నటభూషణ శోభన్ బాబు భౌతికంగా మన మధ్య లేకపోయినా, ఆయన నటించిన చిత్రాలు, ఆయన వ్యక్తిత్వం ప్రేక్షకుల హృదయాల్లో ఇప్పటికీ చెరగని ముద్రగా నిలిచాయి. శోభన్ బాబు పేరును స్మరించుకుంటూ ఆయన అభిమానులు అఖిల భారత శోభన్ బాబు సేవా సమితి ఆధ్వర్యంలో నిరంతరం సేవా కార్యక్రమాలు చేపడుతూ ఆదర్శంగా నిలుస్తున్నారు. ఇటీవల సురేష్ ప్రొడక్షన్స్తో కలిసి ‘సోగ్గాడు’ సినిమా స్వర్ణోత్సవాలను ఘనంగా నిర్వహించిన విషయం తెలిసిందే.
ఈ క్రమంలో శోభన్ బాబు జయంతిని పురస్కరించుకుని, తెలుగు సినీ పరిశ్రమలో ప్రతిభ, ప్రజ్ఞా పాటవాలతో ప్రేక్షకులను ఆకట్టుకుంటున్న యువ హీరోలను ప్రోత్సహించాలనే ఉద్దేశంతో ‘సోగ్గాడు శోభన్ బాబు అవార్డ్’ను ప్రారంభిస్తున్నట్లు అఖిల భారత శోభన్ బాబు సేవా సమితి ప్రకటించింది. ఈ అవార్డ్ను ప్రతి ఏడాది ఒక ప్రతిభావంతమైన యూత్ హీరోకు అందించనున్నారు.
ఈ ఏడాదికి గాను ఈ ప్రతిష్టాత్మక అవార్డ్కు యువ హీరో సిద్దు జొన్నలగడ్డను ఎంపిక చేసినట్లు సమితి గౌరవ చైర్మన్ రాశీ మూవీస్ నరసింహారావు, అడ్వైజర్ జేష్ఠ రమేష్ బాబు, నిర్మాత జె. రామాంజనేయులు, ప్రెసిడెంట్ సుధాకర్ బాబు, కన్వీనర్లు సాయి కామరాజ్, పూడి శ్రీనివాసరావు, వీరప్రసాద్, బాలసుబ్రహ్మణ్యం, బి. శ్రీనివాసరావు, యు. విజయ్, కుర్రా రాంబాబు, ధార సత్యం తెలిపారు. సిద్దు తన నటనతో యువతతో పాటు అన్ని వర్గాల ప్రేక్షకుల అభిమానాన్ని సంపాదించుకోవడంతో పాటు, భిన్నమైన పాత్రలతో ప్రత్యేక గుర్తింపు తెచ్చుకున్నారని వారు పేర్కొన్నారు.
త్వరలో శ్రేయాస్ మీడియా ఆధ్వర్యంలో నిర్వహించనున్న ప్రత్యేక కార్యక్రమంలో సిద్దు జొన్నలగడ్డకు ‘సోగ్గాడు శోభన్ బాబు అవార్డ్’ను అధికారికంగా ప్రదానం చేయనున్నట్లు నిర్వాహకులు వెల్లడించారు. ఈ అవార్డ్ ద్వారా శోభన్ బాబు సినీ వారసత్వాన్ని కొత్త తరం నటుల ద్వారా కొనసాగించాలన్నదే తమ లక్ష్యమని వారు స్పష్టం చేశారు.