వామ్మో.. మిడతల దెబ్బ ఈ రేంజ్లో ఉంటుందా.?

కరోనా వైరస్ కేసులు రోజరోజుకూ పెరిగిపోతుండటంతో అతలాకుతలమవుతున్న భారత్ పై మిడతలు తమ ప్రతాపం చూపిస్తున్నాయి. తూర్పు ఆఫ్రికా నుంచి దండెత్తి వస్తున్న మిడతలు పాకిస్థాన్ మీదుగా భారత్ లో ప్రవేశించి అల్లకల్లోలం సృష్టిస్తున్నాయి. ఇప్పటికే రాజస్థాన్, ఉత్తరప్రదేశ్, మధ్యప్రదేశ్ లపై తమ ప్రతాపం చూపించిన ఈ మిడతలు ప్రస్తుతం మహారాష్ట్రను వణికిస్తున్నాయి. ఇప్పటికే కరోనా వైరస్ కేసులతో సతమతమవుతున్న ఆ రాష్ట్రంలో మిడతల దండు వీరంగం సృష్టిస్తోంది.

ప్రస్తుతం అమరావతి జిల్లాలో ఉన్న మిడతలు అక్కడ నుంచి వార్థా వైపు తర్వాత నాగ్ పూర్ వెళతాయని అధికారులు చెబుతున్నారు. ఇక మహారాష్ట్ర తర్వాత వాటి లక్ష్యం తెలంగాణే. దీంతో సోమవారం రాత్రి తెలంగాణ వ్యవసాయ శాఖ అధికారులు అత్యవసర సమావేశం నిర్వహించి వాటిని ఎలా ఎదుర్కోవాలనే అంశంపై చర్చలు జరిపారు. మహారాష్ట్ర సరిహద్దు జిల్లాల్లో అధికార యంత్రాంగం అప్రమత్తంగా ఉండాలని సూచించారు. ఈ మిడతల దండు వల్ల ప్రజలకు ఎలాంటి హానీ లేకపోయినా.. పంటపొలాలు సర్వనాశనం అవుతాయి. పచ్చని పొలాలు ఎక్కడున్నా అక్కడ ఇవి వాలిపోతాయి. గంటకు పది నుంచి 15 కిలోమీటర్ల వేగంతో ప్రయాణించే మిడతలు.. రోజుకు దాదాపు 150 కిలోమీటర్లు ప్రయాణిస్తాయి. తమ బరువుకు సమానమైన ఆహారాన్ని అవలీలగా లాగించేస్తాయి.

ఒక చదరపు కిలోమీటరు విస్తీర్ణంలో దాదాపు 8 కోట్ల మిడతలు ఉంటాయి. 35వేల మందికి సరిపడా ఆహారాన్ని ఇవి ఒక్కరోజులోనే తినేస్తాయి. వీటి జీవితకాలం 90 రోజులే. కానీ వీటి సంఖ్య చాలా వేగంగా పెరుగుతుంది. మూడు నెలల్లో 20 రెట్లు, ఆరునెలల్లో 400 రెట్లు, తొమ్మిది నెలల్లో 8వేల రెట్లు పెరిగిపోతాయి. ఉదాహరణకు ప్రస్తుతం వంద మిడతలు ఉన్నాయనుకుంటే మూడు నెలలకు 2వేలు, ఆరు నెలలకు 40వేలు, తొమ్మిది నెలలకు 8 లక్షలు అయిపోతాయి. వాస్తవానికి భారత్ లోకి జూలై నుంచి అక్టోబర్ మధ్యలో ఇవి ప్రవేశిస్తాయి. కానీ ఈ సారి చాలా ముందుగానే వచ్చేయడం ఆందోళనకు గురిచేస్తోంది.