ఇది ఒక చిత్రం!:
ఇటీవల ఓ యూఎస్ బేస్డ్ రివ్యూయర్ చుట్టూ సోషల్ మీడియాలో, సినీ వర్గాల్లో జరుగుతున్న హడావిడి చూస్తుంటే ఒక ప్రశ్న వస్తోంది. నిజంగా అతడిని పెద్దవాడిని చేస్తున్నది ఎవరు?
ఒక సినిమా నచ్చకపోతే విమర్శించడం, నచ్చితే ప్రశంసించడం రివ్యూయర్ల పని. అదే విధంగా ఆ విమర్శలు తప్పు అనిపిస్తే చట్టపరంగా స్పందించడం నిర్మాతల హక్కు. ఈ రెండు వర్గాల మధ్య ఏదైనా వివాదం ఉంటే వారు చూసుకుంటారు. కానీ మధ్యలో సోషల్ మీడియా యూజర్లు, కొందరు మీడియా హ్యాండిల్స్ మాత్రం ఆ రివ్యూయర్ గురించే రోజంతా పోస్టులు, ట్వీట్లు, వీడియోలు చేస్తూ ఉండటం ఆసక్తికరంగా కనిపిస్తోంది.
అతడిని విమర్శిస్తూ అయినా, తిడుతూ అయినా, అతడి పేరును పదే పదే ప్రస్తావిస్తూ అయినా చివరికి లాభం ఎవరికీ? అతడికే కదా. అతడి ట్యాగ్లు పెట్టడం, హ్యాష్ట్యాగ్లు ట్రెండ్ చేయడం, అతడిపై వీడియోలు చేయడం, ప్రత్యేక కథనాలు రాయడం… ఇవన్నీ చివరికి అతడి రీచ్ను, గుర్తింపును మరింత పెంచేవే.
నిజానికి ఇలాంటి కంటెంట్ క్రియేటర్లకు కావాల్సింది కూడా అదే. ప్రజలు తమ గురించి మాట్లాడాలి. అనుకూలంగా మాట్లాడినా, వ్యతిరేకంగా మాట్లాడినా పేరు వినిపిస్తే చాలు. ఇప్పుడు జరుగుతున్నదీ అదే. కొద్ది రోజుల క్రితం వరకు ఒక వర్గానికే తెలిసిన వ్యక్తి గురించి ఇప్పుడు వేలాది మంది మాట్లాడుతున్నారు. అంటే అతడికి కావాల్సిన మైలేజ్ వచ్చిందన్న మాట.
అతడిని ఎవరూ పట్టించుకోకుండా వదిలేస్తే పరిస్థితి వేరేగా ఉండేది. కానీ ఇప్పుడు చూస్తే విమర్శల కంటే ప్రచారమే ఎక్కువగా కనిపిస్తోంది. కొందరు అతడిని అడ్డుకోవాలనుకుని చేస్తున్న ప్రయత్నాలే అతడికి అదనపు గుర్తింపును తీసుకొస్తున్నాయి.
ఇది మరో విచిత్రం:
పరిశ్రమలో ఇంకో ఆసక్తికరమైన సంస్కృతి కూడా కనిపిస్తుంది. ఎవరైతే ఎక్కువ విమర్శలు చేస్తూ, వివాదాస్పద వ్యాఖ్యలు చేస్తూ కంటెంట్ ఇస్తారో వారికే ఎక్కువ ప్రాధాన్యం దక్కుతుంది. నిర్మాతలు, పీఆర్వోలు, సినిమా వర్గాలు కూడా అలాంటి వారినే ఎక్కువగా పట్టించుకుంటాయి. అన్నిట్లో పెద్ద పీట వారికే వేస్తారు. ఎందుకంటే వారి చుట్టూ ఎప్పుడూ చర్చ ఉంటుంది. వారికి వ్యూస్ ఉంటాయి. రీచ్ ఉంటుంది.
అదే సమయంలో పరిశ్రమ బాగుండాలని, ఎవరికీ నష్టం జరగకూడదని, సమతుల్యంగా వ్యవహరించే మీడియా సంస్థలు లేదా సోషల్ మీడియా హ్యాండిల్స్ మాత్రం చాలాసార్లు పక్కన పడిపోతుంటాయి. నిర్మాతలు, పీఆర్వోలు, సినిమా వర్గాలు గానీ.. వారి వైపు కన్నెత్తి చూడరు. వారి గురించి మాట్లాడేవాళ్లు కూడా తక్కువగానే ఉంటారు.
అందుకే ఇప్పుడు ప్రశ్న ఒక్కటే. విమర్శలతో, వివాదాలతో పేరు తెచ్చుకోవడం మంచిదా? లేక బాధ్యతతో వ్యవహరిస్తూ నిశ్శబ్దంగా పని చేయడం మంచిదా? సమాధానం ఎవరి దృష్టిలో వారిది. కానీ ప్రస్తుతం జరుగుతున్న పరిణామాలు చూస్తే, ఎవరిని విమర్శిస్తున్నామో కంటే… ఆ విమర్శల వల్ల ఎవరికి లాభం కలుగుతుందో కూడా ఒకసారి ఆలోచించాల్సిన అవసరం ఉంది.