రూపాయి బాగానే వుందా.? కేంద్రం బుకాయింపులు దేనికోసం.?

డాలరుతో పోల్చితే రూపాయి మారకం విలువ రోజు రోజుకీ అత్యంత దయనీయంగా మారుతోంది. 80 రూపాయల మార్క్ దాటేసి, 85 రూపాయల దిశగా పరుగులు పెడుతోంది. అయితే, 85కి చేరడానికి చాలా టైమ్ పట్టొచ్చనుకోండి.. అది వేరే విషయం. ఏమో, ఈ లెక్కలు వేగంగా మారిపోవచ్చు.. తక్కువ సమయంలోనే 90 కూడా టచ్ చేయొచ్చు.. ఆ తర్వాత సెంచరీ వైపు పరుగులు పెట్టనూవచ్చు.!

అయినా, డారులతో రూపాయి మారకం విలువ పతనమైతే నష్టమేంటట.? అని చాలామంది అనుకోవచ్చుగాక. అది దేశ ఆర్థిక రంగంపై తీవ్ర ప్రభావం చూపుతుంది. డాలరుతో రూపాయి మారకం విలువ 80 దాటడంతోనే, చాలావరకు నష్టం జరిగింది. కానీ, ఆల్ ఈజ్ వెల్ అంటోంది కేంద్రం.

‘మన పరిస్థితి మరీ అంత దారుణంగా ఏమీ లేదు. చాలా దేశాల కరెన్సీతో పోల్చితే మనం మెరుగ్గానే వున్నాం. రూపాయి పతనం అనేది స్థిరంగా వుంది.. చాలా నెమ్మదిగా ఒడిదుడుకులు ఎదుర్కొంటోంది..’ అంటూ కేంద్ర ఆర్థిక మంత్రి నిర్మలా సీతారామన్ సెలవిచ్చారు.

ఒకప్పుడు యాభై అరవై రూపాయల దగ్గర వుంటేనే, రూపాయిని కాంగ్రెస్ పార్టీ చంపేసిందంటూ బీజేపీ నానా యాగీ చేసింది. ఇప్పుడేమో 80 దాటేసింది. అదీ నరేంద్ర మోడీ సర్కారు పుణ్యమే.. అన్న విమర్శలు వెల్లువెత్తుతున్నవేళ కేంద్ర ఆర్థిక మంత్రి నిర్మలమ్మ కొత్త కథలు చెబుతున్నారు రూపాయి పతనం విషయమై.. దేశ ఆర్థిక పరిస్థితిపై.

ఎయిర్ ఇండియాని అమ్మేశారు.. కేంద్ర ప్రభుత్వ రంగ సంస్థల్ని చాలావరకు అమ్మేశారు. ఎక్కడ అప్పు పుడితే, అక్కడ.. నిస్సంకోచంగా అప్పులు చేసేస్తున్నారు. ఇంకోపక్క, రూపాయి పతనం. అయినాగానీ, ఆల్ ఈజ్ వెల్.! అదెలా.? దేశ ప్రజలకు నిజాలు చెప్పడం ఎప్పుడో మానేసింది నరేంద్ర మోడీ సర్కార్.

‘వాళ్ళకైతే రెండు కాళ్ళూ పోయాయ్.. మనకి ఒక్కటే కాలు పోయింది.. వున్ కాలు కూడా మోకాలి వరకూ తెగిందంతే..’ అన్నట్లుంది కేంద్ర ఆర్థిక మంత్రి నిర్మలా సీతారామన్ వ్యవహారశైలి, రూపాయి పతనం విషయంలో.