అక్కడ అడుగు పెడితే ఇక అంతేనా…?

వైజాగ్ ఎల్జీ పాలిమర్స్ లో జరిగిన పెనువిషాదం యావత్ దేశాన్నే ఉలికిపాటుకు గురిచేసింది. సుమారు పన్నెండు మంది మృత్యువాత పడిన ఈ ఘటనలో కొన్నివందలమంది బాధితులు ఇంకా వివిధ ఆస్పత్రుల్లో చికిత్స పొందుతూనే ఉన్నారు. వైసీపీ అధికారం చేపట్టిన నాటి నుండి గోదావరి బోటు ప్రమాదం వంటి పెనువిషాదాలు రాష్ట్రంలో కొన్ని చోటుచేసుకున్నప్పటికీ నాడు వ్యక్తిగతంగా బాధితులను పరామర్శించని ముఖ్యమంత్రి జగన్ ఈ ఘటనకు మాత్రం చాలా వేగంగా స్పందించటం విశేషం.

హుటాహుటిన వైజాగ్ బయలుదేరి వెళ్లిన జగన్, బాధితుల్లో భరోసా నింపే ప్రయత్నం చేశారు. కోటిరూపాయల సాయం ప్రకటించి ప్రతిపక్షాలకు సైతం షాకిచ్చారు. అయితే ఈ కోటి సాయం వెనక ఉన్న పరిణామాలు, జరిగిన ప్రమాదంపై రాష్ట్ర ప్రభుత్వ చర్యల్ని పట్టించుకోకుండా నేరుగా ప్రధాని కార్యాలయం ఇన్ వాల్వ్ అయి విచారణ జరుపుతున్న తీరూ, ఈ ఘటనలో నిర్లక్ష్యం వహించిన కంపెనీపై కఠిన చర్యలు ఎందుకు లేవన్న విమర్శలూ గ్యాస్ కంటే వేగంగానే వ్యాపిస్తున్నాయి.

అయితే వీటన్నింటినీ మనం కాసేపు పక్కనబెడితే జగన్ వైజాగ్ పర్యటన ఇప్పుడు ఇంకోరకంగా కూడా హాట్ టాపిక్ గా మారింది. అదేంటంటే విశాఖలో ఒకటిన్నర శతాబ్ధంపైగా సేవలందిస్తోన్న కింగ్ జార్జి హాస్పిటల్ (కేజీహెచ్) ను ముఖ్యమంత్రి జగన్ సందర్శించటం. అవును , ఇప్పుడు వార్త ఏంటంటే ఆ హాస్పిటల్ ను సందర్శించిన ముఖ్యమంత్రి త్వరలోనే పదవీచ్యుతుడవుతాడరన్నది ఇప్పుడు చర్చనీయాంశమవుతోంది.

1995 లో ఈ ఆస్పత్రిని సందర్శించిన నాటి ముఖ్యమంత్రి ఎన్టీఆర్ ఆ తర్వాత కొద్దికాలంలోనే తనపదవిని కోల్పోవాల్సి వచ్చింది. దీంతో ఆ తర్వాత పదవి చేపట్టిన ఏముఖ్యమంత్రి కూడా ఈ 25 ఏళ్లలో ఆ హాస్పిటల్ వైపు అడుగుపెట్టలేదు. ఇంతకాలానికి మళ్లీ జగన్ అక్కడ అడుగుపెట్టడం ప్రాధాన్యత సంతరించుకుంది.

దీంతో అసలే అన్ లిమిటెడ్ కష్టాలతో కాలం గడుపుకొస్తోన్న తమకు మళ్లీ ఈ సెంటిమెంట్ షాకులేంట్రా బాబూ అని జగనన్న శిబిరం తెగ ఆందోళన పడుతోంది. పైకి మాత్రం కేజీహెచ్ తో పాటూ అన్నవరం ఆలయానికి వెళ్తే పదవీగండం, నాగార్జున యూనివర్శిటీకి వెళ్తే సీఎం పదవి ఊస్టింగేనని ఆల్రెడీ ఉన్న జనంలో నానుతున్న నమ్మకాలను మూఢనమ్మకాలుగా తేల్చేసి వాటిని కొట్టిపారేస్తున్నారు. పీవీపీ లాంటి వైసీపీ నేతలైతే ట్వీట్ల ద్వారా ఇంకొంచెం హీటు పెంచుతున్నారు. బాధితుల దగ్గరకు వెళ్లటం ముఖ్యం కానీ సెంటిమెంట్లను చూసి ఆగటం తమ నాయకుడి లక్షణం కాదని ధీమా వ్యక్త చేస్తున్నారు.

పైకి ఎలా ఉన్నా లోపల మాత్రం ఈ సెంటిమెంట్ వర్కవుట్ కాకూడదని వారికి నచ్చిన, వారు మెచ్చిన దేవుళ్లను కోరుకుంటున్నారు. ఇక ప్రత్యర్ధి శిబిరం ఫోన్లు అయితే ఈ అంశంపై బిజీగానే ఉన్నాయి. ఎవరి ఆశలు వారివి…ఎవరి నమ్మకాలు వారివి..అసలు ఆస్పత్రులకు వెళ్లటం..అక్కడికి వెళ్తే పదవులు పోతాయన్న వార్తలు ఏమో కానీ ఇలాంటి దారుణాలు మాత్రం జరగకూడదని మనం కోరుకుందాం..ఎందుకంటే ఏది జరిగినా దాన్ని రాజకీయానికి ముడిపెట్టే ఏపీలో ఉన్నాం కాబట్టి.