రాష్ట్రంలో రహదారుల నిర్మాణంపై జరుగుతున్న ప్రచారాలపై ఉప ముఖ్యమంత్రి కార్యాలయం స్పష్టత ఇచ్చింది. కొన్ని వర్గాలు, అనుకూల మీడియా సంస్థలు రోడ్లలో కనిపిస్తున్న కట్లను నిర్మాణ లోపాలుగా చూపిస్తూ ప్రజలను తప్పుదోవ పట్టిస్తున్నాయని ఆరోపించింది.
రాష్ట్ర ఉప ముఖ్యమంత్రి Pawan Kalyan నాయకత్వంలో పంచాయతీరాజ్, గ్రామీణాభివృద్ధి శాఖలు రహదారుల నిర్మాణంలో నాణ్యత విషయంలో ఎలాంటి రాజీ పడడం లేదని పేర్కొంది. ప్రతి పనిలో కచ్చితమైన ప్రమాణాలు పాటిస్తూ, సోషల్ ఆడిట్లను పారదర్శకంగా నిర్వహిస్తున్నామని తెలిపింది.
ఇటీవల సామాజిక మాధ్యమాల్లో వైరల్ అవుతున్న వీడియోల్లో కనిపిస్తున్న రోడ్డు భాగాలు నిర్మాణ లోపాల వల్ల కాకుండా, నాణ్యతా పరీక్షల కోసం కట్ చేసినవేనని స్పష్టం చేసింది. రోడ్డు నిర్మాణంలో ప్రతి పొరను పరీక్షించే ప్రక్రియలో భాగంగా టెస్ట్ కట్లు చేయడం సాధారణమేనని, పూర్తి ప్రమాణాలు నిర్ధారించిన తర్వాతే తదుపరి పనులు చేపడతారని వెల్లడించింది.
ప్రత్తిపాడు ప్రాంతంలో నిర్మాణంలో ఉన్న రహదారికి సంబంధించిన వీడియోలను తప్పుగా చూపిస్తూ దుష్ప్రచారం చేస్తున్నారని కార్యాలయం పేర్కొంది. అభివృద్ధిని ఓర్వలేని కొన్ని వర్గాలు ఉద్దేశపూర్వకంగా తప్పుడు సమాచారాన్ని వ్యాప్తి చేస్తున్నాయని విమర్శించింది.
ఇలాంటి దుష్ప్రచారాలపై ప్రజలు అప్రమత్తంగా ఉండాలని, తప్పుడు వార్తలను నమ్మవద్దని సూచించింది. తప్పుదోవ పట్టించే వ్యక్తులు, సంస్థలపై చట్టపరమైన చర్యలు తీసుకుంటామని హెచ్చరించింది.
రాష్ట్రంలో జరుగుతున్న ప్రతి అభివృద్ధి పనిలో నాణ్యతకు ప్రాధాన్యం ఇస్తూ, పూర్తి స్థాయి సోషల్ ఆడిట్లతో ముందుకు సాగుతున్నామని, ఇది సమర్థమైన పాలనకు నిదర్శనమని ఉప ముఖ్యమంత్రి కార్యాలయం తెలిపింది.