దేవుడా.. ఇదస్సలు పబ్లిసిటీ స్టంటే కాదోచ్‌

రాజకీయ నాయకులు చేసే పబ్లిసిటీ స్టంట్లు అభాసుపాలైపోవడం కొత్తేమీ కాదు. ‘అబ్బే, మాకు అస్సలు పబ్లిసిటీ చేసుకోవాల్సిన అవసరమే లేదు..’ అని చెబుతుంటారు, మళ్ళీ ఆ పబ్లిసిటీ అనే బురదలోనే దొర్లుతుంటారు. ఆ పార్టీ ఈ పార్టీ అన్న తేడాల్లేవు. అయితే, ఈ విషయంలో తెలుగుదేశం పార్టీకి ఎక్కువ మార్కులు పడతాయి. కానీ, టీడీపీని దాటేయడమెలా.? అన్న విషయమై తీవ్ర కసరత్తులు చేస్తున్నారు వైసీపీ నేతలు పబ్లిసిటీ విషయంలో.

తాజాగా, విశాఖ గ్యాస్‌ లీక్‌ ఘటనకు సంబంధించి ‘ఎఫెక్టెడ్‌ ఏరియాస్‌’లో మంత్రులు ‘బస’ చేశారు. స్థానిక ప్రజానీకంలో భయాందోళనలు పోగొట్టడానికి స్వయంగా ముఖ్యమంత్రి వైఎస్‌ జగన్‌, మంత్రులకు ఈ దిశగా ఆదేశాలు ఇచ్చారు. మంత్రులంతా తమకు తోచిన రీతిలో పబ్లిసిటీ స్టంట్లు చేశారు. ఇక్కడా, తన మార్కు ప్రత్యేకంగా వుండాలనుకున్నారో ఏమో, ప్రత్యేకంగా ఫొటో షూట్‌ ఏర్పాటు చేసుకున్నారు వైసీపీ ఎంపీ విజయసాయిరెడ్డి.

ఓ భవనం మీద ప్రత్యేకంగా ఏర్పాట్లు చేయించుకున్నారు ఫొటో షూట్‌ కోసం. ‘ఆరుబయట’ అని చెప్పి, పలు అంతస్తులున్న భవనం మీద కొలువుదీరడమేంటో ఆయనకే తెలియాలి. ఈ వ్యవహారమంతా సమీపంలోని ఇతర భవనాల నుంచి కొందరు షూట్‌ చేసేశారు తమ మొబైల్‌ కెమెరాల్లో. విజయసాయిరెడ్డి అలా మంచమ్మీద కూర్చోవడం, అట్నుంచి ఎడా పెడా ఫొటోలు క్లిక్‌ మనిపించేయడం.. అంతా జరిగిపోయింది.

ఫొటో షూట్‌లో చొక్కా వేసుకుని పడుకున్న విజయసాయిరెడ్డి, మీడియాతో మాట్లాడే సమయంలో మాత్రం చొక్కా తీసేసి, బనియన్‌ని ధరించి మాత్రమే మాట్లాడటం కొసమెరుపు. ఒట్టు, ఇది మాత్రం పబ్లిసిటీ స్టంట్‌ కాదని వైసీపీ నేతలు చెబితే మాత్రం నమ్మడానికి జనం వెర్రి వెంగళప్పలా.?

ఫ్యాక్టరీ నుంచి లీకయ్యింది విష వాయువు కదా.. దానికి డెన్సిటీ ఎక్కువ. అందుకే, విజయసాయిరెడ్డి పక్కాగా ప్లాన్‌ చేసుకుని, ఆ వాయువు ప్రమాదం వుండనంత ఎత్తులో ‘బస’ చేసి, దానికి అదనంగా ఫొటో సెషన్లు జోడించారంటూ సోషల్‌ మీడియాలో సెటైర్లు పడుతున్నాయి. స్వతంత్ర భారతంలో చావు కూడా పెళ్ళిలాంటిదే బ్రదర్‌.. అన్నాడు వెనకటికి ఓ సినీ కవి. 12 మంది ప్రాణాలు కోల్పోతే, ఆ ప్రాంతంలో ‘బస’ పేరుతో పబ్లిసిటీ స్టంట్లు చేసిన నేతల్ని ఏమనాలి.?