తెలంగాణలో ‘వైట్’ ఛాలెంజ్: రాజకీయాల్లో ఎవరు సుద్దపూసలు.?

రాజకీయ నాయకులు తెలుపు వస్త్రాలు ధరిస్తుంటారు. తెలుపు అనేది స్వచ్ఛతకు గుర్తు. మరి, రాజకీయ నాయకులంతా స్వచ్ఛమేనా.? స్వచ్ఛమైన రాజకీయాలే చేస్తున్నారా.? ఇప్పుడీ ‘తెలుపు’ చర్చ ఎందుకు.? అంటే, ‘వైట్ ఛాలెంజ్’ అంటూ తెలంగాణ పీసీసీ అధ్యక్షుడు, ఎంపీ రేవంత్ రెడ్డి సరికొత్త సంచలనానికి తెరలేపారు గనుక.

సినీ పరిశ్రమకు చెందిన పలువురు ప్రముఖులు డ్రగ్స్ కేసులో ఆరోపణలు ఎదుర్కొంటున్న విషయం విదితమే. తెలంగాణలో కలకలం రేపుతున్న ఘటన ఇది. ఈ వ్యవహారం చుట్టూ రాజకీయ రచ్చ జరుగుతోంది. డ్రగ్స్ కేసులోంచి కొందర్ని తెలంగాణ ఎక్సైజ్ శాఖ తప్పించిందన్నది రేవంత్ రెడ్డి ఆరోపణ. అలా తప్పించడానికి రాజకీయ కారణాలున్నాయంటే, తెలంగాణ మంత్రి కల్వకుంట్ల తారకరామారావుని టార్గెట్ చేశారు రేవంత్ రెడ్డి. ఇరువురి మధ్యా మాటల యుద్ధం నడుస్తోంది. అదిప్పుడు ‘వైట్ ఛాలెంజ్’ వరకూ తీసుకొచ్చింది.

తాను ఏ ఆసుప్రతికి వెళ్ళి అయినా డ్రగ్స్ విషయమై వైద్య పరీక్షలకు సిద్ధమనీ, మంత్రి కేటీయార్ అందుకు సిద్ధమా.? అని రేవంత్ రెడ్డి సవాల్ విసిరారు. కేటీయార్ మాత్రమే కాదు, కేసీయార్ మీద కూడా తీవ్రస్థాయి దూషణలకు దిగుతున్నారు రేవంత్ రెడ్డి. అట్నుంచి కూడా అంతే స్థాయిలో దూషణల్ని ఎదుర్కోవాల్సి వస్తోంది రేవంత్ రెడ్డికి.

కాగా, రేవంత్ విసిరిన సవాల్ విషయమై స్పందించిన కేటీయార్, తాను ఢిల్లీ ఎయిమ్స్‌లో వైద్య పరీక్షలకు సిద్ధమనీ, కాంగ్రెస్ ముఖ్య నేత రాహుల్ గాంధీ కూడా ఆ పరీక్షలకు సిద్ధమవుతారా.? అని కేటీయార్ ఎదురు ప్రశ్నించారు. విషయం ఎట్నుంచి ఎటో వెళ్ళిపోతోంది. తెలంగాణ రాష్ట్ర సమితి నేత ఎంపీ సంతోష్ కుమార్ గ్రీన్ ఛాలెంజ్ పేరుతో మొక్కలు నాటడం అనే గొప్ప కార్యక్రమానికి శ్రీకారం చుట్టిన విషయం విదితమే. పలువురు సెలబ్రిటీలు ఈ ఛాలెంజ్‌లో పాలుపంచుకుంటున్నారు. అదే బాటలో ఇప్పుడు రేవంత్ రెడ్డి, వైట్ ఛాలెంజ్ అంటున్నారు.

మాజీ ఎంపీ కొండా విశ్వేశ్వర్ రెడ్డి, కేసీయార్ తదితరుల్ని రేవంత్ రెడ్డి నామినేట్ చేశారు. ఈ నేపథ్యంలో ఈ ‘వైట్ ఛాలెంజ్’కి గ్రీన్ ఛాలెంజ్ తరహాలో రాజకీయ, సినీ ప్రముఖుల నుంచి స్పందన వస్తుందా.? అన్నది చర్చనీయాంశమయ్యింది. అయితే, ఓటుకు నోటు కేసులో అడ్డంగా దొరికిపోయిన రేవంత్ రెడ్డి విసిరే వైట్ ఛాలెంజ్‌లో అర్థమేముందన్నది ఓ చర్చ.

అయినాగానీ, ఛాలెంజ్ అయితే ఆహ్వానించదగ్గదే. వైట్ ఛాలెంజ్.. డ్రగ్స్ లేని తెలంగాణ.. డ్రగ్స్ లేని భారతదేశం.. మంచి ఆలోచనే ఇది. కానీ, అందుకు అంగీకరించేదెవరు.? ఎవరు రాజకీయాల్లో సుద్దపూసలు.? సినీ పరిశ్రమలో సుద్దపూసలెంతమంది.? వేచి చూడాల్సిందే.