లాక్‌డౌన్‌లోనూ కష్టపడుతున్న ఆర్‌ఆర్‌ఆర్‌ టీం?

కరోనా వైరస్‌ వ్యాప్తి చెందకుండా ఉండేందుకు కేంద్ర ప్రభుత్వం దేశ వ్యాప్తంగా లాక్‌డౌన్‌ను విధించిన విషయం తెల్సిందే. ఈ సమయంలో ఎక్కడి పనులు అక్కడే స్థంభించి పోయాయి. కాని కొన్ని సంస్థలు మాత్రం వర్క్‌ ఫ్రమ్‌ హోమ్‌ చేయిస్తూ తమ కార్యకలాపాలను కొనసాగిస్తున్న విషయం తెల్సిందే. రాజమౌళి తెరకెక్కిస్తున్న ఆర్‌ఆర్‌ఆర్‌ చిత్రంకు సంబంధించిన గ్రాఫిక్స్‌ వర్క్‌ కూడా విజువల్‌ ఎఫెక్ట్స్‌ ఎక్స్‌పర్ట్స్‌ వర్క్‌ ఫ్రమ్‌ హోమ్‌ మాదిరిగా చేస్తున్నారట. తాజాగా ఈ విషయాన్ని స్వయంగా రాజమౌళి చెప్పుకొచ్చాడు.

ఇటీవల పలు మీడియా సంస్థలకు ఆన్‌ లైన్‌ ద్వారా ఇంటర్వ్యూ ఇచ్చిన రాజమౌళి ప్రస్తుతం తన లాక్‌ డౌన్‌ టైంను ఎలా కొనసాగిస్తున్న విషయాన్ని చెప్పుకొచ్చాడు. ప్రతి రోజు కూడా సినిమాకు సంబంధించిన పోస్ట్‌ ప్రొడక్షన్‌ వర్క్‌ను సమీక్షిస్తున్నట్లుగా చెప్పుకొచ్చాడు. లాక్‌డౌన్‌ పీరియడ్‌లో కూడా సినిమా పనులు ఆగలేదని ఆయన చెప్పాడు. షూటింగ్‌ జరుగకున్నా గ్రాఫిక్స్‌ వర్క్‌తో పాటు డబ్బింగ్‌ పనులు కూడా జరుగుతున్నాయి కనుకే సినిమాను ఖచ్చితంగా సంక్రాంతికి విడుదల చేస్తామని నమ్మకంగా రాజమౌళి చెబుతున్నాడు.

బాహుబలి చిత్రం తర్వాత జక్కన్న తెరకెక్కిస్తున్న చిత్రం అవ్వడంతో అంచనాలు భారీగా ఉన్నాయి. ఎన్టీఆర్‌, రామ్‌చరణ్‌లు నటిస్తున్న కారణంగా అంచనాలు మరింతగా పెరిగాయి. కీరవాణి సంగీతం అందిస్తున్న ఈ సినిమాలో హీరోయిన్స్‌గా ఆలియా భట్‌ ఇంకా ఓలివియాలు నటిస్తున్నారు. అజయ్‌ దేవగన్‌ కీలక పాత్రలో కనిపించబోతున్నాడు. స్వాతంత్య్ర ఉద్యమ కాలం నాటి నేపథ్యంలో పీరియాడిక్‌ డ్రామాగా ఈ చిత్రం రూపొందుతున్న విషయం తెల్సిందే. బాహుబలిని మించి ఈ చిత్రం ఉంటుందనే నమ్మకంతో ఫ్యాన్స్‌ ఎదురు చూస్తున్నారు.