హరి అలియాస్ కొసరాజు హరికృష్ణ.! ఎవరీయన.? ఈయన గురించి జూనియర్ ఎన్టీయార్ ఎందుకంత గట్టిగా వకాల్తా పుచ్చుకుంటున్నట్లు.? ఎవడైనా ఏమైనా అనుకోనీ.. హరి లేకపోతే నేను లేను.. అన్నట్లుగా జూనియర్ ఎన్టీయార్, ‘దేవర’ సినిమా విషయమై మాట్లాడుతోంటే, అంతా విస్తుపోతున్నారు.
నిజానికి, చాలామందికి కొసరాజు హరికృష్ణ అంటే ఎవరో తెలియదు. ఇండస్ట్రీ జనాలకి మాత్రం, ‘ఎన్టీయార్ ఆర్ట్స్ హరి’ అంటే బాగానే తెలుసు. నందమూరి కళ్యాణ్ రామ్ సతీమణి తరఫు బంధువు.. నందమూరి కళ్యాణ్ రామ్‌కి సినీ రంగంలో అన్నీ తానే అయి వ్యవహరిస్తుంటాడు.!
అదే, ఎన్టీయార్ ఆర్ట్స్ బ్యానర్ ‘దేవర’ సినిమాకి సహ భాగస్వామి కదా.! అద్గదీ సంగతి.! ఆ హరి లేకపోతే, ఎన్టీయార్ ఆర్ట్స్ బ్యానర్ లేదు.. ‘దేవర’ సినిమా కూడా లేదన్నంత బిల్డప్ జూనియర్ ఎన్టీయార్ ఇస్తుండడంతో.. రాత్రికి రాత్రి ఈ ‘కొసరాజు హరికృష్ణ’ టాక్ ఆఫ్ ది ఇండస్ట్రీ అయి కూర్చున్నారు.
‘అయినా, జూనియర్ ఎన్టీయార్‌కి ఏమయ్యింది.? ఎవరి స్థాయో పెంచడానికి, తన స్థాయిని ఇలా తగ్గించేసుకుంటున్నాడెందుకు..’ అని సినీ జనం ముక్కున వేలేసుకుంటున్నారు. ‘మా వాడు అంతే.. ఎవర్నయినా నమ్మితే ఇలాగే వుంటుంది..’ అని జూనియర్ ఎన్టీయార్ అభిమానుల్లో ఓ సెక్షన్, ఎలివేషన్లు ఇచ్చుకుంటున్నారు.
మరోపక్క, మెజార్టీ జూనియర్ ఎన్టీయార్ అభిమానులు, ఆ హరి వల్లనే ‘దేవర’ సినిమాకి ఈ దుస్థితి.. అంటున్నారు. సినిమాకి సరిగ్గా ప్రమోషన్లు చేయలేదనీ, ప్రీ రిలీజ్ ఈవెంట్ కూడా సరిగ్గా నిర్వహించడం చేతకాలేదనీ, సినిమా రిలీజయ్యాక కూడా.. సరిగ్గా ప్రమోట్ చేయలేదనీ.. ఇదంతా హరి చేతకానితనమేనని తెగేసి చెబుతున్నారు అభిమానులు.
ఆ అభిమానులకే షాక్ ట్రీట్‌మెంట్ ఇచ్చేలా, జూనియర్ ఎన్టీయార్ ‘హరి’ని వెనకేసుకొస్తుండడం గమనార్హం. కొరటాల శివ దర్శకత్వంలో తెరకెక్కిన ‘దేవర’ సినిమా యువసుధ పతాకంపై తెరకెక్కింది. అందులోకి ఎన్టీయార్ ఆర్ట్స్ బ్యానర్ రావడం వెనుక హరి కీలక పాత్ర పోషించాడు. అద్గదీ అసలు సంగతి.
జూనియర్ ఎన్టీయార్‌కి ఈ సినిమా ఆర్థికంగా బాగానే వర్కవుట్ అయ్యిందిగానీ, సినిమా రిజల్ట్ మాత్రం హంబక్.. అని స్వయంగా అభిమానులే చర్చించుకుంటున్న పరిస్థితి. ఆ హరి వల్లనే ఇదంతా జరిగిందని అభిమానులు గుర్రుగా వున్నారు. అలాంటి అభిమానులకు జూనియర్ ఎన్టీయార్ మాటలు మరింత గట్టిగా తగులుతున్నాయ్.
ఇంకా హరిని వెనకేసుకొస్తున్నావ్ కదా.. ఇలాగైతే కష్టం.. అని జూనియర్ ఎన్టీయార్‌కి అభిమానులే స్వీట్ వార్నింగ్ ఇస్తున్న పరిస్థితిని కూడా చూస్తున్నాం సోషల్ మీడియా వేదికగా. ఒకప్పుడు జూనియర్ ఎన్టీయార్‌కి అత్యంత సన్నిహితులైన కొందరు సినీ ప్రముఖులు ఇప్పుడు అతన్ని రీచ్ అవలేని పరిస్థితి వచ్చిందంటే, దానికి కారణం కూడా ఈ హరి అలియాస్ కొసరాజు హరికృష్ణే కారణమన్నది ఇంకో వాదన.
ఏమో, హరి మీద జూనియర్ ఎన్టీయార్‌కి ఇంత నమ్మకం దేనికో.? ఈ అతి నమ్మకం.. అతన్ని ఎక్కడికి పడేస్తుందో.!