వాలంటీర్లు.. ఏపీకి వెన్నెముకే..!

ఆంధ్రప్రదేశ్ లోని గ్రామ వాలంటీర్ల వ్యవస్థ ఇప్పుడు బాగా అక్కరకొస్తోంది. ప్రభుత్వ పథకాలు అర్హులకు చేరవేయడంలోనూ, క్షేత్రస్థాయిలో పరిస్థితి ఎప్పటికప్పుడు ప్రభుత్వానికి తెలియజేయడంలోనూ వాలంటీర్లు ఎంతగానో ఉపయోగపడుతున్నారు. కరోనా కేసులు నెమ్మదిగా పెరుగుతున్న నేపథ్యంలో వాటిని నివారించే చర్యల్లోనూ వీరి భాగస్వామ్యం విశేషంగా ఉంది.

ఎన్నికలకు ముందుగానే తాను అధికారంలోకి వస్తే గ్రామ వాలంటీర్ల వ్యవస్థను తీసుకొస్తానంటూ వైఎస్సార్ సీపీ అధినేత వైఎస్ జగన్ మోహన్ రెడ్డి హామీ ఇచ్చారు. చెప్పినట్టుగానే అధికారంలోకి వచ్చిన మూడు నెలల్లనే దాదాపు నాలుగున్నర లక్షల మంది వాలంటీర్లను నియమించారు. అయితే, వైఎస్సార్ సీపీ కార్యకర్తలకే ఈ ఉద్యోగాలు ఇచ్చారంటూ ప్రతిపక్షాలు విమర్శలు కూడా చేశాయి.

ఈ విషయాన్ని అలా పక్కన పెడితే.. దేశంలో ఏ రాష్ట్రానికీ లేని ఈ వాలంటీర్ల వ్యవస్థ ఏపీ సర్కారుగా తిరుగులేని బలంగా మారింది. ఇందులో నియమితులైనవారంతా యువతీ యువకులే కావడం.. ఒక్కొక్కరి పరిధిలో కేవలం 50 ఇళ్లు మాత్రమే ఉండటంతో ప్రతి పనీ చకచకా సాగిపోతోంది. ప్రస్తుతం కరోనా సంబంధిత వివరాలు తెలుసుకోవడానికి కూడా గ్రామ వాలంటీర్ల సేవలు చక్కగా ఉపయోగపడుతున్నాయి.

ఇటీవల కాలంలో విదేశాల నుంచి వచ్చినవారి వివరాలు తెలుసుకునే బాధ్యతను ప్రభుత్వం వీరికే అప్పగించింది. దీంతో దాదాపు 12వేల మంది విదేశాల నుంచి వచ్చినట్టు వెల్లడైంది. వెంటనే అప్రమత్తమైన ప్రభుత్వం వారి ఇళ్లకు ఆశా వర్కర్లు, ఏఎన్ఎంలను పంపించి పరీక్షలు నిర్వహించింది. అనుమానిత లక్షణాలనున్నవారిని క్వారంటైన్ కు తరలించింది.

దీంతో గ్రామ వాలంటీర్ల వ్యవస్థ బాగుందంటూ జాతీయ మీడియాలో కూడా కథనాలు వచ్చాయి. మొత్తానికి గ్రామ వాలంటీర్లు ఏపీకి వెన్నెముకగా మారారు. అయితే, చేయించుకుంటున్న పనితో పోలిస్తే వీరికి ఇచ్చే వేతనం తక్కువనే అభిప్రాయాలు ఉన్నాయి. దీనిపైనా సర్కారు కాస్త దృష్టి పెడితే బాగంటుంది.