గుండె పోటు వర్సెస్ గొడ్డలి పోటు.. సీబీఐ విచారణ దారెటు.?

2019 ఎన్నికల్లో అధికార వైసీపీని గెలిపించిన అంశాల్లో మాజీ మంత్రి వైఎస్ వివేకానందరెడ్డి హత్య చుట్టూ జరిగిన రాజకీయం కూడా ఒకటి. చంద్రబాబే ఆ హత్య చేయించాడని అప్పట్లో వైఎస్సార్ కాంగ్రెస్ పార్టీ ఆరోపించింది. కాదు కాదు, వైఎస్ జగన్ మోహన్ రెడ్డి.. ఎన్నికల్లో రాజకీయ లబ్ది కోసం వైఎస్ వివేకానందరెడ్డిని చంపించేసి, సింపతీ కొట్టేశారన్నది అప్పట్లో టీడీపీ చేసిన ఆరోపణ. ఏది నిజం.? అసలు వైఎస్ వివేకానందరెడ్డి ఎలా చనిపోయారు.? రెండేళ్ళు గడిచింది.. ఇంతవరకూ ‘క్లూ లెస్’ కేసుగానే వుందిది.

వైఎస్ వివేకానందరెడ్డి గుండెపోటుతో చనిపోయారంటూ తొలుత ప్రచారం జరిగింది. మీడియాలో ఈ వార్తే ముందుగా వచ్చింది. వైసీపీ ముఖ్య నేతలూ ఈ దిశగానే సంతాపం ప్రకటించేశారు. కానీ, గుండె పోటు కాదది.. గొడ్డలి వేటు.. అని తేలడానికి ఎక్కువ సమయం పట్టలేదు. అత్యంత కిరాతకంగా వైఎస్ వివేకానందరెడ్డి చంపబడ్డారు. అంత కిరాతకంగా అతన్ని చంపాల్సిన అవసరం ఎవరికి వుంది.? రక్తపు మరకలు తుడిచే ప్రయత్నం ఎందుకు జరిగింది.? గొడ్డలి వేటుని, గుండెపోటుగా నమ్మించేందుకు ప్రయత్నించిందెవరు.? అన్న ప్రశ్నల చుట్టూ జరగాల్సిన స్థాయిలో విచారణ జరిగితే, ఎవరి ‘హస్తం’ ఇందులో వుందో ఇట్టే తేలిపోతుంది.

సీబీఐ చేతికి వెళ్ళినా, విచారణ నానుతూనే వుందంటే, కాస్త ఆలోచించాల్సిన విషయమే ఇది. రాష్ట్రానికి సంబంధించి ‘సిట్’ తేల్చిందేమీ లేదు. సీబీఐ విచారణ జరుగుతోంది.. ఆ విచారణ చుట్టూ రకరకాల ఊహాగానాలొస్తున్నాయి. ఇంత నిర్లక్ష్యమా.? అసలు ఈ కేసు ఇంత కాంప్లికేట్ ఎందుకు అవుతోంది.? అంటూ రాష్ట్ర ప్రజానీకం ముక్కున వేలేసుకుంటున్నారు.

సాక్షాత్తూ ముఖ్యమంత్రి వైఎస్ జగన్ మోహన్ రెడ్డికి సొంత బాబాయ్ వైఎస్ వివేకానందరెడ్డి. అంటే, తన కుటుంబంలో జరిగిన హత్యకు సంబంధించి నిందితులెవరో వైఎస్ జగన్ మోహన్ రెడ్డి ముఖ్యమంత్రి హోదాలో వుండీ తేల్చలేకపోతున్నారంటే ఏమనుకోవాలి.? ‘సీబీఐ విచారిస్తోంది.. మాకేంటి సంబంధం.?’ అంటూ అధికార పార్టీ అత్యంత హేయమైన వ్యాఖ్యలు చేస్తోంది. సీబీఐకి వెళ్ళకముందు రాష్ట్ర ప్రభుత్వమే కేసు విచారణ చేపట్టింది కదా.? ఏం నిజాలు తేలినట్టు.!