విశాఖ రైల్వే జోన్‌పై వైసీపీ చిత్తశుద్ధి ఇంతేనా.?

ప్రత్యేక హోదా ఎటూ రాదు. పోనీ, ప్రత్యేక రైల్వే జోన్ అయినా వచ్చే అవకాశం వుంది గనుక, దాన్ని వీలైనంత త్వరగా అమల్లోకి తెచ్చేలా చూడొచ్చు కదా.? 2019 ఎన్నికలకు కొద్ది నెలల ముందు ప్రత్యేక రైల్వే జోన్ అంశంలో కదలిక వచ్చింది.. దాంతో, బీజేపీ శ్రేణులు చేసిన యాగీ అంతా ఇంతా కాదు. అప్పటికీ, ఇప్పటికీ.. అంటే, గడచిన రెండున్నరేళ్ళలో ఏం మారిందని.? ఏమీ మారలేదు. విశాఖ రైల్వే జోన్ వ్యవహారం ఎక్కడిదాకా వచ్చింది.? అంటే, అప్పుడెక్కడుందో, ఇప్పుడూ అక్కడే వుందని కేంద్రం తాపీగా పాత మాటే చెప్పింది సరికొత్తగా.

ప్రత్యేక రైల్వే జోన్ వైఫల్యం పూర్తిగా రాష్ట్రంలో అధికారం వెలగబెట్టిన, వెలగబెడ్తున్న పార్టీలదే. ఇందులో ఇంకో మాటకు తావు లేదు. ఈ పాపంలో అసలు భాగం బీజేపీదేననుకోండి.. అది వేరే సంగతి. చంద్రబాబు హయాంలో విశాఖ రైల్వే జోన్ కాస్తా, గుంటూరు లేదా విజయవాడ రైల్వే జోన్ తరహాలో మార్చేందుకు తెరవెనుకాల ప్రయత్నాలు జరిగాయి. దాంతో, విశాఖ రైల్వే జోన్ అంశం ఆలస్యమయ్యింది.

నిజానికి, బీజేపీ చెప్పిన కుంటి సాకుల్లో.. ‘కమ్మ జోన్’ అనే వాదన కూడా ఒకటి. విశాఖ రైల్వే జోన్ అమల్లోకి తీసుకురావడం అనేది నిజానికి కేంద్రానికి చాలా చాలా చిన్న విషయం. కానీ, ఇందులో కూడా మోడీ సర్కార్ రాజకీయ లబ్ది కోసమే చూస్తోంది. లేకపోతే, ఏడేళ్ళుగా రైల్వే జోన్ అంశం ఎక్కడ వేసిన గొంగళి అక్కడే అన్నట్లు తయారైతే.. అసలు దేశంలో పరిపాలన అనేది వుందా.? రాష్ట్రాన్ని పరిపాలిస్తున్న పార్టీలు ఏం సాధిస్తున్నాయి.? అన్న అనుమానాలు కలగకుండా వుండవు.

పార్లమెంటు సాక్షిగా గత కొద్ది రోజులుగా వైసీపీ ఎంపీలు పోరాటం (?!) చేసేస్తున్నారు. వీరి ఆరాటం, వైసీపీ రెబల్ ఎంపీ రఘురామకృష్ణరాజు మీద అర్హత వేటు కోసం తప్ప, రాష్ట్రం కోసం కానే కాదు. లేకపోతే, రైల్వే జోన్ అంశంపై ఎందుకు పార్లమెంటు సాక్షిగా ఆందోళన చేయలేకపోతున్నారు వైసీపీ ఎంపీలు.? రాష్ట్రంలో అధికార పార్టీగా వైసీపీ, రాష్ట్రం నుంచి రైల్వే జోన్ విషయమై ఉద్యమ నేతల్ని ఢిల్లీకి తీసుకెళ్ళి ఆందోళన చేయొచ్చు.

కానీ, అలా చేస్తే.. బీజేపీ అధిష్టానానికి కోపమొస్తుంది. అందుకే, తూతూ మంత్రం ఆందోళనలు తప్ప, చిత్తశుద్ధితో ఏ విషయమ్మీదా వైసీపీ మాట్లాడలేకపోతోంది.. అదే రాష్ట్రానికి శాపంగా మారుతోంది. అప్పుడు టీడీపీ, ఇప్పుడు వైసీపీ.. ఏమీ మారలేదు.. రాష్ట్ర ప్రజల తల రాత అస్సలు మారడంలేదు.