అబ్జర్వేషన్‌: ఓటీటీ దెబ్బకి థియేటర్స్ ఔట్‌.!

ఇకపై థియేటర్‌కి వెళ్ళి సినిమా చూసే అవకాశం వుండదా.? ఏమో, ఇప్పుడే ఓ క్లారిటీకి వచ్చేయలేంగానీ.. పరిస్థితులు మాత్రం కొంత అనుమానాస్పదంగానే కన్పిస్తున్నాయి. ‘కరోనా వైరస్‌ ఎక్కువ కాలం వుండదు.. ఒక్కసారి వ్యాక్సిన్‌ వచ్చిందంటే.. ఆ తర్వాత పరిస్థితి పూర్తిగా అదుపులోకి వచ్చేస్తుంది..’ అని కొందరు అభిప్రాయపడ్తున్నారు. కరోనా వైరస్‌ దెబ్బకి పూర్తిగా దెబ్బతిన్న రంగాల్లో సినిమా రంగాన్ని ప్రముఖంగా చెప్పుకోవాలి. సినిమాకి సంబంధించి ప్రీ ప్రొడక్షన్‌, పోస్ట్‌ ప్రొడక్షన్‌ వర్క్‌ జరుగుతోంది.. సినిమాల షూటింగులు కూడా జరుగుతున్నాయి. కానీ, రిలీజ్‌ల మాటేమిటి.? ఈ ప్రశ్నకి సమాధానం చెప్పడం కష్టం.

కొన్ని సినిమాలు ఓటీటీల్లోకి వచ్చేస్తున్నాయి. కీర్తి సురేష్‌ నటించిన ‘పెంగ్విన్‌’ని ఆల్రెడీ ఓటీటీలో చూసేశాం. మరికొన్ని సినిమాలూ అదే బాటలో పయనిస్తున్నాయి. బాలీవుడ్‌లో అక్షయ్‌కుమార్‌ సినిమా ‘లక్ష్మీబాంబ్‌’ ఓటీటీలో వచ్చేస్తోంది. తమిళ సినిమాలు, తెలుగు సినిమాలు, హిందీ సినిమాలు.. ఇలా అన్నీ ఓటీటీ వైపే చూడాల్సి వస్తోంది. ‘ఎట్టి పరిస్థితుల్లోనూ ఓటీటీ వైపు వెళ్ళబోం..’ అని చెప్పిన కొందరు నిర్మాతలు, ఇప్పుడు ఓటీటీ బేరాల్లో నిమగ్నమవ్వాల్సిన పరిస్థితి. ఒక్కసారి ఓటీటీకి జనం అలవాటు పడితే, ఇక ఆ తర్వాత థియేటర్లకు వెళ్ళి సినిమాలు చూడాలన్న ఇంట్రెస్ట్‌ని ఏమాత్రం ఆడియన్స్‌ చూపించే అవకాశం వుండదన్నది ఓ సినీ ప్రముఖుడి విశ్లేషణ.

టాలీవుడ్‌లో బోల్డన్ని సినిమాల్ని నిర్మించిన స్టార్‌ ప్రొడ్యూసర్‌ ఒకరు, మారుతున్న పరిణామాల నేపథ్యంలో థియేటర్ల బిజినెస్‌ రెండేళ్ళలోనే పూర్తిగా నాశనమైపోవచ్చు.. అని ఓ ఇంటర్వ్యూలో కుండబద్దలుగొట్టేశారు. కరోనా కారణంగా ఆ పరిస్థితి ఇంకా ముందే రావొచ్చని ఆవేదన వ్యక్తం చేశారు ఆ సినీ ప్రముఖుడు. మరికొందరు సినీ ప్రముఖులదీ ఇదే వాదన. నిజానికి, సినీ పరిశ్రమ సంక్షోభంలో పడింది కరోనా కారణంగా మాత్రమే కాదు. కరోనా కంటే కొద్ది రోజుల ముందే టాలీవుడ్‌లో సినిమా బిజినెస్‌పై కొంత ఆందోళన నెలకొంది. అదిప్పుడు మరింత తీవ్రమైందంతే.

దర్శకుడు రావ్‌ుగోపాల్‌ వర్మ, చిన్న చిన్న సినిమాల్లాంటివి తీసేసి, ఓటీటీ (ఎటీటీ అని కూడా అంటున్నాడు) రిలీజ్‌లు చేసేస్తున్న విషయం విదితమే. లాక్‌డౌన్‌లో గట్టిగా వెనకేసున్నది బహుశా ఆర్జీవీ మాత్రమేనేమో టాలీవుడ్‌కి సంబంధించి. ఓటీటీ అనగానే బూతు.. అన్న భావన వుంది. అందులో నిజం లేకపోలేదు కూడా. ఆ బూతు సంగతి పక్కన పెడితే, ఎంటర్‌టైన్‌మెంట్‌ ఇండస్ట్రీకి ఇప్పుడు ఓటీటీ ఓ అద్భుతమైన అవకాశంగా మారింది. ఓటీటీ పట్ల ఆడియన్స్‌ కూడా ఎడిక్ట్‌ అయిపోతున్న దరిమిలా.. థియేటర్‌ కల్చర్‌ అతి త్వరలోనే ‘తెరమరుగు’ అయిపోయినా ఆశ్చర్యపోనక్కర్లేదు.