A1 ఎక్స్ ప్రెస్ మూవీ రివ్యూ: సందీప్ కిషన్ వన్ మాన్ షో

యంగ్ హీరో సందీప్ కిషన్ సాలిడ్ హిట్ కొట్టడం కోసం, తను ఎంతో ఇష్టపడిన తమిళ హిట్ ఫిల్మ్ ‘నట్పే తుణై’ రీమేక్ రైట్స్ తీసుకొని, తెలుగు ప్రేక్షకులకు తగ్గట్టుగా మార్పులు చేసి తెలుగులో చేసిన ఫస్ట్ హాకీ బేస్డ్ ఫిల్మ్ ‘A1 ఎక్స్ ప్రెస్’. లావణ్య త్రిపాఠి హీరోయిన్ గా నటించిన ఈ సినిమాకి డెన్నిస్ జీవన్ డైరెక్టర్. ట్రైలర్ తో ఆకట్టుకున్న ఈ సినిమా నేడు ప్రేక్షకుల ముందుకు వచ్చింది. మరి ఈ ఎక్స్ ప్రెస్ ఏ రేంజ్ లో ఎంటర్టైన్ చేసిందో చూద్దాం..

కథ:

సందీప్ నాయుడు(సందీప్ కిషన్) ఎలాగైనా ఫ్రాన్స్ కి వెళ్లి అక్కడ సెటిల్ అవ్వాలనుకునే కుర్రాడు. ఆ పని మీదే తన మామయ్య ఊరు యానాం వెళ్లిన సందీప్ అక్కడ హాకీ ప్లేయర్ లావణ్య రావు(లావణ్య త్రిపాఠి)ని చూసి ప్రేమలో పడతాడు. మొదట్లో సందీప్ ని పెద్దగా పట్టించుకోని లావణ్య మెల్ల మెల్లగా తన ప్రేమలో పడుతుంది. అదే టైంలో స్పోర్ట్స్ మినిస్టర్, యానాంలోని హిస్టారికల్ చిట్టిబాబు హాకీ గ్రౌండ్ ని డబ్బు కోసం ఓ టెట్రా స్టార్ మెడికల్ కంపెనీకి ఫ్యాక్టరీ పెట్టుకోవడానికి పర్మిషన్ ఇప్పిస్తానని డీల్ సెట్ చేసుకుంటాడు. అది తెలుసుకొని కోచ్ మురళి శర్మ ఆ గ్రౌండ్ మళ్ళీ దక్కించుకోవాలంటే యానాం టీమ్ ఫ్రాన్సిస్ టీంతో ఒక హాకీ మ్యాచ్ ఆడాల్సి వస్తుంది. దాని కోసం నేషనల్ ప్లేయర్స్ కావాలి అనుకున్నపుడు ఎక్స్ ఇంటర్నేషనల్ ప్లేయర్ సందీప్ ని అడుగుతారు. కానీ అతనికున్న ఫ్లాష్ బ్యాక్ వలన ఆడను అంటాడు. సందీప్ ఫ్లాష్ బ్యాక్ ఏంటి? ఎందుకు హాకీ వదిలేసాడు? చివరికి రావు రమేష్ ఎత్తులకు బలైపోతున్న చిట్టి బాబు గ్రౌండ్ కోసం మ్యాచ్ ఆడాడా? లేదా? ఆడితే గెలిపించి గ్రౌండ్ సొంతం చేసుకున్నారా లేదా? అన్నదే కథ.

తెరమీద స్టార్స్..

A1 ఎక్స్ ప్రెస్ లో ఫ్లాష్ బ్యాక్ ఎపిసోడ్స్ మరియు హాకీ మ్యాచ్ లలో కనిపించే సందీప్ కిషన్ సరికొత్త లుక్ లో ఆకట్టుకోవడమే కాకుండా, తన టోన్డ్ బాడీతో లేడీ ఫాన్స్ కి మరింత నచ్చేస్తాడు. అలాగే ఫస్ట్ హాఫ్ లో ఎనర్జిటిక్ లవర్ బాయ్ గా బాగా చేసాడు. ఫ్లాష్ బ్యాక్ ఎమోషనల్ పెర్ఫార్మన్స్ కి ఆడియన్స్ కనెక్ట్ అవుతారు. లావణ్య త్రిపాఠి కూడా ఈ సినిమాలో చాలా బ్యూటిఫుల్ గా కనిపిస్తుంది. ముఖ్యంగా ఫస్ట్ హాఫ్ లో లవ్ ట్రాక్ లో తన క్యూట్ లుక్స్ కి కుర్రకారు బాగానే కనెక్ట్ అవుతుంది. రావు రమేష్ వెటకారం, నెగటివ్ షేడ్స్ మిక్స్ అయిన పొలిటీషియన్ గా అక్కడక్కడా నవ్వించడమే కాకుండా మీడియా, పాలిటిక్స్, పీపుల్ మీద వేసిన సెటైరికల్ డైలాగ్స్ బాగున్నాయి. సత్య, మహేష్ విట్టలు అక్కడక్కడా నవ్విస్తారు. సినిమాకి కీలకమైన ఎమోషనల్ ఎపిసోడ్స్ లో దర్శి, రాహుల్ రామకృష్ణలు తమ నటనతో సినిమాకి బలం చేకూర్చారు. మురళి శర్మ, పోసాని కృష్ణమురళి, అభిజీత్ లు తమ పాత్రల పరిధిమేర నటించారు.

తెర వెనుక టాలెంట్..

A1 ఎక్స్ ప్రెస్ సినిమాకి మాతృక తమిళ సినిమా నట్పే తుణై.. ఆ సినిమా నుంచి పలు మార్పులు చేశారు, ఆ మార్పు చేర్పుల్లో భాగంగా కొన్ని కమర్షియల్ అంశాలు యాడ్ చేశారు. కానీ సినిమాకి కీలకమైన కొన్ని పాత్రలని ఎస్టాబ్లిష్ చేయడం మిస్ అయ్యారు. ఉదాహరణకి ఎమోషనల్ గా కనెక్ట్ చేయాల్సిన కోచ్ మురళి శర్మ పాత్రని సరిగా ఎస్టాబ్లిష్ చేయలేదు. ఇక కథనం విషయంలో ఫస్ట్ హాఫ్ పాత్రల్ని ఎస్టాబ్లిష్ చేయడంలోనే సరిపోతే సెకండాఫ్ లో కథ మొదలవుతుంది. అందులో ఫ్లాష్ బ్యాక్ ఎపిసోడ్ బాగున్నా ఆ తర్వాత జరిగే సీన్స్ అంత ఆసక్తికరంగా అనిపించవు. సినిమాకి ప్రాణమైన క్లైమాక్స్ హాకీ మ్యాచ్ ని బాగుందా అంటే బానే ఉంది అనగలం కానీ మిమ్మల్ని సీట్ ఎడ్జ్ లో కూర్చోబెట్టేలా చేసిందా అంటే మాత్రం లేదనే చెప్పాలి. స్పోర్ట్స్ డ్రామా సినిమాలకి క్లైమాక్స్ మ్యాచ్ చాలా ఇంపార్టెంట్ కానీ అదే లైట్ అయిపోవడం, దానికి సుమ మరియు హర్షలతో చెప్పించిన కామెంటరీ కూడా వర్క్ అవుట్ అవ్వలేదు. కథనం పరంగా మ్యాజిక్ క్రియేట్ చేయలేకపోయారని చెప్పచ్చు. డైరెక్టర్ గా డెన్నిస్ జీవన్ పెర్ఫార్మన్స్ లని రాబట్టుకోవడం లో సక్సెస్ అయ్యాడు, కానీ ఒక స్పోర్ట్స్ ఫిలింని ఆధ్యంతం ఉత్కంఠగా చెప్పడంలో సగ భాగమే సక్సెస్ అయ్యారని చెప్పాలి.

ఈ సినిమాకి టెక్నికల్ డిపార్ట్ మెంట్స్ లో మ్యూజిక్ డైరెక్టర్ హిప్ హాఫ్ తమిళ సాంగ్స్ అండ్ బ్యాక్ గ్రౌండ్ మ్యూజిక్ హైలైట్ అయితే, కవిన్ రాజ్ సినిమాటోగ్రఫీ బిగ్గెస్ట్ మైనస్. విజువల్స్ మనకి సినిమాలో ఇన్వాల్వ్ అవ్వడంలో సహాయపడలేదని చెప్పాలి. కలరింగ్ మరియు ఫోకస్ ల విషయంలో అస్సలు కేర్ తీసుకోలేదనేది తెరపై క్లియర్ గా తెలుస్తుంది. చోట కె ప్రసాద్ ఎడిటింగ్ బాగుంది, కానీ సెకండాఫ్ ని ఇంకాస్త రేసీగా కట్ చేయాల్సింది. ప్రొడక్షన్ వాల్యూస్ బాగున్నాయి.

విజిల్ మోమెంట్స్:

– సందీప్ కిషన్ వన్ మాన్ షో
– ఫ్లాష్ బ్యాక్ ఎమోషనల్ ఎపిసోడ్
– ఫస్ట్ హాఫ్ లవ్ ట్రాక్
– ఇంటర్వెల్ ఎపిసోడ్
– రావు రమేష్ పాత్ర

బోరింగ్ మోమెంట్స్:

– పాత్రలని ఇంకాస్త బెటర్ గా డిజైన్ చేయాల్సింది
– ఆసక్తిగా లేని కథనం
– స్లో అనిపించే సెకండాఫ్
– సినిమాటోగ్రఫీ అండ్ డిఐ
– బెటర్ గా ఉండాల్సిన క్లైమాక్స్ మ్యాచ్

విశ్లేషణ:

యంగ్ హీరో సందీప్ కిషన్ తనకి బాగా కలిసి వచ్చిన ఎక్స్ ప్రెస్ టైటిల్ ని మళ్ళీ పెట్టుకొని, చాలా కాన్ఫిడెంట్ గా చేసిన స్పోర్ట్స్ డ్రామా ‘A1 ఎక్స్ ప్రెస్’ ఆధ్యంతం ఆకట్టుకోకపోయినా అక్కడక్కడా బాగానే అనిపిస్తుంది. స్పోర్ట్స్ డ్రామా సినిమా అంటే ఫస్ట్ హాఫ్ లో కథని డెవలప్ చేసినా, సెకండాఫ్ లో అటు ఎమోషన్స్ తో, ఇటు మ్యాచ్ లతో సీట్ లో నుంచి కదలనీకుండా చేసేలా ఉండాలి కానీ ఎమోషనల్ టచ్ ఇచ్చినా దాన్ని కంటిన్యూ చేయడంలో కాస్త తడబడ్డారు. ఓవరాల్ గా ఎలాంటి అంచనాలు పెట్టుకోకుండా ‘A1 ఎక్స్ ప్రెస్’ కేసినేమాకి వెళ్తే పరవాలేదు అనే ఫీలింగ్ తో బయటకి వస్తారు.

చూడాలా? వద్దా?: సందీప్ కిషన్ ఫాన్స్ హ్యాపీగా చూడచ్చు.

తెలుగుబులెటిన్.కామ్ రేటింగ్ : 2.5/5