టాలీవుడ్ డ్రగ్స్ కేసులు ఇప్పట్లో తేలేనా?

సుశాంత్ ఆత్మహత్యతో మరోసారి తెరపైకి వచ్చిన డ్రగ్స్ వ్యవహారం.. అటు బాలీవుడ్ తోపాటు కోలీవుడ్ నూ కుదిపేస్తోంది. రోజుకో తారామణి పేరు బయటకు వస్తోంది. తాజాగా మహేశ్ బాబు భార్య నమ్రత పేరు కూడా ఈ వ్యవహారంలో వెలుగుచూడటం ఒక్కసారిగా సంచలనం రేపింది. అయితే, ఆమెకు ఈ వ్యవహారంతో ఎలాంటి సంబంధం లేదని నమ్రత బృందం స్పష్టంచేసింది.

ప్రస్తుతం దేశవ్యాప్తంగా కలకలం సృష్టిస్తున్న ఈ ఉదంతం పక్కనపెడితే.. టాలీవుడ్ లో డ్రగ్స్ వ్యవహారం మరోసారి వార్తల్లోకి వచ్చింది. మూడేళ్ల క్రితం తెలుగు సినీ పరిశ్రమను కుదిపేసిన ఈ వ్యవహారం తాజాగా వెలుగులోకి వచ్చింది. దీనికి సంబంధించిన కీలక విషయాలన్ని ఎక్సైజ్ శాఖ వెల్లడించింది. ఫోరం ఫర్ గుడ్ గవర్ననెన్స్ సమాచార హక్కు చట్టం కింద అడిగిన ప్రశ్నకు ఆ శాఖ బదులిచ్చింది.

హైదరాబాద్ లో గత మూడేళ్లలో డ్రగ్స్ కు సంబంధించి 12 కేసులు నమోదు కాగా, 8 కేసుల్లో చార్జిషీట్లు వేశామని, నాలుగింటిలో ఇంకా చార్జిషీట్లు దాఖలు చేయలేదని వెల్లడించింది. ఈ నాలుగింటిలో రెండు కేసులు 2017లో టాలీవుడ్ లో నమోదైనవేనని తెలుస్తోంది. అప్పట్లో టాలీవుడ్ లో సంచలనం రేపిన ఈ వ్యవహారంలో తొలుత దర్యాప్తు వేగంగానే సాగింది. పలువురు సినీ ప్రముఖుల పేర్లు తెరపైకి వచ్చాయి. అయితే, తర్వాత ఈ కేసు దర్యాప్తు నీరుగారిపోయింది.

హీరో రవితేజ సోదరుడు భరత్ రోడ్డుప్రమాదంలో చనిపోయిన తర్వాత అతడి ఫోన్ లో దొరికిన సమాచారాన్ని బట్టి కొంతమంది డ్రగ్ పెడ్లర్లను అరెస్టు చేశారు. వారి విచారణలో కీలక విషయాలు తెలుస్తాయని.. టాలీవుడ్ డొంక కదులుతుందని భావించినా అలాంటిదేమీ జరగలేదు. ఆ కేసులో ఇప్పటివరకు కనీసం చార్జిషీటు కూడా దాఖలు చేయలేదని తాజాగా వెల్లడైంది. ఈ కేసులు ఇప్పట్లో తేలే అవకాశం ఉందా లేదా అంటే సందేహంగానే కనిపిస్తోంది.

ఇక ఎక్సైజ్ శాఖ దాఖలు చేసిన 8 చార్జిషీట్లలో ఆసక్తికరమైర విషయాలు ఉన్నాయి. ఇంగ్లండ్, జర్మనీ తదితర దేశాల నుంచి కొరియర్ల ద్వారా డ్రగ్స్ వస్తున్నట్టు గుర్తించామని పేర్కొన్నారు. చాలా చిన్నమొత్తంలో అవి వస్తుండటం వల్ల అన్నింటినీ పట్టుకోవడం సాధ్యం కావడంలేదని వెల్లడించారు.