హోంమంత్రి తానేటి వనితపై జుగుప్సాకరమైన ట్రోలింగ్.! కానీ, ఎందుకు.?

హోంమంత్రి తానేటి వనతి ఎట్టకేలకు మీడియా ముందుకొచ్చారు.. హిందూపురం ఎంపీ గోరంట్ల మాధవ్ న్యూడ్ వీడియో కాల్ వ్యవహారానికి సంబంధించి స్పందించారు. కాస్త లేటుగా అయినా, హోంమంత్రి తానేటి వనిత ఈ విషయమై స్పందించడం ఆహ్వానించదగ్గ పరిణామమే.

అయితే, ఆమె స్పందించాక.. ‘ఈమాత్రం దానికి హోం మంత్రి మీడియా ముందుకు రావడం ఎందుకు.?’ అన్న చర్చ సర్వత్రా జరుగుతోంది.

మరోపక్క, నెటిజనం హోంమంత్రి తానేట వనిత వ్యాఖ్యలపై జుగుప్సాకరమైన రీతిలో పెడార్థాలు తీస్తూ ఆమెను ట్రోలింగ్ చేస్తున్నారు.

‘ఘటనపై అన్ని కోణాల్లోనూ పరిశీలించి చర్యలు తీసుకోవాల్సి వుంది..’ అని హోంమంత్రి తానేటి వనిత వ్యాఖ్యానించడమే అందుక్కారణం. ‘అమ్మా..’ అంటే అది బూతుగా వినిపిస్తున్న రోజులివి. విషయం జుగుప్సాకరం.. దానిపై స్పందించేటప్పుడు ఆచితూచి వ్యవహరించాల్సిందే మరి.!

ఇదిలా వుంటే, వీడియోను ఫోరెన్సిక్ పరిశీలనకు పంపామని రాష్ట్ర హోంమంత్రి తానేటి వనిత ప్రకటించారు. మంచి విషయమే.! కానీ, ఆ ఫోరెన్సిక్ నివేదిక ఎలా వుంటుంది.? అసలది ఎప్పుడు వస్తుంది.? అధికార పార్టీ చేయించిన ఫోరెన్సిక్ రిపోర్ట్ ఎలా వుంటుందన్నది బహిరంగ రహస్యం.

వైసీపీ రెబల్ ఎంపీ రఘురామకృష్ణరాజుని ఏపీ సీఐడీ అదుపులోకి తీసుకున్న వైనం, అధికార పార్టీకి చెందిన ఎమ్మెల్సీ అనంతబాబుని ఏపీ పోలీసులు అదుపులోకి తీసుకున్న వైనం.. ఈ రెండిటినీ బేరీజు వేస్తే.. విషయం స్పష్టమైపోతుంది. ప్రభుత్వాన్ని విమర్శించిన కేసులో రఘురామపై తీవ్రమైన చర్యలున్నాయ్. ఓ దళిత యువకుడ్ని చంపేసిన కేసులో, వైసీపీ అనంతబాబుకి రాయల్ ట్రీట్మెంట్ లభించింది.

సో, గోరంట్ల మాధవ్ విషయంలో ఏం జరగబోతోందో జుట్టు పీక్కుని మరీ ఊహించేయనక్కర్లేదు. ‘ఇందులో రాజకీయ కుట్ర వున్నట్లుగా అనిపిస్తోంది..’ అని హోంమంంత్రి చెప్పడంతోనే కేసు నీరుగారిపోయిందనే విషయం అర్థమవుతోంది. రాజకీయ కుట్ర కోణంలో విచారణ జరిగితే, రాజకీయ కోణమే కనిపిస్తుంది. ఇందులో ఇంకో మాటకు తావు వుండదు కదా.? అన్నది రాజకీయ పరిశీలకుల వాదన.