వైసీపీ రంగులపై ‘సుప్రీం’ స్ట్రోక్‌.!

అయినా, ప్రభుత్వాలకి ఈ రంగుల పిచ్చేంటి.? ఏ పార్టీ అధికారంలో వుంటే, ఆ పార్టీ రంగుల్ని జనం మీద బలవంతంగా రుద్దడమేంటి.? కాస్తంతైనా ఇంగితం లేనివారు ‘సేవ’ చేస్తాం అంటూ రాజకీయాల్లోకి వచ్చేసి, అధికార పీఠమెక్కేస్తోంటే, అలాంటివారికి అధికారమిచ్చినందుకు ప్రజలు అనుభవించాల్సిందేనేమో.! ‘మీ పార్టీ రంగుల్ని మా మీద ఎందుకు రుద్దుతున్నారు.?’ అని జనం నిలదీస్తే తప్ప, రాజకీయ పార్టీలు మారవు.

టీడీపీ హయాంలో పసుపు రంగు, అంతకు ముందు కాంగ్రెస్‌ హయాంలో మూడు రంగులు, ఇప్పుడు వైసీపీ హయాంలో మళ్ళీ మూడు రంగులు (గతంలో కాంగ్రెస్‌ రంగులు, ఇప్పుడు వైసీపీ రంగులు).. జనాన్ని పిచ్చెక్కించేస్తున్నాయంతే. ప్రభుత్వ కార్యాలయాలపై ఈ వైసీపీ రంగులు వివాదాస్పదమవుతున్నాయి. హైకోర్టు ఆల్రెడీ మొట్టికాయలేస్తే, వైఎస్‌ జగన్‌ సర్కార్‌ తాజాగా సుప్రీంకోర్టుని ఆశ్రయించింది. ‘హైకోర్టు చాచి లెంపకాయ కొడితే.. అక్కడితో బుద్ధి తెచ్చుకోకుండా సుప్రీంకోర్టుకి వెళ్ళి రెండు చెంపలూ పగలగొట్టించుకున్నట్టుంది పరిస్థితి..’ అన్న చర్చ సోషల్‌ మీడియాలో జరుగుతోందిప్పుడు. అవును, సుప్రీంకోర్టు కూడా, రాష్ట్ర ప్రభుత్వానికి మొట్టికాయలేసింది.

‘కేంద్ర ప్రభుత్వం తమ కార్యాలయాలకి కాషాయ రంగు వేస్తే మీరు ఊరుకుంటారా.?’ అని ప్రశ్నించింది సర్వోన్నత న్యాయస్థానం. నిజమే, రంగుల గురించిన చర్చ జరగాల్సిన సందర్భమిది. రాజకీయ పార్టీలకు చెందిన రంగులు, ప్రభుత్వ ఆస్తులపై అస్సలు కన్పించకూడదన్న చట్టం వచ్చి తీరాల్సిందేనేమో.! రేషన్‌ కార్డుల మీద అధికార పార్టీ రంగులు, ఇంకో ప్రభుత్వ పథకమ్మీద అధికార పార్టీ రంగులు. ఏం, ఎక్కడినుంచి తీసుకొస్తున్నాయి ప్రభుత్వాలు డబ్బుల్ని.? ప్రజలు పన్నుల రూపంలో చెల్లించే మొత్తాలే, ప్రభుత్వ ఖజనానాకి జమ అవుతున్నాయి.

అలాంటప్పుడు, తమ తాతలు తండ్రులు సంపాదించిన సంపాదన అన్నట్లు, ప్రజా ధనాన్ని తమ సొంత పార్టీల రంగుల కోసం వినియోగించడమేంటి.? నవ్విపోదురుగాక మనకేటి సిగ్గు.? అన్నట్టుంది అధికారంలో వున్న పార్టీల ఆలోచన. వైఎస్‌ జగన్‌ సర్కార్‌ ఇకనైనా బుద్ధి తెచ్చుకోవాలి. రంగుల రాజకీయం పక్కన పెట్టి, ప్రజల గురించి ఆలోచించకపోతే.. ప్రజలు తిరగబడే రోజులొస్తాయ్‌.!