దుల్కర్ సల్మాన్, మృణాల్ ఠాకూర్ హీరోహీరోయిన్లుగా హను రాఘవపూడి తెరకెక్కించిన సీతా రామమ్ ఈరోజే ప్రేక్షకుల ముందుకు వచ్చింది. ఈ సినిమా ఎలా ఉందో చూద్దాం.
కథ:
రామ్ (దుల్కర్ సల్మాన్) రాసిన ఒక ప్రేమలేఖను సీత (మృణాల్ ఠాకూర్)కు ఇవ్వడానికి సీతను వెతకడం మొదలుపెడుతుంది అఫ్రీన్ (రష్మిక). కట్ చేస్తే కథ 1965కి వెళుతుంది. లెఫ్టినెంట్ రామ్ కు పాక్ ఆక్రమిత కాశ్మీర్ వద్ద పోస్టింగ్ వస్తుంది. అనాథ అయిన రామ్ కు సీత నుండి ఉత్తరాలు వస్తాయి. కొన్ని ఉత్తరప్రత్యుత్తరాల తర్వాత ఇద్దరి మధ్యా ప్రేమ పుడుతుంది.
అయితే పాకిస్తాన్ కు ఒక సీక్రెట్ మిషన్ మీద వెళ్లిన రామ్ అక్కడి సైనికులకు పట్టుబడతారు. పాకిస్తాన్ ప్రభుత్వానికి ఈ విషయంలో సహాయం చేసింది ఎవరు? రామ్ ప్రేమ కథ ఏమవుతుంది? అఫ్రీన్ తాను అనుకున్న మిషన్ ను పూర్తి చేస్తుందా? ఈ కథలో విష్ణు శర్మ (సుమంత్)కు ఉన్న ప్రాధాన్యం ఏంటి?
నటీనటులు:
దుల్కర్ సల్మాన్, మృణాల్ ఠాకూర్… ఇద్దరూ కూడా ఈ సినిమాకు బెస్ట్ అనిపించుకున్నారు. వీరిద్దరి మధ్య కెమిస్ట్రీ కూడా అద్భుతంగా ఉంది. సినిమా దాదాపుగా వీళ్ళ మీదే నడుస్తుంది. ఆ క్రమంలో ఇద్దరూ తమ నటనతో ఇంప్రెస్ చేస్తారు. దుల్కర్ స్క్రీన్ ప్రెజన్స్ అద్భుతం. మృణాల్ తన ముఖకవళికలతో, నటనతో సర్ప్రైజ్ చేస్తుంది.
వీరిద్దరి తర్వాత ప్రాధాన్యత ఉన్న పాత్ర రష్మికకు దక్కింది. అఫ్రీన్ గా ఆమె నటన ఓకే. తరుణ్ భాస్కర్ కూడా పర్వాలేదు. సుమంత్ కు ఇందులో ప్రాధాన్యత కలిగిన పాత్ర దక్కింది. తను మెప్పిస్తాడు. సునీల్, వెన్నెల కిషోర్ కామెడీ పర్వాలేదు. ప్రకాష్ రాజ్, గౌతమ్ మీనన్ వంటి వారిని సరిగ్గా ఉపయోగించుకోలేదు అనిపిస్తుంది. మిగిలిన వారు మామూలే.
సాంకేతిక వర్గం:
సాంకేతికంగా సీతా రామమ్ ఉన్నతంగా తెరకెక్కింది. విశాల్ చంద్రశేఖర్ అందించిన సంగీతం సినిమాకు ప్రధాన ప్లస్ పాయింట్ అని చెప్పొచ్చు. అటు పాటలు కానీ ఇటు బ్యాక్ గ్రౌండ్ మ్యూజిక్ కానీ సూపర్బ్ అంతే. పీఎస్ వినోద్, శ్రేయాస్ కృష్ణ అందించిన సినిమాటోగ్రఫీ అద్భుతంగా ఉంది. విజువల్స్ అబ్బురపరుస్తాయి. కాశ్మీర్ వాలీను బాగా చూపిస్తారు. ఆర్ట్ వర్క్ ను కూడా మెచ్చుకోవాలి.
ఎడిటింగ్ పర్వాలేదు కానీ ఫస్ట్ హాఫ్ లో ఇంకా క్రిస్పీగా ఉండొచ్చు అనిపిస్తుంది. నిర్మాణ విలువలకు ఢోకా లేదు. నిర్మాతల గట్స్ కు మెచ్చుకోవాలి.
ఇక హను రాఘవపూడి విషయానికి వస్తే కచ్చితంగా సెకండ్ హాఫ్ ఇబ్బందులను అధిగమించాడు. సెకండ్ హాఫ్ పై ఎక్కువ దృష్టి పెట్టి ఫస్ట్ హాఫ్ లో కొంత ల్యాగ్ వచ్చినా పట్టించుకోలేదు అనిపిస్తుంది. ఇంకాస్త రేసీగా ఫస్ట్ హాఫ్ ను తీర్చిదిద్ది ఉంటే సీతా రామమ్ నెక్స్ట్ లెవెల్ లో ఉండేది.
పాజిటివ్ పాయింట్స్:
- లీడ్ పెయిర్ మధ్య కెమిస్ట్రీ
- పాటలు
నెగటివ్ పాయింట్స్:
- ఫస్ట్ హాఫ్ లో వచ్చే కామెడీ, ల్యాగ్
చివరిగా:
సీతా రామమ్ పేరుకి తగ్గట్లే సీత, రామ్ మధ్య నడిచే పీరియాడిక్ లవ్ స్టోరీ. గత సినిమాల్లో చేసిన తప్పులను సరిదిద్దుకున్నాడు హను. చివరిదాకా సస్పెన్స్ ను క్యారీ చేయడంలో విజయం సాధించాడు. అయితే రన్ టైమ్ కనీసం మరో 15 నిముషాలు తగ్గించి ఉంటే కొన్ని ల్యాగ్ సీన్స్ పోయి సీతా రామమ్ మరింత ఎఫెక్టివ్ గా ఉండేది. ఏదేమైనా సీతా రామమ్ థియేటర్ లో ఎక్స్పీరియన్స్ చేయాల్సిన పీరియాడిక్ ప్రేమకథ.
తెలుగుబులెటిన్ రేటింగ్: 2.75/5