సీబీఐ చిల్లర చేష్టలట.! సజ్జలవారి ఉవాచ.!

సజ్జల రామకృష్ణారెడ్డి.! ఎవరీయన.? తలపండిన రాజకీయ నాయకుడైతే కాదు. ప్రజా బలంతో గెలిచిన, ప్రజా ప్రతినిథి కూడా కాదు.! ఒకప్పుడు పాత్రికేయ రంగంలో పనిచేశాడీయన. సాక్షి మీడియా సంస్థలో యాజమాన్యానికి ‘నమ్మిన బంటు’గా పని చేసి, ఇప్పుడు వైఎస్సార్ కాంగ్రెస్ పార్టీలో కీలక నాయకుడిగా వున్నారు.

పేరుకే ప్రభుత్వ సలహాదారు.! కానీ, ఆయన్ని సకల శాఖల మంత్రిగా అభివర్ణిస్తుంటారు. హోం శాఖకు సంబంధించి ఏదన్నా కీలక విషయంపై మాట్లాడాలంటే, హోంమంత్రి రారు.. కానీ, సజ్జల స్పందిస్తుంటారు.

వైసీపీ ఎంపీ గోరంట్ల మాధవ్ నగ్న వీడియో కాల్ వ్యవహారం కావొచ్చు, మాజీ మంత్రి వైఎస్ వివేకానంద రెడ్డి హత్య కేసు వ్యవహారం కావొచ్చు.. సజ్జల రామకృష్ణారెడ్డి చిత్ర విచిత్రమైన వాదనలు వినిపిస్తుంటారు. అది అందరికీ తెలిసిన విషయమే.

అంతర్జాతీయ న్యాయస్థానానికి చీఫ్ జస్టిస్ తరహాలో, వైఎస్ వివేకానంద రెడ్డి హత్య కేసులో అవినాశ్ రెడ్డికి సజ్జల రామకృష్ణారెడ్డి తీర్పునిచ్చేశారు. ‘అవినాశ్ రెడ్డి నిర్దోషి’ అని ప్రకటించేశారు సజ్జల. అంతేనా, సీబీఐ చిల్లర చేష్టలు చేస్తోందంటూ తాజాగా సజ్జల రామకృష్ణారెడ్డి సంచలన వ్యాఖ్యలు చేశారు.

సీబీఐ అంటే, దేశంలోనే అత్యున్నత దర్యాప్తు సంస్థ. ప్రపంచ వ్యాప్తంగా వున్న అనేక దర్యాప్తు సంస్థల్లో, అత్యంత సమర్థవంతమైనవాటిల్లో ఒకటిగా సీబీఐకి ప్రత్యేకమైన గుర్తింపు వుంది. దురదృష్టమేంటంటే, మన దేశంలో అడపా దడపా సీబీఐ మీద రాజకీయ దాడులు జరుగుతుంటాయి. అలాంటి దాడులకు, సజ్జల చిల్లర వ్యాఖ్యలు ఓ ఉదాహరణ మాత్రమే.

సీబీఐ దర్యాప్తు చేస్తుంది. దోషులో, నిర్దోషులో న్యాయస్థానం తేల్చుతుంది. సీబీఐ చిల్లర వాదన చేస్తోంటే, న్యాయస్థానాలు ఆ విషయాన్ని తేల్చుతాయ్. సజ్జల ఏమీ న్యాయమూర్తి కాదు కదా.!