Jananayagan: తమిళ హీరో విజయ్ నటించిన జననాయగన్ సినిమా లీక్ అంశం తీవ్ర కలకలం రేపిన సంగతి తెలిసిందే. ఒక్కసారిగా దక్షిణాది చిత్రసీమను కలవరపరచిందనే చెప్పాలి. డిజిటల్ యుగంలో సినిమా రిలీజ్ కు ముందు ఎంత జాగ్రత్తగా భద్రపరచాలో అనేందుకు ఉదాహరణగా నిలిచింది. భారీ నిర్మాణంతో తెరకెక్కిన సినిమా కావడం, విజయ్ పొలిటకల్ ఇష్యూస్ నేపథ్యంలో కేసును సీరియస్గా తీసుకున్న పోలీసులు పురోగతి సాధించారు. సినిమా లీక్ కు సంబంధం ఉన్న ఆరుగురిని పోలీసులు అరెస్ట్ చేశారు. ప్రాథమిక దర్యాప్తు ప్రకారం సినిమాలో కొన్ని కీలక సన్నివేశాలు ఎడిటింగ్ లేదంటే పోస్ట్ ప్రొడక్షన్ దశలోనే లీక్ అయినట్టు అనుమానిస్తున్నారు.
విచారణలో టెక్నికల్ అంశాల ద్వారా నిందితులను ట్రాక్ చేసి గుర్తించారు. ఈక్రమంలోనే నిందితులను అదుపులోకి తీసుకున్నారు. దీని వెనుక ఒక వ్యవస్థ పని చేసిందనే అనుమానాలూ వ్యక్తమవుతున్నాయి. నిందితులు ఆరుగురిని వివిధ ప్రాంతాల్లో ప్రత్యేక ఆపరేషన్లు పకడ్బందీగా నిర్వహించి పట్టుకున్నారు. వీరిలో కొందరు టెక్నికల్ గా, మరికొందరు డిజిటల్ ప్లాట్ఫామ్ లో కంటెంట్ అప్లోడ్ చేయడంలో నిందితులుగా గుర్తించినట్లు తెలుస్తోంది. దీంతో పోలీసులు విచారణ వేగవంతం చేశారు. లీక్కు కారకులు ఎవరు..? నెట్ వర్క్ ఏమైనా ఉందా..? తెర వెనుక సూత్రధారులు ఎవరు? సినిమా ఫైల్ ఎలా బయటకు వెళ్లింది? ఆన్లైన్లో అప్లోడ్ చేయడానికి ఏ ప్లాట్ ఫామ్స్ ఉపయోగించారనే అంశాలపై విచారిస్తున్నారు.
జననాయగన్ సినిమా భారీ అంచనాలతో తెలుగులోవచ్చిన భగవంత్ కేసరికి రీమేక్ గా తెరకెక్కింది. అయితే.. పొలటికల్ అంశాలు, డైలాగ్స్ ఉన్నాయన్న కారణంతో సినిమాకు సెన్సార్ అడ్డంకులు వచ్చాయి. పైగా.. విజయ్ పొలిటికల్ ఎంట్రీకి ముందు ఆయన చివరి సినిమాగా తెరకెక్కడంతో వార్తల్లో నిలిచింది. దీంతో విడుదల వాయిదాలు పడుతూ వస్తోంది. ఇప్పుడు సినిమా లీక్ కావడంతో నిర్మాతలకు, డిస్ట్రిబ్యూటర్లకు మాత్రమే కాకుండా టీమ్ మొత్తాన్ని కలవరపాటుకు గురి చేసింది. సినిమా విడుదలైనా ఇప్పటికే కంటెంట్ బయటకు వెళ్లిపోవడంతో రిలీజ్ అయ్యాక ఓపెనింగ్స్ పై ప్రభావం చూపించే అవకాశం ఉందని అంటున్నారు.