విజయ్ దేవరకొండ హీరోగా నటించిన ‘కింగ్డమ్’ సినిమా బాక్సాఫీస్ వద్ద విజయం సాధిస్తోంది. గౌతమ్ తిన్ననూరి దర్శకత్వం వహించిన ఈ చిత్రంలో సత్యదేవ్, భాగ్యశ్రీ బోర్సే, వెంకటేష్ కీలక పాత్రల్లో నటించారు. శ్రీకర స్టూడియోస్ సమర్పణలో సితార ఎంటర్టైన్మెంట్స్, ఫార్చూన్ ఫోర్ సినిమాస్ పతాకాలపై సూర్యదేవర నాగవంశీ, సాయి సౌజన్య నిర్మించారు. అనిరుధ్ రవిచందర్ సంగీతం అందించిన ఈ సినిమా జూలై 31న విడుదలై ప్రేక్షకుల నుంచి విశేష స్పందన పొందుతోంది. అన్నదమ్ముల అనుబంధంతో కూడిన గ్యాంగ్ స్టర్ డ్రామాగా ఈ చిత్రం వెండితెరపై కొత్త అనుభూతిని కలిగిస్తోంది.
సినిమా విజయంపై సత్యదేవ్ మాట్లాడుతూ – “ఇంత ఫోన్ కాల్స్, మెసేజ్లు నాకు ఎప్పుడూ రాలేదు. మొదటి షో నుంచే అందరూ నన్ను అభినందిస్తున్నారు. గౌతమ్ కింగ్డమ్ కథ చెప్పగానే ఎలాంటి ఆలోచన లేకుండా వెంటనే అంగీకరించాను. ఆ నమ్మకం ఇప్పుడు నిజమైంది. ‘బ్లఫ్ మాస్టర్’కి నాకు పేరు వచ్చింది కానీ అది నెమ్మదిగా జరిగింది. కానీ ‘కింగ్డమ్’ విజయ్ ఫ్యాన్ ఫాలోయింగ్తో వేగంగా అందరికీ చేరువైంది” అన్నారు.
శివ పాత్ర తన దగ్గరకు ఎలా వచ్చిందన్న ప్రశ్నకు సత్యదేవ్ – “గౌతమ్ మొదట నుంచే నా పేరే రాసుకున్నారు. కానీ మధ్యలో వేరే నటులను కూడా ఆలోచించారు. చివరకు షూటింగ్కు కొద్ది రోజుల ముందు నన్ను కలిశారు. కథ విన్న వెంటనే అంగీకరించాను. గౌతమ్ కూడా ‘శివ పాత్ర కోసం మొదట ఎవరిని అనుకున్నానో వారే చేస్తున్నారు’ అని ఆనందపడ్డారు” అన్నారు.
యాక్షన్ సీన్స్ పై స్పందిస్తూ – “యాక్షన్ సీన్ కి ఎమోషన్ జత అయితేనే అది ప్రేక్షకులకు కనెక్ట్ అవుతుంది. ఈ సినిమాలో అలాంటి ఎమోషన్ ఉంది కాబట్టే నాకు వచ్చిన స్పందన అద్భుతంగా ఉంది” అన్నారు.
సినిమాలో తనకు ఛాలెంజింగ్గా అనిపించిన సీన్ గురించి మాట్లాడుతూ – “విజయ్ నా తమ్ముడు అని తెలిసిన తర్వాత జైలులో జరిగే సీన్ చాలా కష్టంగా అనిపించింది. తమ్ముడంటే మనసులో ప్రేమ ఉన్నా బయటకు చూపించకూడదు. అలాగే ప్రీ క్లైమాక్స్ ఎపిసోడ్ ఫిజికల్గా చాలా కష్టమైనది. కానీ ప్రేక్షకుల స్పందన చూసాక ఆ కష్టం మరిచిపోయాను” అన్నారు.
బోట్ సీక్వెన్స్ గురించి సత్యదేవ్ – “నాకు బోట్ నడపడం రాదు. కానీ విజయ్ నమ్మి బోట్లో కూర్చోవాల్సి వచ్చింది. మొదట చాలా భయమేసింది. చిత్రీకరణ సమయంలో కొన్ని ప్రమాదాలు కూడా తప్పించుకున్నాం. బాగా ప్రాక్టీస్ చేసిన తర్వాతే ఆ సీన్ చేశాను” అన్నారు.
మురుగన్ పాత్ర పోషించిన వెంకటేష్ గురించి – “విజయ్, నాకు వచ్చినంతే పేరు వెంకటేష్కి వచ్చింది. అతను అద్భుతంగా నటించాడు. ఒక కొత్త నటుడికి ఇంత పేరు రావడం గొప్ప విషయం” అన్నారు.
విజయ్ దేవరకొండ గురించి – “విజయ్తో నాకు ముందు పరిచయం లేదు. కానీ కలిసిన తర్వాత అతను ఎంత మంచి వ్యక్తి అనేది తెలిసింది. చాలా తక్కువ సమయంలోనే అతనితో అన్నదమ్ముల్లా అనిపించింది. విజయ్ గొప్ప నటుడు కూడా” అని అన్నారు.
నిర్మాత నాగవంశీ గురించి – “వంశీ గారు గట్స్ ఉన్న ప్రొడ్యూసర్. కథ నచ్చితే ఎటువంటి రాజీ పడరు. అందుకే సితార ఎంటర్టైన్మెంట్స్ ఇంత పెద్ద సంస్థగా ఎదిగింది” అని తెలిపారు.
శివ పాత్రకు వచ్చిన పేరు గురించి – “మన నటన మాత్రమే కాదు, ఆ పాత్రను ఎలా రాస్తారన్నది కూడా ముఖ్యం. గౌతమ్ శివ పాత్రను అద్భుతంగా మలిచారు. అందుకే ప్రేక్షకులు ఆ పాత్రతో కనెక్ట్ అయ్యారు” అని అన్నారు.
తనకు వచ్చిన బెస్ట్ కాంప్లిమెంట్ గురించి – “ఒక్కరే కాదు, చాలామంది ఫోన్ చేసి అభినందించారు. ముఖ్యంగా సినీ ప్రముఖుల నుంచి వచ్చిన కాల్స్ ప్రత్యేకంగా అనిపించాయి” అన్నారు.
తదుపరి ప్రాజెక్టుల గురించి సత్యదేవ్ – “అరేబియన్ కడలి అనే సిరీస్ అమెజాన్ ప్రైమ్లో ఆగస్టు 8 నుంచి స్ట్రీమింగ్ అవుతుంది. ‘ఫుల్ బాటిల్’ సినిమా విడుదలకు సిద్ధంగా ఉంది. వెంకటేష్ మహా దర్శకత్వంలో ఓ సినిమా, అలాగే ‘ఆరంభం’ ఫేమ్ అజయ్ నాగ్తో మరో సినిమా చేస్తున్నాను. ఇంకా రెండు సినిమాలు కూడా ఉన్నాయి” అన్నారు.