దేవుడి భూముల అమ్మకం.. దేవుడే రక్షించుకోవాలేమో..

అసలు హిందూ దేవాలయాలకు పాలక మండళ్ళు ఎందుకు.? దేవాలయాల్ని పరిపాలించడమా.? ఇలాంటి ప్రశ్నలు ఇప్పటివి కాదు. కానీ, ఈ ప్రశ్నలకు ఎప్పటికీ సమాధానం దొరకదు. దేవాలయాల్లోనే ప్రసాదాల అమ్మకాలు.. అదీ అధికారికంగా జరుగుతుంటాయి. ప్రభుత్వాలే ఈ అమ్మకాల్ని ప్రోత్సహిస్తుంటాయి. ఇంకే మతంపైనా ప్రభుత్వాలు ఈ తరహా వైపరీత్యాన్ని ప్రదర్శించవు.

దేవాలయాల నుంచి ప్రభుత్వాలకు వచ్చే ఆదాయం అంతా ఇంతా కాదు. ఓ మోస్తరు దేవాలయాలన్నిటికీ భూములుంటాయి. వాటి ద్వారా వచ్చే ఆదాయంతో దేవాలయాల్ని అత్యద్భుతంగా నడపొచ్చు. కానీ, టిక్కెట్ల అమ్మకాలతో ఎప్పటికప్పుడు ఆదాయ మార్గాల్ని పెంచుకుంటూ పోతున్నాయి ప్రభుత్వాలు. ఇవన్నీ నాణానికి ఓ వైపు మాత్రమే. భూముల ఆక్రమణలు.. భూముల అమ్మకాలు ఇంకో వైపున్నాయి.

ఆక్రమణల్ని అడ్డుకుంటామంటూ అన్ని ప్రభుత్వాలు చెబుతుంటాయి. చిత్రంగా అధికారంలో వున్నవారే ఎక్కువగా ఆక్రమణలకు పాల్పడుతుంటారు. ఇప్పుడిక అమ్మకాల విషయానికొస్తే, నిరర్ధక ఆస్తులు.. అంటూ వైఎస్‌ జగన్‌ హయాంలో టీటీడీ భూముల అమ్మకానికి గ్రీన్‌ సిగ్నల్‌ ఇవ్వడం ఇప్పుడు వివాదాస్పదమవుతోంది. నిరర్ధక భూములు.. అన్న మాటే దుర్మార్గం.. అంటున్నారు కొందరు. దేవుడి కోసం, దేవాలయాల కోసం భక్తులు ఇచ్చే ఆస్తుల్ని నిరర్ధకం అనడమేంటన్నది వారి వాదన. ఆయా భూముల్ని ప్రభుత్వాలు సంరక్షించుకోలేవా.? ఈ చిన్న లాజిక్‌ని ఎలా అధికార వైసీపీ మిస్‌ అవుతోందో ఏమో.

చంద్రబాబు హయాంలో ఇదే వైఎస్‌ జగన్‌ మోహన్‌రెడ్డి, ప్రతిపక్ష నేతగా అసెంబ్లీలో అప్పటి ప్రభుత్వంపై విరుచుకుపడ్డారు. ‘దేవుడి భూములు అమ్మితే పాపం..’ అంటూ నినదించారాయన. మరి, ఆ పాపం ఇప్పుడు న్యాయం ఎలా అవుతోందట.? ఇప్పుడు చిన్న చిన్న భూములు మాత్రమే.. ముందు ముందు అవసరాలు పెరిగి, ఏయే పెద్ద భూములు నిరర్ధక ఆస్తులవుతాయో. చివరికి దేవాలయాలూ నిరర్ధక ఆస్తులు మారిపోతేనో.? అని భక్తులు ఆవేదన వ్యక్తం చేస్తున్నారు.. సోషల్‌ మీడియా వేదికగా మండిపడుతున్నారు.

తిరుపతి లడ్డూని డిస్కౌంట్‌ ధరలో అమ్మకాలకు తెరలేపిన వైనం చూస్తున్నాం.. దీనిపై విమర్శలు వెల్లువెత్తుతున్న సమయంలో.. భూముల విక్రయాన్ని ప్రభుత్వం ఇంకా సమర్థించుకోవడం సబబు కాదు. ఏది ఏమైనా దేవుడి భూముల అమ్మకానికి పాలకులు తెరలేపిన దరిమిలా.. ఆ దేవుడే భక్తులు సమర్పించుకున్న భూముల్ని రక్షించుకోవాలి.