మహేష్బాబు టాలీవుడ్లో సూపర్ స్టార్. కానీ, తమిళనాడులో అంత సీన్ కన్పించడంలేదు. మహేష్ అనే కాదు, తెలుగు హీరోల్లో ఎవరికీ తమిళనాడులో అంత సీన్ వుండదు. కారణాలు వెతికితే చాలానే దొరుకుతాయి. తమిళ హీరోలు తెలుగులోనూ స్టార్లుగా సత్తా చాటేస్తారుగానీ.. మనోళ్ళకి మాత్రం అక్కడ అంత క్రేజ్ లభించదుగాక లభించదు.
తమిళ సినిమా మార్కెట్పై తెలుగు హీరోలు ఫోకస్ పెట్టలేదనడం కూడా సరికాదు. కానీ, అక్కడ మన సినిమాల్ని సరిగ్గా ఆదరించరు. అదే అసలు సమస్య. అన్నట్టు, మన తెలుగు హీరోయిన్లు మాత్రం తమిళనాడులో అవకాశాలు దక్కించుకుంటారు. ఆ మాటకొస్తే, తెలుగు సినిమాలతో కంటే తమిళ సినిమాలతో క్రేజ్ సంపాదించుకున్న హీరోయిన్లు ఎందరో కన్పిస్తారు. ఎందుకిలా.? ఇదేమీ మిలియన్ డాలర్ల ప్రశ్న కాదు. కానీ, సమస్యకు మాత్రం పరిష్కారం దొరకడంలేదు.
తెలుగు సినిమా తన స్థాయిని పాన్ ఇండియా రేంజ్కే కాదు, ఇంటర్నేషనల్ లెవల్కి పెంచుకుంది. సౌత్లో తెలుగు సినీ పరిశ్రమే అతి పెద్దది. ఆ తర్వాతి స్థానం తమిళ సినిమాదే. అయినాగానీ, తమిళ సినీ అభిమానులు, తెలుగు సినిమాల పట్ల ఆసక్తి చూపించరు. ‘సైరా నరసింహారెడ్డి’ సినిమా కోసం ఏ స్థాయిలో తమిళనాట ప్రమోషన్స్ జరిగాయో చూశాం.
అంతకు ముందు ‘స్పైడర్’కీ అలాగే జరిగింది. ‘బాహుబలి’, ‘సాహో’ పరిస్థితి వేరు. తెలుగు నాట రజనీకాంత్ నుంచి కార్తీ వరకూ చాలామంది స్టార్డమ్ కొనసాగిస్తున్నారు. కానీ, అలా తెలుగు హీరోలు తమిళ నాట స్టార్లు అయ్యారా.? అంటే లేదాయె. ‘ఖైదీ’ సినిమాపై మహేష్ ప్రశంసలు గుప్పించాడు. రజనీకాంత్కి ఇక్కడ చాలామంది సినీ ప్రముఖులూ అభిమానులే. ఆ పరిస్థితి మన హీరోలకీ తమిళనాడులో వస్తే ఎంత బావుంటుందో కదా.!