‘కమ్మ’గా సొంత గూటికి: ‘చిలక’ పలుకులెలా వుంటాయో.!

సీనియర్‌ జర్నలిస్ట్‌ వెంకటకృష్ణ పేరు సోషల్‌ మీడియాలో మార్మోగిపోతోంది. చిత్రమేంటంటే, సినిమా సెలబ్రిటీలకు ధీటుగా ఇప్పుడు సీనియర్‌ జర్నలిస్టులకు ఫాలోవర్స్‌ పెరిగిపోయారు. ‘ఆ.. డబ్బులిస్తే.. ఫేక్‌ ఫాలోవర్స్‌ ఆటోమేటిక్‌గా వచ్చేస్తారు.. చెప్పినట్లు ట్వీట్లేస్తారు.. ఫేస్‌బుక్‌, ఇన్‌స్టాగ్రామ్ లోనూ భజన చేస్తారు..’ అనే ట్రెండ్‌ ఈ మధ్య బాగానే నడుస్తోందనుకోండి మీడియాలో కూడా.!

అసలు విషయంలోకి వచ్చేద్దాం. వెంకటకృష్ణ గతంలో పలు మీడియా సంస్థల్లో పనిచేశారు. ఆ తర్వాత సొంతంగా ‘ఏపీ24X7’ అనే ఛానల్‌ని స్థాపించారు. వెంకటకృష్ణ లైవ్‌ షోని చాలామంది ఆసక్తిగా తిలకించేవారు కూడా. తమది న్యూట్రల్‌ ఛానల్‌ అనీ, మిగతా ఛానళ్లలో చాలవరకు ఆయా పార్టీలకు అమ్ముడుపోయాయనీ ఆయనే పలు సందర్భాల్లో సెటైర్లు వేసిన మాట వాస్తవం. ‘కుల మీడియా’ అన్నారు, రాజకీయ మీడియా అన్నారు.. ఇంకేవేవో అన్నారు. కానీ, ఇప్పుడాయన తాను స్థాపించిన ‘ఏపీ24X7’ ఛానల్‌ వదిలేసి, పాత గూటికి ‘కమ్మ’గా చేరిపోయారు.

సోమవారం నుంచి ఏబీఎన్‌ ఛానల్‌లో ఆయన తన ‘ప్రతాపం’ చూపించబోతున్నారు. ఏబీఎన్‌ ఛానల్‌లో చేరాక, ‘న్యూట్రల్‌గా..’ అన్న మాటకు తావుండదు. ఏబీఎన్‌ అంటే, తెలుగుదేశం పార్టీకి మౌత్‌పీస్‌ అన్నది ఓపెన్‌ సీక్రెట్‌. అదే ఛానల్‌ మీద పరోక్షంగా ‘ఏపీ24X7’ వ్యవస్థాపకుడి హోదాలో సెటైర్లు వేసిన వెంకటకృష్ణ, ఇప్పుడు అదే గూటికి చేరడం వెనుక చాలా కారణాలున్నాయి.

రాజకీయ ఒత్తిళ్ళకు తోడు, అంతర్గతంగా తలెత్తిన వివాదాలతో వెంకటకృష్ణ, ‘ఏపీ24X7’ నుంచి బయటకు రావాల్సి వచ్చింది. ఇంతకీ, ఏబీఎన్‌ ఛానల్‌ తరఫున వెంకటకృష్ణ ‘చిలక’ పలుకులు ఎలా వుంటాయి.? ఇక్కడ ‘కులజాడ్యం’ లేకుండా ఆయన తన పాత్రికేయ వృత్తిని నిర్వర్తించగలరా.? అన్న విషయమై మీడియా వర్గాల్లో ఆసక్తికరమైన చర్చ జరుగుతోంది.

నో డౌట్స్‌.. అద్భుతాలేమీ జరగవు.. ఏబీఎన్‌ ఛానెల్‌కి వున్న పొలిటికల్‌ ఎజెండా ప్రకారమే వెంకటకృష్ణ పనిచేయబోతున్నారు. సాక్షిలో కొమ్మినేని శ్రీనివాసరావు చేస్తున్నదీ అదే.