పుండు మీద కారం చల్లినట్టుగా డబ్ల్యూహెచ్ఓ తీరు.!

ప్రపంచాన్ని అల్లకల్లోలం చేస్తున్న కరోనా వైరస్ పుట్టుకకు చైనాయే కారణమని పలు దేశాలు మండిపడుతున్నాయి. కుట్రో, పొరపాటో.. ఎలా చూసినా ఈ వైరస్ చైనా నుంచి వచ్చిందనేది నిస్సందేహం. అయితే, ఈ వైరస్ వెలుగు చూసిన తర్వాత ప్రపంచ దేశాలను అప్రమత్తం చేయడంలో చైనా విఫలమైందని, ముందుగానే దీని గురించి ప్రపంచ దేశాలకు చెప్పి ఉంటే, ఇంత నష్టం జరిగి ఉండేదని కాదని పలు దేశాలు పేర్కొంటున్నాయి. అమెరికా అధ్యక్షుడు డోనాల్డ్ ట్రంప్ అయితే చైనా పేరెత్తితే చాలు శివాలెత్తుతున్నారు. ఇది ముమ్మాటికీ చైనా సృష్టేనని మండిపడుతున్నారు.

ఈ విషయాన్ని చెప్పకుండా ప్రపంచ ఆరోగ్య సంస్థ (డబ్ల్యూహెచ్ఓ) కూడా ఘోరం తప్పిదం చేసిందని దుయ్యబట్టారు. డబ్బులు ఇచ్చేది తాము.. కానీ ఆ సంస్థ వంతపాడేది మాత్రం చైనాకు అంటూ ఆగ్రహం వ్యక్తంచేశారు. ఆ సంస్థకు నిధులివ్వడాన్ని కూడా నిలుపుదల చేశారు. అమెరికా ఇంత ఆగ్రహంగా ఉన్నప్పటికీ డబ్ల్యూహెచ్ఓ చీఫ్ టెడ్రస్ మాత్రం అందులో మరింత ఆజ్యం పోసేలా వ్యవహరించారు. ట్రంప్ కు చురకలు వేసేలా వ్యాఖ్యలు చేశారు. తాజాగా డబ్ల్యూహెచ్ఓ సంచలన వ్యాఖ్యలు చేసింది. కరోనా వైరస్ ను చైనా అద్భుతంగా కట్టడి చేసిందని, సమాజం తిరిగి మామూలు స్థితికి ఎలా చేరిందో వూహాన్ ను చూసి నేర్చుకోవాలంటూ డబ్ల్యూహెచ్ఓ ప్రతినిధి మరియా వ్యాఖ్యానించారు. ‘చైనా నుంచి ప్రపంచం చాలా నేర్చుకోవాలి.

ఆంక్షలు ఎలా ఎత్తివేయాలో, సమాజాన్ని తిరిగి సాధారణ స్థితికి ఎలా తీసుకురావాలో వూహాన్ ను చూసి నేర్చుకోవాలి. ప్రస్తుతం ఇక్కడ కేసులు ఏమీ లేకపోవడం స్వాగతించతగ్గ పరిణామం’ అని ఆమె పేర్కొన్నారు. ఇప్పటికే చైనాపై ట్రంప్ ఆగ్రంతో రగలిపోతున్న తరుణంలో మరియా వ్యాఖ్యలు పుండు మీద కారం చల్లినట్టుగా మారాయి. డ్రాగన్ కంట్రీపై ప్రతికారం తప్పదని, ఆ దేశంపై అదనపు సంకాలు విధించడం తమ ముందున్న ఓ మార్గమని ట్రంప్ పేర్కొన్నారు. మొత్తానికి ప్రపంచానికి ప్రతినిధి వ్యవహరించాల్సిన డబ్ల్యూహెచ్ఓ.. ఎన్ని విమర్శలు వస్తున్నా, చైనాకే వత్తాసు పలకడంపై తీవ్రంగా విమర్శలు వ్యక్తమవుతున్నాయి.