మాజీ మంత్రి అమర్నాథ్కి సోషల్ మీడియాలో వున్న పేరు ‘కోడి గుడ్డు అమర్నాథ్’ అని. ఆ పేరు ఆయనకి ఎలా వచ్చిందో ప్రత్యేకంగా చెప్పాల్సిన పని లేదు. రాష్ట్రాభివృద్ధి విషయమై మీడియా అడిగిన ప్రశ్నకు సమాధానమిస్తూ, కోడి గుడ్డు పెట్టింది, అది పొదిగి, కోడి పిల్ల అవడానికి సమయం పడుతుంది.. అని వెటకారంగా గుడివాడ అమర్నాథ్ చేసిన వ్యాఖ్యల నేపథ్యంలో ఆయనకు ‘గుడ్డు అమర్నాథ్’ అనే పేరు వచ్చింది.
సరే, రాజకీయాలన్నాక విమర్శలు, ఇలాంటి వెటకారపు ర్యాగింగులు సర్వసాధారణం. మంత్రిగా పని చేసిన సమయంలో గుడివాడ అమర్నాథ్ రాష్ట్రానికి ఉపయోగపడిన కార్యక్రమాలు ఏమైనా చేశారా.? అంటే, ఒక్కటి కూడా ఆయన చెప్పుకోలేరు. వైసీపీ హయాంలో మంత్రులంతా రబ్బర్ స్టాంపులు.. పేపర్ వెయిట్స్ మాత్రమే.
అంతా సకల శాఖల మంత్రిగా తెరవెనుకాల కథ నడిపిన వైసీపీ కీలక నేత సజ్జల రామకృష్ణా రెడ్డి కనుసన్నల్లోనే జరిగేవి. నిజానికి, వైసీపీ హయాంలో అసలంటూ రాష్ట్ర అభివృద్ధి శూన్యమనే మొన్నటి ఎన్నికల్లో రాష్ట్ర ప్రజానీకం కూడా తీర్పునిచ్చారు.
వైఎస్ జగన్ హయాంలో జగనన్న గోరు ముద్ద, జగనన్న కాలనీలు.. ఇలా అన్నిటికీ తన పేర్లే పెట్టుకున్నారు. కొన్నిటికి తన తండ్రి పేర్లు పెట్టుకున్నారు. పోలవరం ప్రాజెక్టుని గాలికొదిలేసి, ఆ ప్రాజెక్టు దగ్గర వైఎస్ రాజశేఖర్ రెడ్డి విగ్రహాన్ని పెడతామంటూ ప్రకటించుకున్న ఘనత వైఎస్సార్సీపీకే దక్కుతుంది.
విశాఖలో కాపురం వుండడం కోసం, విశాఖ సముద్ర తీరాన రుషికొండపై భారీ భవంతిని ప్రజాధనంతో నిర్మించుకున్నారు వైఎస్ జగన్ మోహన్ రెడ్డి. అదిప్పుడు, విశాఖకు దిష్టిబొమ్మలా తయారయ్యిందన్న చర్చ అంతటా జరుగుతోంది. ఇదంతా అదే విశాఖకు చెందిన గుడివాడ అమర్నాథ్కి తెలియనిది కాదు.
కానీ, టీడీీపీ అధినేత నారా చంద్రబాబు నాయుడు మీద ‘నారా వారి దిష్టిబొమ్మ’ అంటూ దిగజారుడు వ్యాఖ్యలు చేశారు గుడివాడ అమర్నాథ్. వైసీపీ హయాంలో చేసేసినవాటికి చంద్రబాబు క్రెడిట్ తీసేసుకునే ప్రయత్నం చేస్తున్నారన్నది అమర్నాథ్ ఆరోపణ.
భోగాపురం విమానాశ్రయం విషయంలో కావొచ్చు, ఇతరత్రా విషయాల్లో కావొచ్చు.. అవన్నీ 2014-2019 మధ్య ప్రారంభించబడినవే. వైసీపీ హయాంలో ఆ పనులు కొంత మేర కొనసాగి వుండొచ్చు. ప్రభుత్వం శాశ్వతం, ఎవరు అధికారంలో వున్నా. అభివృద్ధి అనేది నిరంతర ప్రక్రియ.
ఇక, దిష్టిబొమ్మల వ్యాఖ్యల విషయానికొస్తే, వైసీపీ దిగజారుడుతనాన్ని ప్రజల గమనిస్తున్నారు. ఈ తీరు కారణంగానే వైసీపీ 11 సీట్లకు పడిపోయింది. వచ్చే ఎన్నికల్లో వైసీపీ సీంగిల్ డిజిట్కి పడిపోవాలని బహుశా వైసీపీ గట్టి ప్రయత్నం చేస్తోందేమో అనిపిస్తోంది గుడివాడ అమర్నాథ్ దిష్టిబొమ్మ వ్యాఖ్యల నేపథ్యంలో.