చైనాతో అమీతుమీకి అమెరికా రెడీ

కరోనా వైరస్ ప్రపంచవ్యాప్తంగా ప్రబలడానికి ముమ్మాటికీ చైనాయే కారణమని బలంగా నమ్ముతున్న అగ్రరాజ్యం అమెరికా.. డ్రాగన్ కంట్రీపై ముప్పేట దాడికి సమాయత్తమవుతోంది. ఆ వైరస్ ను కోవిడ్ లేదా కరోనా అని కాకుండా చైనా వైరస్ గా పిలిచే అమెరికా అధ్యక్షుడు ట్రంప్.. ఇప్పటికే చైనాపై పలుమార్లు తన అక్కసు ప్రదర్శించారు. అవకాశం దొరికితే ఆ దేశంపై ప్రతీకారం తీర్చుకోవడానికి సిద్ధంగా ఉన్నారు.

ఇటీవల పలుదఫాలుగా ఈ విషయంలో ట్రంప్ తన వైఖరిని స్పష్టంగానే బయటపెట్టారు. కరోనా వైరస్ చైనాలోని వూహాన్ ల్యాబ్ నుంచే పుట్టిందనడానికి ఆధారాలున్నాయని పేర్కొంటున్న అమెరికా.. ఈ విషయంలో ప్రపంచ ఆరోగ్య సంస్థపైనా విరుచుకుపడుతోంది. అవసరమైతే చైనాతో సంబంధాలు పూర్తిగా తెగదెంపులు చేసుకునేందుకు కూడా వెనకాడబోమని ట్రంప్ హెచ్చరించారు.

రెండు దేశాల మధ్య సంబంధాలు తెగిపోతే తమకు 500 బిలియన్ డాలర్ల ఆదా అవుతుందని పేర్కొన్నారు. ఈ నేపథ్యంలో అటు చైనాను, ఇటు ప్రపంచ ఆరోగ్య సంస్థను ఇరుకున పెట్టే కార్యాచరణకు అగ్రరాజ్యం సర్వం సిద్ధం చేసింది. ఇందులో భాగంగా భారత్ కు సైనికపరమైన సాయం అందించడం ద్వారా చైనాపై ఒత్తిడి పెంచాలని నిర్ణయించింది.

అలాగే తైవాన్, జర్మనీ, దక్షిణ కొరియా వంటి దేశాలకు ఆయుధాలు విక్రయించాలని నిర్ణయం తీసుకుంది. చైనాలో ఉన్న అమెరికా సంస్థల్ని వెనక్కి రప్పించడంతోపాటు అమెరికాలో చైనా ప్రభుత్వం నడుపుతున్న మీడియా సంస్థల్ని నిషేధించాలని తీర్మానించింది. అలాగే డబ్ల్యూహెచ్ఓ స్వతంత్రత మరింత పెరిగేలా చర్యలు తీసుకోవాలని నిర్ణయించింది.

వైరస్ విషయంలో అబద్దాలు చెప్పిన చైనాపై ఆంక్షలు విధించాలని భావిస్తోంది. మొత్తానికి చైనాపై ముప్పేట దాడి చేయడం ద్వారా ఆ దేశాన్ని అష్టదిగ్బంధనం చేయాలని అగ్రరాజ్యం గట్టి పట్టుదలతో ఉంది. ఇది కొంతవరకు భారత్ కు మేలు చేసే అవకాశం ఉందని విశ్లేషకులు అభిప్రాయపడుతున్నారు.

ఇప్పటివరకు చైనా వైపు చూసిన పలు విదేశీ కంపెనీలు.. ఇకపై భారత్ వైపు మళ్లే అవకాశం ఉందని చెబుతున్నారు. చైనా తర్వాత ఆ స్థాయిలో మానవ వనరులు, మార్కెట్, ఇతరత్రా సౌకర్యాలు అందుబాటులో ఉన్న భారత్ లో పెట్టుబడులు పెట్టడానికి కంపెనీలు క్యూ కట్టడం ఖాయమని పేర్కొంటున్నారు. దీనిని భారత్ అవకాశంగా మలుచుకుంటే ఆర్థికంగా వృద్ధి సాధించే అవకాశాలున్నాయి.