కరోనాను అంతం చేయడం అంత వీజీ కాదు!

చిన్న, పెద్ద, ధనిక, పేద తారతమ్యాలు లేకుండా అందరినీ కబళిస్తున్న కరోనా మహమ్మారి ఎప్పటికి అంతమవుతుంది? ప్రపంచానికే పెనుసవాల్ గా మారిన ఈ వైరస్ అంతు చూడటం ఎలా? ప్రస్తుతం అందరి ముందున్న పెద్ద టాస్క్ ఇదే. కంటికి కనిపించని ఈ అతిపెద్ద శత్రువు మొత్తం ప్రపంచాన్నే తీవ్రంగా వణికిస్తోంది. శాస్త్రవేత్తలు ప్రయోగాలలో తలమునకలై ఉన్నా.. దీన్ని ఎదుర్కొనే మందు కనుక్కోలేకపోతున్నారు.

ఈ మాయల మహమ్మారి ఎప్పటికప్పుడు తన సామర్థ్యాన్ని మెరుగుపరుచుకోవడంతో దీనికి విరుగుడు కనుక్కోవడం శక్తికి మంచిన పనిగా మారింది. వేసవిలో దీని ప్రతాపం తగ్గుతుందని భావించినా.. అది కూడా జరగడంలేదు. ఈ నేపథ్యంలో కరోనా.. అసలు అంతమవుతుందా లేదా అనే సందేహాలు ప్రతి ఒక్కరినీ పట్టిపీడిస్తున్నాయి.

కరోనాకు మందు కనుక్కునే వరకు దానితో కలిసి జీవించడం అలవాటు చేసుకోవాల్సిందేనని సీఎంల దగ్గర నుంచి ప్రధాని వరకు పలువురు తేల్చి చెప్పేశారు. తాజాగా ప్రపంచ ఆరోగ్య సంస్థ (డబ్ల్యూహెచ్ఓ) కూడా అదే మాట చెప్పింది. కరోనా మహమ్మారిని ప్రపంచం నుంచి తరిమి కొట్టడం సాధ్యం కాదని చేతులెత్తేసింది. కరోనాను నిర్మూలించడం ఇప్పట్లో సాధ్యమయ్యే పని కాదని డబ్ల్యూహెచ్ఓ అత్యవసర విభాగం అధిపతి మైకేల్ ర్యాన్ స్పష్టంచేశారు.

చాలాదేశాలు లాక్ డౌన్ సడలింపులు ఇస్తున్న నేపథ్యంలో ఇక ఈ వైరస్ తో కలిసి జీవించడం అలవాటు చేసుకోవడం తప్ప మరో మార్గం లేదని పేర్కొన్నారు. చైనాలో మొదలైన ఈ వైరస్.. ప్రపంచం మొత్తం పాకడానికి కారణం డబ్ల్యూహెచ్ఓయే అని అమెరికా సహా పలు దేశాలు విరుచుకుపడుతున్న నేపథ్యంలో ఆ సంస్థ ఇలాంటి వ్యాఖ్యలు చేయడం చర్చనీయాంశమైంది.

చైనాలో ఈ వైరస్ మొదలైన తొలినాళ్లలోనే దీనికి సంబంధించి సరైన సమాచారం ఇచ్చి ఉంటే ప్రపంచం ప్రస్తుతం ఈ పరిస్థితిలో ఉండేది కాదని పలు దేశాలు డబ్ల్యూహెచ్ఓపై మండిపడుతున్నాయి. ఈ విషయంలో డబ్ల్యూహెచ్ఓను చైనా బెదిరించిందని తాజాగా సీఐఏ నివేదిక పేర్కొనడం సంచలనంగా మారింది.