అయ్యయ్యో విరాట్‌ కోహ్లీ.. ‘తప్పు’ ఎక్కడ జరిగింది.?

న్యూజిలాండ్‌ టూర్‌లో టీమిండియా వన్డే సిరీస్‌ని కోల్పోయింది.. తాజాగా టెస్ట్‌ సిరీస్‌ని కూడా కోల్పోయింది. ఆట అన్నాక గెలుపోటములు సహజం. గెలిచినప్పుడు ఆకాశానికెత్తేయడం.. ఓడినప్పుడు పాతాళానికి తొక్కేయాలని చూడటం సర్వసాధారణమే. టీమిండియా కెప్టెన్‌ విరాట్‌ కోహ్లీని విమర్శకులు పాతాళానికి తొక్కేయాలని చూస్తున్నారంటే, అందుక్కారణం టీమిండియా సారధి న్యూజిలాంట్‌ టూర్‌లో వరుసగా విఫలమవుతుండడమే. అయితే, న్యూజిలాండ్‌లో పిచ్‌ కండిషన్స్‌ భిన్నంగా వుంటాయి.

అలాగని టీమిండియా తప్పిదాలు చేయలేదని కాదు. గెలిచే మ్యాచ్‌లని టీమిండియా చేజార్చుకుంది. అదే టీమిండియా వైఫల్యానికి కారణం. కెప్టెన్‌ కోహ్లీనే కాదు, జట్టులో చాలామంది విఫలమయ్యారు. కానీ, బాధ్యత కెప్టెన్‌దే కదా.! విజయాల సారధి.. అని ఎలా కెప్టెన్‌ విరాట్‌ కోహ్లీని ఆకాశానికెత్తేశారో, అలాగే జట్టు పరాజయాల పాలవుతున్నప్పుడు కెప్టెన్‌నే నిందిస్తారు. ఆ విషయం కోహ్లీకి కూడా తెలుసు.

కాగా, కెప్టెన్‌ కోహ్లీకి జట్టులోని ఇతర సభ్యులు బాసటగా నిలుస్తున్నారు. ‘బౌలర్లం రాణించాం కాబట్టి, తప్పిదం బ్యాట్స్‌మెన్‌దేనని చెప్పబోం. ఎందుకంటే, మేం ఫెయిలయినప్పుడు బ్యాట్స్‌మెన్‌ సత్తా చాటి మ్యాచ్‌లను గెలిపించారు కదా..’ అని టీమిండియా ప్రధాన బౌలర్‌ జస్‌ప్రీత్‌ బుమ్రా ఇప్పటికే వ్యాఖ్యానించి వున్నాడు. ఇదిలా వుంటే, వికెట్‌ కీపర్‌గా రిషబ్‌ పంత్‌ ఎంపిక అతి పెద్ద తప్పిదంగా చెప్పుకోవచ్చు. ఓపెనింగ్‌ జోడీ సరిగ్గా లేకపోవడం సహా జట్టు కూర్పులో లోపాలు టీమిండియా విజయావకాశాల్ని దెబ్బ తీశాయి.

చిత్రంగా పుజారా కూడా న్యూజిలాండ్‌ గడ్డపై చేతులెత్తేశాడు. ఆల్‌ రౌండర్‌ హార్దిక్‌ పాండ్యా, డాషింగ్‌ ఓపెనర్లు శిఖర్‌ ధావన్‌, రోహిత్‌ శర్మ లేకపోవడం, మంచి ఫావ్‌ులో వున్న కెఎల్‌ రాహుల్‌ని పక్కన పెట్టడం.. ఇవన్నీ టీమిండియా ఘోర పరాజయాలకు కారణంగా చెప్పుకోవచ్చు. ఓ వన్డే సిరీస్‌, ఓ టెస్ట్‌ సిరీస్‌ కోల్పోగానే కెప్టెన్‌ కోహ్లీపై అర్థం పర్థం లేని విమర్శలు చేయడం సబబు కాదు. అదే సమయంలో, జట్టుకి తానే ప్రధాన బలం కాబట్టి.. కోహ్లీ తన ఫావ్‌ుపై దృష్టిపెట్టాల్సి వుందన్నదీ నిస్సందేహం.