వెంకటేష్ ‘నారప్ప’ మూవీ రివ్యూ : ఎమోషనల్‌ ఫ్యామిలీ డ్రామా

వెంకటేష్‌ ‘నారప్ప’గా ప్రియమణి ప్రధాన పాత్రలో ఈ సినిమా థియేటర్లలో వస్తుందని అంతా ఎదురు చూశారు. కాని కరోనా సెకండ్‌ వేవ్‌ వల్ల నారప్ప ను డైరెక్ట్‌ ఓటీటీలో విడుదల చేయాల్సి వచ్చిందంటూ నిర్మాతలు ఈ సినిమాను అమెజాన్ ద్వారా ప్రేక్షకుల ముందుకు తీసుకు వచ్చారు. సెకండ్‌ వేవ్‌ తర్వాత డైరెక్ట్‌ ఓటీటీలో విడుదల అయిన పెద్ద సినిమా ఇదే. అమెజాన్ ప్రైమ్‌ లో స్ట్రీమింగ్‌ అవుతున్న ఈసినిమా ఎలా ఉంది అనేది చర్చిద్దాం రండీ.

కథ :

నారప్ప(వెంకటేష్‌) కుటుంబం గ్రామం నుండి పారిపోతూ ఉండగా కథ మొదలు అవుతుంది. అనేక ఘోరమైన సంఘటనలు జరిగిన నేపథ్యంలో నారప్ప కుటుంబం అత్యంత పెద్ద చిక్కుల్లో చిక్కుంది. గతంలో జరిగిన సంఘటలు మరియు నారప్ప జీవితంలో అంతకు ముందు జరిగిన సంఘటనల నేపథ్యంలో సినిమా కథ సాగుతుంది. తన కుటుంబంను కాపాడుకునేందుకు నారప్ప చేసిన ప్రయత్నం ఏంటీ.. అసలు నారప్ప కుటుంబం గ్రామం నుండి పారిపోవడానికి కారణం ఏంటీ తెలియాలంటే సినిమా చూడాల్సిందే.

తెర మీద స్టార్స్‌…

వెంకటేష్ నారప్ప పాత్రకు ప్రాణం పోశాడు. కొన్ని సన్నివేశాల్లో తాను ఓ స్టార్‌ హీరోను అనే ఇమేజ్ ను పక్కన పెట్టి నటించాడు. ఆయన కాస్ట్యూమ్స్ మరియు ఆయన బాడీ లాంగ్వేజ్ నారప్ప పాత్రకు జీవం పోసినట్లుగా ఉన్నాయి. కుటుంబం కోసం తపనపడే సన్నివేశాల్లో వెంకటేష్‌ నటన చాలా బాగుంది. కథ మొత్తంను కూడా తన భుజాలపై వేసుకుని మరీ వెంకటేష్‌ సినిమాను నడిపించాడు. నారప్ప పెద్ద కొడుకు పాత్రలో కార్తీక్ రత్నం నటన బాగుంది. పాత్రకు తగ్గట్లుగా ఆవేశపూరిత పాత్రలో కార్తీక్ నటన బాగుంది. ప్రియమణి మరియు రాజీవ్‌ కనకాల కూడా వారి పాత్రలకు ప్రాణం పోసినట్లుగా నటించారు. సినిమాలోని మిగతా నటీనటులు కూడా వారి పాత్రలకు న్యాయం చేసేలా నటించి మెప్పించారు.

తెర వెనుక టాలెంట్..

కొత్తబంగారు లోకం.. సీతమ్మ వాకిట్లో సిరిమల్లె చెట్టు వంటీ ఫీల్‌ గుడ్‌ మూవీస్ ను తెరకెక్కించిన శ్రీకాంత్‌ అడ్డాల ఇలాంటి సినిమాను తెరకెక్కించాడంటే నిజంగా ఆశ్చర్యమే. తమిళ అసురన్‌ సినిమాకు ఒక్క సీన్ ను జత చేయడం లేదా ఒక్క సీన్ ను తొలగించలేదు. కాని స్క్రీన్‌ ప్లే విషయంలో మాత్రం కాస్త మార్పులు జరిగాయి. సబ్జెక్ట్‌ ను కూడా స్వల్పంగా మార్చడం జరిగింది. ఫ్ల్యాష్‌ బ్యాక్ సన్నివేశాల విషయంలో వివాదాలు లేకుండా జాగ్రత్తగా అడ్డాల కథను కొనసాగించడం లో సఫలం అయ్యాడు.

మణిశర్మ అందించిన నేపథ్యం సినిమాకే హైలెట్ గా నిలుస్తోంది. ఇంటర్వెల్ లాంటి కొన్ని కీలక సీక్వెన్స్ లోని బ్యాగ్రౌండ్ స్కోర్ కి అయితే గూస్ బంప్స్ వస్తాయి. సినిమాటోగ్రఫి బాగుంది. నిర్మాణాత్మక విలువలు బాగున్నాయి. సినిమాలో కొన్ని సన్నివేశాలు సాగతీసినట్లుగా ఉన్నాయి. వాటిని మరింతగా ట్రిమ్ చేసి ఉంటే సినిమా స్పీడ్ గా సాగేది.

విజిల్ మోమెంట్స్:

• వెంకటేష్ నటన,
• బ్యాక్ గ్రౌండ్‌ స్కోర్‌, సినిమాటోగ్రఫీ,
• ఇంటర్వెల్‌ మరియు క్లైమాక్స్,
• ఎమోషనల్ కంటెంట్.

బోరింగ్ మోమెంట్స్:

• ఒరిజినల్ ను దించేయడం,
• ఫ్ల్యాష్‌ బ్యాక్‌ సన్నివేశాల కథనం,
• కొన్ని సన్నివేశాలు రా కంటెంట్ ను కలిగి ఉన్నాయి.

విశ్లేషణ:

అసురన్‌ కు నారప్ప అసలైన రీమేక్. ఎక్కడ అదనపు సన్నివేశాలు లేకుండా ఉన్నది ఉన్నట్లుగా దించేశారు. అసురన్ ను దించేసినా కూడా వెంకటేష్‌ నటనతో ఆకట్టుకున్నాడు. స్టోరీ లైన్ కు తగ్గట్లుగా తెలుగు లో కూడా సన్నివేశాలను మార్చకుండానే రీమేక్ చేశారు. అసురన్‌ చూడకుండా ఓపెన్‌ మైండ్‌ తో ఈ సినిమా చూసే వారికి తప్పకుండా నారప్ప నచ్చుతాడు.

చూడాలా? వద్దా? : వెంకటేష్ అభిమానులు ఖచ్చితంగా చూడవచ్చు. కమర్షియల్‌ సినిమా ప్రియులకు  నచ్చేది అనుమానమే.

తెలుగు బులెటిన్ రేటింగ్: 2.75/5