శర్వానంద్ ‘శ్రీకారం’ మూవీ రివ్యూ

వరుస ప్లాప్ లతో సతమతమవుతున్న యంగ్ హీరో శర్వానంద్ హిట్ కొట్టాలనే దిశగా హార్డ్ హిట్టింగ్ పాయింట్ వ్యవసాయం మీద చేసిన సినిమా ‘శ్రీకారం’. నూతన దర్శకుడు కిషోర్ బి దర్శకత్వంలో 14 రీల్స్ నిర్మించిన ఈ సినిమాలో ప్రియాంక మోహన్ హీరోయిన్. తెలంగాణ మినిష్టర్ కేటీఆర్, మెగాస్టార్ చిరులతో సహా పలువురు సెలబ్రిటీస్ మెచ్చుకున్న ఈ సినిమా ఎలా ఉందో చూద్దాం..

కథ:

కార్తీక్ (శర్వానంద్) ఓ సక్సెస్ఫుల్ సాఫ్ట్ వేర్ ఇంజనీర్. ఆ టైంలోనే చైత్ర(ప్రియాంక మోహన్) ప్రేమించమని కార్తీక్ వెంటపడుతుంది. కానీ కార్తీక్ పట్టించుకోడు. కార్తీక్ చేస్తున్న ప్రాజెక్ట్ సూపర్ సక్సెస్ అవ్వడంతో మేనేజర్ గా ప్రమోట్ చేసి అబ్రాడ్ లో ఆఫర్ ఇస్తారు. కానీ ఆ టైంకి శ్రీకాంత్ ఫ్యామిలీ అప్పులు తీరిపోవడంతో జాబ్ మానేసి తన ఊరికెళ్ళి వ్యవసాయం చేయాలని డిసైడ్ అవుతాడు. ఆ నిర్ణయం కార్తీక్ ఫాదర్ అయిన కేశవులు(రావు రమేష్)కి నచ్చదు. దాంతో తండ్రీ – కొడుకుల మధ్య దూరం పెరుగుతుంది. అయినా సరే ఊరి నుంచి వెళ్ళిపోయిన కొందరిని వెనక్కి పిలిపించి వ్యవసాయం మొదలు పెడతాడు. ఇక కొత్తరకమైన వ్యవసాయం చేయడంలో శర్వానంద్ ఎలాంటి సవాళ్ళని ఎదుర్కున్నాడు? అసలు కార్తీక్ అంత మంచి ఆఫర్ వదులుకుని ఎందుకు వ్యవసాయం చేయాలనుకుంటాడు?మొదట్లో కార్తీక్ కి సపోర్ట్ చేయని ఆ గ్రామస్తులు తనతో జాయిన్ అయ్యారా? లేదా? కార్తీక్ ని చివరికి కేశవులు సపోర్ట్ చేశాడా? లేదా అన్నదే కథ.

తెరమీద స్టార్స్..

శర్వానంద్ శ్రీకారంలో రెండు డిఫరెంట్ లుక్స్ లో కనిపిస్తాడు. ఫస్ట్ హాఫ్ లో కొంతవరకూ కనిపించే సిటీ బాయ్ లుక్ బాగుంది మనం ఇది వరకూ చూసేసిందే, కానీ పల్లెటూరి లుంగీ లుక్ లో నిజమైన రైతులా కనిపించి సరికొత్తగా అనిపిస్తాడు. అలాగే నటన పరంగా ఇంకోమెట్టు పైకి ఎక్కాడనే చెప్పాలి. అన్ని సీన్స్ ఒక ఎత్తైతే రావు రమేష్, ప్రియాంక మరియు గ్రామస్తులతో చేసిన ఎమోషనల్ సీన్స్ లో సూపర్బ్ అనిపించుకున్నాడు. దేశానికి వెన్నెముకలాంటి వాడు రైతు అంటారు. అలా ఈ సినిమాకి హైలైట్ అయిన పాత్ర చేసింది రావు రమేష్. రైతుల మనోవేదనని కళ్ళకు కట్టినట్టు చూపించడంలో రావు రమేష్ నటన వావ్ అనిపిస్తుంది. ప్రియాంక అరుళ్ మోహన్ అటు మోడ్రన్ లుక్ లో, ఇటు ట్రెడిషనల్ లంగా వోణీలో ఆకట్టుకుంటుంది. అలాగే మొదటి సినిమాకి పూర్తి భిన్నంగా ఎనర్జిటిక్ పాత్రలో అదరగొట్టింది. ఎమోషనల్ నెగటివ్ షేడ్స్ ఉన్న పాత్రలో సాయి కుమార్ మెప్పిస్తే, శర్వాకి ఫ్రెండ్ గా అటు కామెడీని ఇటు ఎమోషన్ ని బాలన్స్ చేసే పాత్రలో సత్య సూపర్బ్ అనిపించాడు. నరేష్ ఎమోషనల్ సీన్స్ కూడా మనసుకి హత్తుకుంటాయి.

తెర వెనుక టాలెంట్..

శ్రీకారం కథ కోసం ఎంచుకున్న పాయింట్ చాలా బాగుంది. అలాగే సినిమాలో రాసుకున్న ఎమోషనల్ సీన్స్ కూడా చాలా చోట్ల మనసుకు హత్తుకొని, గడిచిపోయిన ఎన్నో జ్ఞాపకాలను మళ్ళీ మనకు గుర్తు చేస్తుంది. అక్కడి వరకూ ప్రాబ్లెమ్ అనిపించదు, కానీ హీరో పాత్ర ఎక్కడో శతమానంభవతి సినిమాని పోలి ఉండడం రొటీన్ అనిపిస్తుంది. కథ పరంగా సెకండాఫ్ ని ఇంకాస్త బెటర్ గా కొత్త వే లో చెప్పి ఉండాల్సింది. ఎందుకంటే ఈ ఫ్లేవర్ ఇది వరకూ చూసేసాం అనే ఫీలింగ్ వస్తుంది. కథనం పరంగా చూసుకుంటే ఫస్ట్ హాఫ్ లో లవ్ ట్రాక్ కాస్త ఇబ్బంది పెట్టినా, మిగిలిన సినిమా అంటా చాలా ఎమోషనల్ గా సాగి సెకండాఫ్ మీద ఆసక్తిని క్రియేట్ చేస్తుంది. కానీ సెకండాఫ్ బాగా డ్రాప్ అవుతూ అక్కడక్కడా ఒక్కో సీన్స్ బాగుంది అనేలా సాగడం వలన ఫస్ట్ హాఫ్ ఫీల్ ని క్యారీ చేయలేకపోయింది. ఇకపోతే డైరెక్టర్ గా కథ నుంచి డీవియేట్ అవ్వకుండా అనుకున్న పాయింట్ ని హార్ట్ టచింగ్ గా చెప్పడంలో సక్సెస్ అయ్యాడు. ఇలాంటి కాన్సెప్ట్ కి దగ్గరగా మహర్షి రావడంతో సెకండాఫ్ లో చేసిన మార్పులు చేర్పులు సినిమాకి మైనస్ అని చెప్పాలి.

సాయి మాధవ్ బుర్రా రాసిన డైలాగ్స్ ఒక్కోటి ఒక్కో ఆణిముత్యం అని చెప్పచ్చు. ప్రతి డైలాగ్ లోనూ ఎంతో లోతైన అర్థం ఉంటుంది. కచ్చితంగా ఆ డైలాగ్స్ శ్రీకారంకి ప్రాణం పోశాయి. యువరాజ్ సినిమాటోగ్రఫీ సింప్లీ సూపర్బ్.. ముఖ్యంగా వ్యవసాయం చేసే షాట్స్ ని చూపించిన విధానం, ఎమోషనల్ సీన్స్ లో తన విజువల్ తో మూడ్ ని క్రియేట్ చేసిన విధానం చాలా బాగుంది. ఆ విజువల్స్ ని నెక్స్ట్ లెవల్ కి తీసుకెళ్లేలా ఆడియన్స్ కి ఇంకా బాగా ఎమోషన్ కనెక్ట్ అయ్యేలా చేయడంలో మిక్కీ జె మేయర్ మ్యూజిక్ మైండ్ బ్లోయింగ్ అని చెప్పాలి. పాటలు ఎంత బాగున్నాయో అంతకు మించి నేపధ్య సంగీతం బాగుంది. మార్తాండ్ కె వెంకటేష్ ఎడిటింగ్ కూడా బాగుంది. అవినాష్ కొల్ల సెట్ వర్క్ కూడా బాగుంది. 14 రీల్స్ ప్లస్ నిర్మాణ విలువలు సూపర్బ్.

విజిల్ మోమెంట్స్:

– శర్వానంద్ బ్రిలియంట్ పెర్ఫార్మన్స్
– రావు రమేష్, నరేష్ ఎమోషనల్ సీన్స్
– హృదయాల్ని హత్తుకునే ఎమోషనల్ టచ్ తో ఫస్ట్ హాఫ్
– ప్రీ క్లైమాక్స్ అండ్ క్లైమాక్స్
– మిక్కీ జె మేయర్ బ్యాక్ గ్రౌండ్ మ్యూజిక్

బోరింగ్ మోమెంట్స్:

– స్పీడ్ బ్రేకర్ లాంటి లవ్ ట్రాక్
– రొటీన్ అనిపించే సెకండాఫ్ సీన్స్
– స్లో నేరేషన్
– వేరే సినిమాల్ని పోలిన ఫీలింగ్
– సెకండాఫ్ లో ఎమోషనల్ జర్నీ మిస్ అవ్వడం

విశ్లేషణ:

శర్వానంద్ నుంచి వచ్చిన ‘శ్రీకారం’ సినిమా చూసిన ప్రతి ఒక్కరికీ ఒక్కో చోట కచ్చితంగా ఎమోషనల్ గా కనెక్ట్ అవుతుంది. కానీ రెగ్యులర్ కామెడీ, పాట, ఫైట్ కోరుకునే ప్రేక్షకులకి మాత్రం ఈ సినిమా అంతగా నచ్చదు. శ్రీకారం మన మనసుల్ని తట్టి లేపి మనలో ఉన్న ఆవేదనల్ని, మన గడిచిన రోజుల జ్ఞాపకాల్నీ గుర్తు చేసే ఎమోషనల్ సినిమా. ఓవరాల్ గా స్లోగా సాగుతూ, అక్కడక్కడా ఎమోషనల్ గా హై ఇచ్చే సినిమా ‘శ్రీకారం’.

చూడాలా? వద్దా?: మీ లైఫ్ లోని విలేజ్ మెమోరీస్ ని టచ్ చేయాలనుకుంటే చూడచ్చు.

తెలుగుబులెటిన్.కామ్ రేటింగ్: 2.5/5