పవన్ కళ్యాణ్‌కి స్వాతంత్ర్యం ఎప్పుడొస్తుంది.?

మంత్రి గుడివాడ అమర్నాథ్, జనసేన అధినేత పవన్ కళ్యాణ్ మీద ఘాటైన విమర్శలు చేశారు. ‘టీడీపీ నుంచి జనసేనకు.. చంద్రబాబు నుంచి పవన్ కళ్యాణ్‌కీ ఎప్పుడు స్వాతంత్ర్యం లభిస్తుంది.?’ అన్నది మంత్రి గుడివాడ అమర్నాథ్, స్వాతంత్ర్య దినోత్సవం రోజున సంఘించిన ప్రశ్న.

పవన్ కళ్యాణ్‌కి ప్రత్యేకంగా స్వాతంత్ర్యం రావడమేంటి.? అంటే, మంత్రి గనుక.. మీడియా మైకులున్నాయి గనుక.. ఏం మాట్లాడినా చెల్లిపోతుందనుకుంటే ఎలా.? ఆ మధ్య, ‘నేను పవన్ కళ్యాణ్‌తో ఫొటో దిగడం కాదు, నేనే సెలబ్రిటీని.. ఆయనే వచ్చి నాతో ఫొటో దిగారు..’ అంటూ పెద్ద కామెడీనే చేశారు గుడివాడ అమర్నాథ్. సో, అలాంటి గుడివాడ అమర్నాథ్, స్వాతంత్ర్యం గురించి ఇలాంటి చిల్లర పొలిటిలక్ కామెడీలు చేస్తే అందులో వింతేముంది.?

అసలు స్వాంతంత్ర్యం ఇప్పుడు కావాల్సింది ఎవరికి.? ఆంధ్రప్రదేశ్ రాజధాని అమరావతికి రాజకీయ కబంధ హస్తాల నుంచి స్వాతంత్ర్యం కావాలి.! రాజధాని కోసం భూములిచ్చిన రైతుల గొంతు నొక్కేస్తున్న రాక్షస ప్రభుత్వం నుంచి స్వాతంత్ర్యం కావాలన్నది సర్వత్రా వినిపిస్తోన్న వాదన.

గుడివాడ అమర్నాథ్ తానేదో గొప్ప కౌంటర్ ఎటాక్ చేసేశారని అనుకున్నారుగానీ, జనసేన వైపు నుంచి ‘స్వాతంత్ర్యం’ పేరుతో వస్తున్న ప్రశ్నలకు వైఎస్సార్ కాంగ్రెస్ పార్టీలో ఆయనే కాదు, ఇంకెవరూ సమాధానమివ్వలేని పరిస్థితి వచ్చింది. సీపీఎస్ రద్దు చేస్తామంటూ మాట తప్పిన పాలకుల నుంచి స్వాతంత్ర్యం కావాలన్నది ఉద్యోగులు నినదిస్తున్న అంశం.

అన్నిటికీ మించి, ప్రభుత్వమే అత్యంత ప్రతిష్టాత్మకంగా తీసుకొచ్చి, రద్దు చేసిన మూడు రాజధానుల బిల్లుకీ స్వాతంత్ర్యం కావాలి. ప్రత్యేక హోదాకి స్వాతంత్ర్యం కావాలి. పోలవరం ప్రాజెక్టుకీ, కడప స్టీలు ప్లాంటుకీ.. ఇలా చెప్పుకుంటూ పోతే, వైసీపీ రాజకీయానికి బలైపోయిన చాలా అంశాలకు స్వాతంత్ర్యం కావాల్సి వుంటుందిప్పుడు.

పవన్ కళ్యాణ్‌కి వచ్చిన సమస్య ఏమీ లేదు. ఆయన నిజానికి స్వేచ్ఛా జీవి. అటు సినిమాలు, ఇటు రాజకీయాలు.. ఆయనకొచ్చిన ఇబ్బంది ఏమీ లేదు.. వుండదు కూడా. ఆయన ప్రజల్లో మార్పు కోసం రాజకీయ ఉద్యమం చేస్తున్నారు. బులుగు పాలన నుంచి ప్రజల్ని విముక్తి చేయడానికి ప్రయత్నిస్తున్నారు. ఇదీ జనసేన చెబుతున్నమాట.

గడప గడపకీ వెళుతోంటే, గరిటె తిరగేసి మరీ పంపుతున్నారు ప్రజా ప్రతినిథుల్ని ప్రజలు. ఆ ప్రజా ప్రతినిథులకు స్వాతంత్ర్యం కావాలేమో.. వైసీపీ ఒక్కసారి తనను తాను ప్రశ్నించుకుంటే మంచిది.!