వాట్‌ నెక్స్‌ట్‌.. లాక్‌డౌన్‌ ఎత్తేస్తారా.? కొనసాగిస్తారా.?

కరోనా వైరస్‌ నేపథ్యంలో దేశవ్యాప్తంగా నెలకొన్న లాక్‌డౌన్‌ పరిస్థితి నుంచి ఉపశమనం దొరుకుతుందా.? లాక్‌డౌన్‌పై పొడిగింపు వైపే ప్రధాని నరేంద్రమోడీ మొగ్గు చూపుతారా.? ‘బతికుంటే బలుసాకు తినొచ్చు’ అని గతంలో చెప్పిన నరేంద్ర మోడీ, ఇప్పుడేమో, ‘ప్రాణంతోపాటు.. జీవనం కూడా అవసరమే..’ అని అంటున్నారు. దానర్థం, లాక్‌డౌన్‌ నుంచి సడలింపులు వుంటాయనే.! రేపు ఉదయం 10 గంటలకు ఈ అంశంపై పూర్తిస్థాయి స్పష్టత వస్తుంది.

రేపటితో 21 రోజుల లాక్‌డౌన్‌ ముగియనున్న దరిమిలా, ప్రధాని నరేంద్ర మోడీ రేపు ఉదయం 10 గంటలకు జాతిని ఉద్దేశించి ప్రసంగించబోతున్నారు. మెజార్టీ రాష్ట్రాలు లాక్‌డౌన్‌ పొడిగింపు వైపే మొగ్గు చూపుతున్నాయి. ఇప్పటికే పలు రాష్ట్రాలు తమ తమ రాష్ట్రాల్లో లాక్‌డౌన్‌ని ఏప్రిల్‌ 30వ తేదీ వరకూ పొడిగిస్తూ నిర్ణయం తీసుకున్న విషయం విదితమే.

అయితే, ఆంధ్రప్రదేశ్‌ తదితర కొన్ని రాష్ట్రాలు మాత్రం, ‘జోన్ల వారీగా’ నిర్ణయాలు తీసుకోవాలంటూ ప్రధాని నరేంద్ర మోడీకి విజ్ఞప్తి చేశాయి. కేసుల తీవ్రత అధికంగా వున్న చోట లాక్‌డౌన్‌ కొనసాగిస్తూ, మోస్తరు తీవ్రత వున్న ఆరెంజ్‌ జోన్లలో కొంత వెసులుబాటు కల్పించి, అస్సలేమాత్రం కరోనా ప్రభావం లేని గ్రీన్‌ జోన్లలో ఇంకాస్త ఎక్కువ వెసులుబాటు కల్పించాలన్నది ఆంధ్రప్రదేశ్‌ ముఖ్యమంత్రి వైఎస్‌ జగన్‌ మోహన్‌రెడ్డి, ప్రధాని నరేంద్ర మోడీకి చేసిన విజ్ఞప్తి తాలూకు సారాంశం.

రాష్ట్రాల ముఖ్యమంత్రులతో ఇటీవల ప్రధాని నిర్వహించిన వీడియో కాన్ఫరెన్స్‌ తర్వాత.. కేంద్రంలో ఆయా అంశాలపై పూర్తిస్థాయి చర్చ జరిగింది. దేశ ఆర్థిక పరిస్థితి, రాష్ట్రాల ఆర్థిక పరిస్థితి అత్యంత అధ్వాన్న స్థితికి దిగజారిపోయిన దరిమిలా, లాక్‌డౌన్‌ ‘సడలింపు’పై సానకూల నిర్ణయమే కేంద్రం నుంచి రావొచ్చన్న చర్చ జరుగుతోంది. కానీ, అలా చేస్తే.. కరోనా వైరస్‌ తీవ్రత మళ్ళీ మొదటికే వచ్చే ప్రమాదముంది. ఏమో, మోడీ మనసులో ఏముందో.. రేపు ఉదయం 10 గంటలకల్లా తేలిపోతుంది. అప్పటిదాకా సస్పెన్స్‌ తప్పదంతే.