ఫాఫం వైసీపీ.! 175 సీట్లలో జనసేన పోటీ చేస్తే వాళ్ళకి ‘హార్ట్ ఎటాక్’ వచ్చేస్తుందేమో.!

ఐటీ శాఖ మంత్రి ఆయన.. కానీ, జనసేన అధినేత పవన్ కళ్యాణ్‌ని విమర్శించడమొక్కటే ఆయన బాధ్యత.. అన్నట్లు మారింది. నీటి పారుదల శాఖ మంత్రి ఆయన.. కానీ, జనసేన అధినేత మీద విరుచుకుపడేందుకు నీటి పారుదల శాఖ కాస్తా, నోటి పారుదల శాఖగా ఆయనకు మారిపోయినట్టుంది.!

ఐటీ శాఖ మంత్రి గుడివాడ అమర్నాథ్, తన శాఖకు సంబంధించి రాష్ట్రం ఎలా తమ హయాంలో ఉద్ధరణకు గురవుతుందో మాత్రం చెప్పరు. విశాఖపట్నంకు ఎలాంటి ఐటీ పరిశ్రమలు వస్తున్నాయో చెప్పరుగానీ, ఆయనకి జనసేన అధినేత పవన్ కళ్యాణ్ ఎవరితో పొత్తు పెట్టుకుంటారో తెలుసుకోవడం ముఖ్యం. నోటి పారుదల శాఖ.. అదేనండీ నీటి పారుదల శాఖ మంత్రి కూడా అంతే. ఆయనకు డయాఫ్రమ్ వాల్ అంటే తెలియదుగానీ, జనసేన పార్టీ పోటీ చేయబోయే నియోజకవర్గాల సంఖ్య గురించి తెలుసుకోవడం మీద ఆయనకు అమితమైన మమకారం.

తాజాగా, మినిస్టర్ అంబటి రాంబాబు సోషల్ మీడియా వేదికగా ‘కాటన్ దుస్తుల ఛాలెంజ్లు ఆపి.. 175 సీట్లకి పోటీ చేస్తున్నారా! లేదా? ఇండిపెండెన్స్ డే రోజునైనా ప్రకటించండి పవన్ కళ్యాణ్..’ అంటూ ట్వీటేశారు. జనసేన ఎన్ని సీట్లలో పోటీ చేయాలన్నది ఆ పార్టీ అధినేత తీసుకునే నిర్ణయాన్ని బట్టి ఆధారపడి వుంటుంది.
2014 ఎన్నికల సమయంలో పుట్టిన ఆ పార్టీ, ఆ ఎన్నికల్లో పోటీ చేయలేదు. 2019 ఎన్నికల్లో పోటీ చేసింది, 2024 ఎన్నికల్లో కూడా పోటీ చేస్తుంది. గెలుపోటములు వేరే చర్చ. కరెన్సీ నోట్లతో ఓటర్లను ప్రలోభ పెట్టకుండా రాజకీయం చేయాలన్నది జనసేన ఉద్దేశ్యం. ఈ క్రమంలో ఓటమి కూడా ఎంతో గౌరవంగా వుంటుంది.

151 సీట్లు గెలిచి అధికార పీఠమెక్కిన వైసీపీ ఏం చేయగలిగింది.? ప్రత్యేక హోదా తెచ్చిందా.? పోలవరం ప్రాజెక్టు పూర్తి చేసిందా.? రేప్పొద్దున్నన 175 సీట్లు గెలుస్తామంటున్నారు.. ఒకవేళ అదే జరిగితే, మూడు కాదు, ముప్ఫయ్ మూడు రాజధానులంటారేమో. అప్పుడైనా ప్రత్యేక హోదా తేగలరా, పోలవరం ప్రాజెక్టు పూర్తి చేయగలరా.?

ముందైతే అంబటి రాంబాబు, డయాఫ్రమ్ వాల్ గురించి తెలుసుకుని, ఆ తర్వాత జనసేన పోటీ చేయబోయే నియోజకవర్గాల సంఖ్య గురించి తెలసుకుంటే మంచిది. ‘మీరు ఆ దుస్తులు విప్పి గంట అరగంట ఇంకేమైనా చేసే పనులు ఆపి, ఇప్పటికైనా పోలవరం, వెలిగొండ లాంటి ప్రాజెక్టులు పూర్తి చేసే డేట్స్ ప్రకటించండి అంబటి రాంబాబుగారూ..’ అంటూ జనసేన మహిళా నేత రాయపాటి అరుణ ఎద్దేవా చేశారంటే, అసలు వైసీపీ స్థాయి ఏంటనేది అర్థమయిపోవడంలేదూ.?