరి మీద అప్పటి వైసీపీ ఎమ్మెల్యే వల్లభనేని వంశీ అభ్యంతరకర వ్యాఖ్యలు చేస్తే, స్పంచడానికి జూనియర్ ఎన్టీయార్ చాలా కష్టపడ్డాడు.
సమస్య వచ్చినప్పుడు స్పందించి తీరాలి. కలిసికట్టుగా స్పందించాలి. సమంత విషయంలో సినీ పరిశ్రమ అంతా ఒక్కతాటిపైకి వచ్చింది కాబట్టే, మంత్రి కొండా సురేఖ బేషరతు క్షమాపణ చెప్పారు. ఇదే క్షమాపణ జగన్తో సినీ పరిశ్రమ ఎందుకు చెప్పించలేకపోయింది.? రోజా, వల్లభనేని వంశీ, అనిల్ కుమార్ యాదవ్, పేర్ని నాని, కొడాలి నాని వంటివారితో క్షమాపణ చెప్పించడానికి సినీ ప్రముఖులకు ఏ బేషజాలు అడ్డొచ్చాయ్.
అన్నట్టు, మూవీ ఆర్టిస్ట్స్ అసోసియేషన్ కూడా ఇప్పుడు స్పందించేసింది. మరి, గతంలో.. అంటే, పవన్ కళ్యాణ్ విషయంలో ఎందుకు ‘మా’ స్పందించలేదు.? చిరంజీవి విషయంలో ‘మా’ ఎందుకు స్పందించలేదు.?
ఏదిఏమైనా, తెలుగు సినీ పరిశ్రమకి ఇదొక గుణపాఠం లాంటిది. పరిశ్రమ మీద తేలిక వ్యాఖ్యలు చేయడం, జుగుప్సాకరంగా ప్రవర్తించడం రాజకీయ నాయకులకి అలవాటైపోయింది. ఇప్పటికైనా, ‘మేమంతా ఒక్కటే.. మేమంతా కలిసి మా కోసం పోరాడతాం’ అని సినీ పరిశ్రమ అనగలిగితే మంచిది.!