చైనాతో యుద్ధమా.? రాజకీయాలొద్దు ప్లీజ్‌.!

కరోనా మహమ్మారి ప్రపంచాన్ని వణికిస్తున్న వేళ చైనా – భారత్‌ మధ్య యుద్ధ మేఘాలు కమ్ముకుంటున్నాయి. చైనాలోనే పుట్టిన కరోనా వైరస్‌ పట్ల అగ్రరాజ్యం అమెరికా గుర్రుమంటోన్న విషయం విదితమే. అసలు ఆ వైరస్‌ పుట్టు పూర్వోత్తరాలేంటన్నదానిపై విచారణ జరగాల్సిందేనని ప్రపంచ దేశాలతోపాటు భారతదేశం కూడా నినదించడం చైనాకి ఆగ్రహం తెప్పిస్తోంది. ఈ కారణంగానే, సరిహద్దుల్లో కవ్వింపులు షురూ చేసింది. పొరుగునున్న నేపాల్‌ని కూడా భారతదేశం మీదకి ఎగదోస్తోంది చైనా. పాకిస్తాన్‌ – చైనాల మధ్య స్నేహం గురించి తెలియనిదెవరికి.? వెరసి, భారతదేశానికి సరిహద్దుల్లో శతృవులు పెరిగిపోతున్నారన్నమాట.

భారత భూభాగానికి సమీపంలో చైనా, భారీ స్థాయిలో సైన్యాన్నీ, ఆయుధాల్ని మోహరిస్తోంది. ‘ఏ క్షణాన అయినా చైనా, భారతదేశం మీద యుద్ధం ప్రకటించవచ్చు..’ అనేలా వుంది పరిస్థితి. మరోపక్క, సరిహద్దుల్లో చోటు చేసుకుంటున్న పరిణామాలపై ప్రధాని నరేంద్ర మోడీ అత్యవసర సమావేశాన్ని ఏర్పాటు చేశారు.. కీలక విభాగాలతో. రక్షణ సలహాదారు అజిత్‌ దోభాల్‌ కూడా ఈ సమావేశంలో పాల్గొన్నారు.

అయితే, పాకిస్తాన్‌పై సర్జికల్‌ స్ట్రైక్స్‌ నిర్వహించినంత తేలిక కాదు, చైనాతో వ్యవహారం. ఆయుధ సంపత్తి పరంగా చూసుకుంటే, చైనా కంటే భారత్‌ వెనుకబడి వుందన్నది నిర్వివాదాంశం. అదే సమయంలో, యుద్ధమంటూ జరిగితే చైనాకి ధీటుగా బదులివ్వగల సత్తా భారతదేశానికి వుంది. అయినాగానీ, ప్రస్తుత పరిస్థితుల్లో యుద్ధం ఇరు దేశాలకీ మంచిది కాదు. మరీ ముఖ్యంగా భారతదేశానికి అసలే మంచిది కాదు.

కానీ, సరిహద్దుల్లో చైనా కవ్వింపులు ముదిరి పాకాన పడుతున్నాయి. చాలా ఏళ్ళ క్రితమే భారత్‌లో కొంత భాగాన్ని ఆక్రమించుకున్న చైనా, ఇప్పుడు కొత్త వివాదాల్ని తెరపైకి తెస్తోంది. పాక్‌ ఆక్రమిత కాశ్మిర్‌ అని ఎలా అంటున్నామో, చైనా ఆక్రమిత కాశ్మీర్‌ కూడా వుంది.. అదే అక్సాయ్‌ చిన్‌. దానికి సమీపంలో, భారతదేశంలో వున్న ప్రాంతాలూ తమవేనని చైనా అంటోంది. చైనాతో దౌత్యపరంగా చేయడానికేమీ వుండదు. ఎందుకంటే, చైనా బుద్ధి ఎప్పటికీ మారదు.

ఇదిలా వుంటే, పాకిస్తాన్‌పై సర్జికల్‌ స్ట్రైక్స్‌ని నరేంద్ర మోడీ ప్రభుత్వం ఎంత రాజకీయం చేసిందో చూశాం. గత ఎన్నికల్లో ఆ సర్జికల్‌ స్ట్రైక్స్‌ అంశాన్ని అత్యద్భుతంగా వాడేసుకున్నారు కమలనాథులు. ఇప్పుడూ అదే స్థాయి రాజకీయానికి తెరలేపారన్న విమర్శలు విపక్షాల నుంచి వెల్లువెత్తుతున్నాయి.

‘దౌత్యం’లో మోడీ సర్కార్‌ విఫలమయ్యిందని కాంగ్రెస్‌ విమర్శిస్తోంది. కాంగ్రెస్‌ కావొచ్చు, మరో రాజకీయ పార్టీ కావొచ్చు.. ఈ సందర్భంలో రాజకీయ విమర్శలు చేయడం ఎంతవరకు సబబు.? అన్న చర్చ సర్వత్రా జరుగుతోంది. ఏదిఏమైనా, భారతదేశం ఏదన్నా సంక్షోభం ఎదుర్కొంటున్నప్పుడే ఇలాంటి సరిహద్దు సమస్యలు ఎందుకు వస్తుంటాయో ఏమో.!