జస్ట్‌ ఆస్కింగ్‌: టీటీడీ శ్వేతపత్రంలో ‘పింక్‌’ డైమండ్‌ వుంటుందా.?

పింక్‌ డైమండ్‌.. తిరుమల తిరుపతి శ్రీ వెంకటేశ్వరస్వామికి సంబంధించి భక్తులు సమర్పించుకున్న అతి విలువైన వాటిల్లో ఇదీ ఒకటంటూ గత కొన్నేళ్ళుగా ప్రచారం జరుగుతోంది. ప్రచారం మాత్రమే కాదు, దీని చుట్టూ జరిగిన రాజకీయ రచ్చ అంతా ఇంతా కాదు. చంద్రబాబు హయాంలో పింక్‌ డైమండ్‌ మాయమైపోయిందనీ, అది అప్పటి ప్రభుత్వ పెద్దలే కాజేశారనీ అప్పట్లో వైఎస్సార్‌ కాంగ్రెస్‌ పార్టీ ఆరోపించింది. అది నిజమేనా.? అసలంటూ పింక్‌ డైమండ్‌ అనేది నిజంగానే వుందా.? అన్న విషయాలపై ఇప్పటిదాకా స్పష్టత లేదు.

వైఎస్సార్‌ కాంగ్రెస్‌ పార్టీ అధినేత వైఎస్‌ జగన్‌ మోహన్‌రెడ్డి అధికారంలోకి వచ్చి ఏడాది అయ్యింది. ఈ ఏడాది కాలంలో ఎప్పుడూ ఎక్కడా పింక్‌ డైమండ్‌ గురించి వైఎస్సార్‌ కాంగ్రెస్‌ పార్టీ ప్రస్తావించలేదు. ఇప్పుడు, శ్రీవారి ఆస్తులకు సంబంధించి శ్వేతపత్రం విడుదల చేయాలని టీటీడీ సంకల్పించింది. ఈ మేరకు టీటీడీ ఛైర్మన్‌ వైవీ సుబ్బారెడ్డి ఓ ప్రకటన కూడా చేశారు.

శ్వేతపత్రం అంటే.. అందులో అన్నీ వాస్తవాలే వుండాలి. దాని పేరు శ్వేతపత్రం.. అంటే వైట్‌ పేపర్‌.. అంటే, అన్నీ నిజాలుంటాయన్నది శ్వేతపత్రం తాలూకు అర్థం. కానీ, ఇందులో పింక్‌ డైమండ్‌ కనిపిస్తుందా.? అన్నదే మిలియన్‌ డాలర్ల ప్రశ్న. పింక్‌ డైమండ్‌ కన్పించడమంటే.. దాని తాలూకు వివరాల్ని పొందుపర్చుతారా.? లేదా.? అని.

అసలు పింక్‌ డైమండ్‌ అనేదే లేదనీ, అలాంటిది ఓ ఆభరణంలో పొదగబడి వుండేదనీ, కాలక్రమంలో అది ఛిద్రమైపోయిందనీ గతంలో వాదనలు విన్పించాయి. పోనీ, ఆ వివరాలైనాసరే, ప్రస్తుత టీటీడీ తన శ్వేతపత్రంలో పేర్కొంటుందేమో చూడాలి. ఒక్కటి మాత్రం నిజం.. తిరుమల తిరుపతి దేవస్థానానికి సంబంధించి చాలా చాలా ఆరోపణలున్నాయి. సాక్షాత్తూ టీటీడీ ప్రధాన అర్చకులే పలుమార్లు పలు రకాల ఆరోపణలు చేశారు. వాటన్నిటిపైనా విచారణ జరగాల్సి వుంది.

ఎందుకంటే, శ్రీవారికి భక్తులిచ్చిన ఆస్తులు అన్నీ ఇన్నీ కావు. శ్రీవారి ఆస్తులంటే.. అవి భక్తుల మనోభావాలకు సంబంధించిన విషయాలు. మరి, శ్వేతపత్రంలో అన్ని ప్రశ్నలకూ సమాధానం దొరుకుతుందా.? లేదంటే, శ్వేతపత్రం పేరుతో రాజకీయ బురదని ఎవరో ఒకరి మీద చల్లేసి ఊరుకుంటారా.? అన్నది వేచి చూడాల్సిందే.