Janasena: జనసేనాని వ్యూహం.! టీడీపీ, వైసీపీ రంగులు బయటపడుతున్నాయ్.!

Janasena: జనసేన అధినేత పవన్ కళ్యాణ్, మచిలీపట్నం వేదికగా జరిగిన జనసేన పార్టీ పదవ ఆవిర్భావ దినోత్సవ వేడుకలో ‘పొత్తులు’ సహా అనేక అంశాలపై చేసిన కీలక వ్యాఖ్యలు, రాజకీయ వర్గాల్లో పెను దుమారానికి కారణమయ్యాయి. వంగవీటి రంగా ప్రస్తావన సహా, జనసేనాని చేసిన ప్రతి వ్యాఖ్య కూడా వైసీపీ, టీడీపీల్లో చర్చనీయాంశమవుతున్నాయి.

గతంలో కంటే భిన్నంగా ఈసారి అటు వైసీపీ నుంచీ, ఇటు టీడీపీ నుంచి కూడా విపరీతమైన ట్రోలింగ్ జరుగుతోంది జనసేన అధినేత పవన్ కళ్యాణ్ మీద. టీడీపీ ప్రచారం చేస్తోన్న ‘ఇరవై సీట్ల’ అంశానికి జనసేన అధినేత ఇచ్చిన కౌంటర్ ఎటాక్ సహా, టీడీపీ అనుకూల మీడియా తెరపైకి తెచ్చిన వెయ్యి కోట్ల ప్యాకేజీ ‘గాలి వార్త’పై పవన్ కళ్యాణ్ మండిపాటు.. పెద్ద రచ్చకు కారణమవుతోంది.

ఎప్పుడూ ఉప్పూ.. నిప్పూ.. అన్నట్టుండే వైసీపీ, టీడీపీ.. ఈసారి ఒక్కటైనట్లే కనిపిస్తోంది. వైసీపీ సోషల్ మీడియా విభాగం చేస్తోన్న ట్రోలింగ్ కామెంట్స్‌ని టీడీపీ సోషల్ మీడియా విభాగం కాపీ పేస్ట్‌లా వాడేస్తోంటే.. సేమ్ టు సేమ్.. టీడీపీ కామెంట్లను వైసీపీ వాడేస్తోంది.

జనసేనను మిత్రపక్షంగా టీడీపీ గత కొంతకాలంగా భావిస్తోంది. అయితే, ఈ విషయమై జనసేన అధినేత పవన్ కళ్యాణ్ ఇంతవరకు నేరుగా, అధికారికంగా స్పష్టత ఇచ్చింది లేదు. టీడీపీ అధినేత చంద్రబాబు, జనసేన వైపు వలపు బాణాలు విసురుతున్నారు. ‘జనసేనతో కలిసి పని చేస్తాం’ అని పలు సందర్భాల్లో చంద్రబాబు చెప్పారు.

తేనె పూసిన కత్తి చందాన.. పైకి ‘మైత్రి’ అంటూనే, తెరవెనుకాల జనసేనకు టీడీపీ వెన్నుపోటు పొడుస్తోంది. ఈ క్రమంలోనే జనసేన అధినేత వ్యూహాత్మకంగా పొత్తుల అంశాన్ని ప్రస్తావిస్తూ కీలక వ్యాఖ్యలు చేశారు. కాపు – కమ్మ – రెడ్డి.. ఇలా అన్ని సామాజిక వర్గాలూ ఒక్కటై జనసేనకు అండగా నిలవాలని జనసేనాని పిలుపునివ్వడం టీడీపీకి, వైసీపీకి నచ్చలేదు.

ఈ క్రమంలోనే రెండు పార్టీలూ ఏకమైన జనసేనను తూలనాడుతోంటే, ఈ అంశం జనబాహుళ్యంలోనూ చర్చకు కారణమవుతోందనీ, టీడీపీ, వైసీపీ వక్రీకరణల్ని సాధారణ ప్రజానీకం ఓ కంట కనిపెడుతోంది.