కరోనా అతి త్వరలోనే తగ్గిపోతుందట.. కామెడీ కాదు కదా.!

ప్రభుత్వంలో వున్నవారు, కీలక పదవుల్లో వున్నవారు ప్రజలకు భరోసా ఇవ్వాల్సిందే. కరోనా మహమ్మారి నేపథ్యంలో ప్రజలకు పాలకులు భరోసా ఇవ్వడం తప్పనిసరి. అదే సమయంలో, ఇది ప్రపంచాన్ని వణికిస్తోన్న మహమ్మారి గనుక, ప్రజల్ని అప్రమత్తం చేసే క్రమంలో కాస్తో కూస్తో ప్రజల్లో ‘కొంచెం భయం’ వుండేలా కూడా చూడాలి. కొన్నాళ్ళ క్రితం తెలంగాణ ముఖ్యమంత్రి కేసీఆర్‌.. కొద్ది రోజుల్లోనే తెలంగాణ నుంచి కరోనా మాయమైపోతుందని చెప్పారు.

ఇది మూడు నాలుగు నెలల క్రితం మాట. కానీ, ఇప్పుడు పరిస్థితి ఏంటో చూస్తున్నాం. అయితే, గ్రేటర్‌ హైద్రాబాద్‌లో పరిస్థితి ఇప్పుడిప్పుడే కాస్త కుదుటపడుతోంది. రోజుకి దాదాపు వెయ్యి కేసులు నమోదయిన పరిస్థితుల నుంచి రోజుకి 500కి అటూ ఇటూగా కేసులు నమోదవుతున్న పరిస్థితుల్ని చూస్తున్నాం. అయితే, దీన్ని నిజమైన తగ్గుదల.. అని అనడానికి వీల్లేదు. ఎందుకంటే, పొరుగు రాష్ట్రం ఆంధ్రప్రదేశ్‌లో సగటున రోజుకి 60 వేల కరోనా టెస్టులు చేస్తున్నారు. కానీ, తెలంగాణలో రోజుకి 30 వేల టెస్టులు చేసిన పరిస్థితి ఇప్పటికీ లేదు.

టెస్టులు పెరిగితే, ఆటోమేటిక్‌గా కేసులు కూడా ఎక్కువగానే కన్పించే అవకాశముంది. అలాగని, ప్రజల్ని భయపెట్టేయడం కూడా మంచిది కాదు. ఇక, సెప్టెంబర్‌ చివరి నాటికి తెలంగాణలో కరోనా పూర్తిగా తగ్గిపోయే అవకాశాలున్నాయని తెలంగాణ హెల్త్‌ డైరెక్టర్‌ ప్రకటించడం పెను సంచలనంగా మారింది. నిజమేనా.? ఆ పరిస్థితులు వున్నాయా.? అన్న విషయమై భిన్నాభిప్రాయాలు వ్యక్తమవుతున్నాయి.

తెలంగాణకి పొరుగు రాష్ట్రాలైన మహారాష్ట్ర, కర్నాటక, ఆంధ్రప్రదేశ్‌లలో కరోనా విజృంభించేస్తోంది. ఆయా రాష్ట్రాల నుంచి నిత్యం తెలంగాణకి జనం రాకపోకలు సాగిస్తుంటారు. అలాంటప్పుడు, తెలంగాణలో కరోనా అదుపులోకి వచ్చే పరిస్థితి ఇప్పట్లో వుంటుందని ఎలా అనుకోగలం.? తమిళనాడు, కర్నాటక, మహారాష్ట్ర, ఆంధ్రప్రదేశ్‌లతో పోల్చితే తెలంగాణలో జరుగుతున్న టెస్టుల సంఖ్య చాలా చాలా తక్కువ. ఆ దిశగా తెలంగాణ ప్రభుత్వం మరింత శ్రద్ధ పెట్టడం తప్పనిసరి. న్యాయస్థానాలు మొట్టికాయలేస్తున్నా.. తెలంగాణలో టెస్టుల సంఖ్య పెరగకపోవడం ఆశ్చర్యకరమే.